{idkey=9117b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F96-gabinete-me-ii-encuesta-riba-traimerdia-pa-scolnan-secundario-a-duna-bista-cla-di-loke-hobennan-kier-haci%3FItemid%3D101][title=Gabinete+ME+II%3A+Encuesta+riba+Traimerdia+pa+Scolnan+Secundario+a+duna+bista+cla+di+loke+hobennan+kier+haci][desc=Den+luna+di+juni+2014+e+ekipo+di+Traimerdia+Scolnan+Secundario+a+haci+un+encuesta+cerca+prome+y+di+dos+klas+di+diferente+scolnan+MAVO+y+tambe+EPB.+Den+total%2C+a+bishita+8+scol.+E+encuesta+ta+den+cuadro+di+e+preparacionnan+cu+Gabinete+Mike+Eman+II+ta+haciendo+pa+ofrece+%E2%80%98traimerdia%E2%80%99+na+hobennan+di+ense%C3%B1ansa+secundario.+Minister+di+Asunto+General+y+Minister+di+Ense%C3%B1ansa+y+Famia+conhuntamente+ta+trahando+riba+e+iniciativa+aki.+Durante+e+preparacion+di+e+proyecto+piloto+a+papia+cu+varios+grupo%3B]}

Den luna di juni 2014 e ekipo di Traimerdia Scolnan Secundario a haci un encuesta cerca prome y di dos klas di diferente scolnan MAVO y tambe EPB. Den total, a bishita 8 scol. E encuesta ta den cuadro di e preparacionnan cu Gabinete Mike Eman II ta haciendo pa ofrece ‘traimerdia’ na hobennan di enseñansa secundario. Minister di Asunto General y Minister di Enseñansa y Famia conhuntamente ta trahando riba e iniciativa aki.

Durante e preparacion di e proyecto piloto a papia cu varios grupo; scolnan, mayornan, dunadonan di trabou, fundacionnan cu ta traha cu mucha y hobennan y naturalmente, e opinion di e propio hobennan no por a keda afo. Cu Traimerdia kier ofrece e hobennan un programa atractivo pa participa den dje despues di ora di les y bou guia apropia.

“Den e formulacion y diseño di e programa, nos kier tene cuenta cu e idea y deseonan di e hobennan,” segun Bart Kool, miembro di e ekipo Traimerdia Scolnan Secundario. Mientrastanto e resultadonan di e encuesta ta wordo procesa danki na Chris Figaroa, Aime Paalman, Richard Tromp, Mario Kelly y Nando Kelly, tur miembronan di e ekipo. Tambe CBS a aporta. “Nos kier gradici tur hoben, e scolnan y CBS pa nan participacion” segun Chris Figaroa.

Den total 234 hoben a yena un formulario di informacion. Esey ta mas of menos 20% di e grupo total di hobennan cu na Aruba ta den klas 1 y 2 di tanto scolnan MAVO y EPB. “Esey ta en berdad basta y nos ta kere cu pesey mes lo por saca hopi conclusion a base di e encuesta pa e grupo total,” Figaroa a enfatisa.

Di e hobennan cu a participa den e encuesta, 90% ta den e edad di 12 pa 15 aña, cu mes tanto cantidad di mucha muhe como mucha homber. E grupo cu a participa den e encuesta ta un bon refleho di e grupo di hoben cu lo mester por participa den e programa di Traimerdia. E preguntanan ta formula pa haya sa mas di loke hobennan ta haci despues di ora di scol, pero tambe kico nan lo prefera di haci. Asina por tene cuenta cu esaki ora di hinca den otro e programa di Traimerdia.

E gran mayoria di e hobennan (80%) a bisa cu despues di scol ta bay cas. Un parti ta bay cerca famia (5%) of amigo (3%). Tambe un parti chikito a bisa cu ta haci deporte (3%) of ta bay traha (3%). Cu e gran mayoria di e hobennan ta bay cas, no ta algo nobo. “Nos tabata sa esey caba,” segun Chris Figaroa. E comision cu a traha e rapport riba Traimerdia a indica cu ta hopi bon si e Traimerdia por tuma luga den bario, cerca di cas. Finalmente no a scoge pa e opcion ey. “E Traimerdia mester ta safe y ta rekeri sigur di un infrastructura solido manera edificio y luga pa haci deporte. Actualmente e miho opcion ta na scol mes.”

Tambe tabatin curiosidad pa sa con e hobennan ta yega cas y esey ta pa dos motibo. Si tin un Traimerdia, por ehempel na e propio scol, kico esey ta nifica pa e fluho di trafico? Ta asina en berdad cu un parti grandi di e muchanan ta wordo busca dor di un di e mayornan? Y nos ta bay hala e fluho di trafico ey pa despues di e Traimerdia? Y kico esey ta nifica pa e otro maneranan di yega cas. Busnan tambe lo mester core mas laat den dia? Di un manera e resultadonan obteni ta confirma e imagen general. Rond di e final di scol tin hopi mayornan cu ta bay busca nan yiu. Un poco mas di e mita di e muchanan a bisa cu nan ta wordo busca na scol. Un di cinco parti te di cuater parti ta core den bus y 15% ta cana. Cerca casi 10% di encuestadonan esaki ta varia. “Den cualkier caso nos mester bay wak ki tipo di transporte  tin na final di dia.” Bart Kool a bisa.

Y kico e hobennan ta haci un bes cu nan a yega nan destino despues di scol? Atardi, cu un mayoria grandi, wak television ta e actividad mas menciona. Casi 57% di e hobennan a duna esaki como un di e actividadnan entre dos y seis or. Otro actividadnan cu ta wordo menciona ta: internet (menciona pa 35% di e hobennan); deporte (tambe menciona pa 35%); haci huiswerk (a wordo menciona pa 44%); video games (27%). Otro actividadnan cu tambe ta menciona ta: chill cu amigonan (23%), famia (7%), toca musica (13%). Na e pregunta aki por a duna mas contesta. Hobennan ta haci mas cos despues di scol.

Y naturalmente e pregunta di kico e hobennan kier haci durante e Traimerdia. Aki por a yena mas contesta. Hobennan a bin bek cu cifranan grandi pa demostra cu nan tin boluntad pa practica deporte. Casi 56% di e hobennan a duna practica di deporte como nan opcion faborito. Un bon di dos opcion tabata cushina. Esey a wordo scoge dor di 18%. Cerca su tras ta bin actividadnan artistico, haci musica y lesa buki. “Ta mustra cu si durante e tempo di Traimerdia ta dedica hopi tempo na deporte, nos lo tin en todo caso, e interes di un parti grandi di e grupo di hobennan. Pero e otro hobbynan menciona ta duna nos tambe un idea pa cu e hincamento den otro di e programa,” segun Bart Kool.

Un alternativa pa actividadnan den Traimerdia na scol ta actividadnan den bario. Kico ta e opinion di e hobennan pa cu actividadnan den bario? E hobennan tabata hopi duidelijk riba e falta di actividad den nan bario. 80% di e hobennan a indica cu, na nan opinion, no tin actividad caminda nan por of lo tin smaak di participa. Casi 13% di e hobennan a bisa cu si tin un par di actividad. Eynan ta sinta un area potencial pa desaroya. “Esey tambe ta algo cu e comision di Traimerdia pa Scolnan Secundario ta considera,” Bart Kool a bisa. “Pa aworaki nos ta cuminsa na e scolnan.” Esey ta un reto riba su mes caba.

Expresionnan haci den e articulo aki no necesariamente ta refleha opinion di ArenaPoliti.co