{idkey=8592b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F941-angel-bermudez-pami-loke-ta-conta-ta-e-contenido-tono-di-carta-di-cft-ta-cuestion-politico%3FItemid%3D101][title=Angel+Bermudez%3A+%E2%80%9CPami+loke+ta+conta+ta+e+contenido%2C+tono+di+carta+di+CFT+ta+cuestion+politico%E2%80%9D][desc=Minister+Bermudez+ta+informa+despues+di+reunion+den+Parlamento.%26amp%3Bnbsp%3BOranjestad+%E2%80%93+Aruba%2C+22+April+2015%3A+Despues+di+e+reunion+cu+a+tuma+luga+ayera+den+Parlamento%2C+caminda+cu+Minister+di+Finanzas+Angel+Bermudez+a+elabora+riba+e+carta+cu+College+Financieel+Toezicht+%28CFT%29+a+manda+pa+su+persona+y+pa+Presidente+di+Staten+Sra.+Drs.+Marisol+Lopez+Tromp+dia+10+di+April+ultimo%2C+e+mandatario+ta+sostene+cu+e+parti+mas+importante+di+e+discusion+aki+ta+cu+Gobierno+mester+cumpli+cu+loke+e+la+bisa+cu+e+ta+bay]}
Minister Bermudez ta informa despues di reunion den Parlamento. 

Oranjestad – Aruba, 22 April 2015: Despues di e reunion cu a tuma luga ayera den Parlamento, caminda cu Minister di Finanzas Angel Bermudez a elabora riba e carta cu College Financieel Toezicht (CFT) a manda pa su persona y pa Presidente di Staten Sra. Drs. Marisol Lopez Tromp dia 10 di April ultimo, e mandatario ta sostene cu e parti mas importante di e discusion aki ta cu Gobierno mester cumpli cu loke e la bisa cu e ta bay haci den su maneho financiero pa haci e finanzas publico uno sostenibel den e añanan venidero.

Segun e mandatario, e tono di e carta di CFT, e manera cu e carta ta dirigi entre otro ta aspectonan meramente politico. “Pami loke ta conta ta e contenido, manera mi a bisa esaki ta un ripiticion of recordatorio riba e 4 recomendacionnan cu CFT a haci, pa nan wordo tuma na cuenta y pa nos por debati di un forma serio y ampliamente durante e tratamento di presupuesto 2015”, Minister Bermudez a expresa.

E mandatario a sigui splica cu e enfasis no mester ta basa riba kico lo por ta consecuencia di e carta aki sino cu Gobierno y cada ken mester cumpli cu lo cual nan a bisa di un forma claro, fiho y cu lo cual a wordo bisa cu lo ehecuta ta wordo haci tambe.

“E maneho cu nos a inicia aña pasa a base di e 24 decisionnan y cu a wordo introduci cu presupuesto supletorio 2014 ta forma e fundamento di e maneho cu lo hiba nos na un presupuesto balansa pa 2017/2018. Nos mester mustra na un manera obvio y transparente cu berdad nos ta ehecutando e decisionnan aki”, asina Minister Bermudez a indica despues di e reunion den Parlamento ayera.

Pa e mesun motibo aki tambe e dignatario di finanzas ta di opinion cu e carta aki di CFT mester wordo considera como un recordatorio. Segun splicacion di Minister Bermudez na momento cu Gobierno yega na un presupuesto balansa y cu por cuminsa traha riba reduccion di debe nacional ta unda cu varios observador experto den e tereno di finanzas ta forma parti di e proceso tambe mediante nan consehonan.

“E fenomeno aki no ta nada nobo, nos conoce varios institutonan internacional manera IMF, Fitch, OECD, World Bank y CFT entre otro cu ta yuda nos cu nan experticio y cu ta comparti cu nos nan recomendacion si e ruta ta corecto y si tur cos ta canando bon”, e mandatario a bisa.

Lo cual si ta wordo recomenda ta e alternativa di un ruta mas acelera pa yega na un finanzas publico balansa. Den e caso di CFT, esaki a wordo proponi den forma di un ‘solidariteits heffing’ caminda cu e entradanan por ta mas solido y consecuentemente mas lihe lo yega na un presupuesto balansa. Esey ta algun ehempel di e tipo di discusionnan cu por lo por tuma luga durante tratamento di presupuesto.

Minister Bermudez ta haci enfasis cu mester tin seriedad den e maneho, pues ta esaki ta duna Hulanda y demas Instituto Internacional e confiansa y confortabilidad, ademas di un bon trayectoria y reputacion, cu nos ta haya loke nos mester na momento di busca financiamento den exterior pa yuda nos mantene un finanzas publico mas duradero.

Segun confirmacion di e mandatario di finanzas, e trayecto di contestacion di e preguntanan escrito ta yegando na su final, por lo tanto Minister Bermudez ta spera cu tur miembro di Parlamento dedica tur e tempo necesario pa e trata e presupuesto aki y cu tur seriedad.

“E mester ta claro, comprendibel y obvio kico ta e fundeshi di e presupuesto, e maneho y con transparente tur e factornan ta cu ta wordo aplica pa yega na e presupuesto, tanto desde perspectiva di gasto como di entrada. A base di esaki nos por bisa con realistico y realisabel e presupuesto aki ta y cu na mes momento e por wordo aproba”, Minister Bermudez a expresa.

FIN.

Expresionnan haci den e articulo aki no necesariamente ta refleha opinion di ArenaPoliti.co