{idkey=1321b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1065-mike-eman-aruba-ta-aserca-e-situacion-di-refugiadonan-cu-sentido-di-tolerancia-y-hospitalidad%3FItemid%3D101][title=Mike+Eman%3A+%E2%80%9CAruba+ta+aserca+e+situacion+di+refugiadonan+cu+sentido+di+tolerancia+y+hospitalidad%E2%80%9D][desc=ORANJESTAD+%E2%80%93+Debi+na+un+agenda+druk+Prome+Minister+Eman+no+por+tabata+presenta+na+apertura+di+e+conferencia+di+UNHCR+Caribbean+Partners+Network+Agenda+pero+a+priminti+cu+e+lo+tey+na+ciere+di+e+reunion+y+a+cumpli+tambe.+Diabierna+atardi+e+reunion+di+4+dia+a+finalisa+den+oranan+di+atardi+cu+e+discurso+di+Prome+Minister+Mike+Eman%2C+kende+a+haya+aplauso+y+elogio+di+e+participantenan+pa+su+pensamento+visionario.+%E2%80%9COhala+cu+na+Corsou+nos+por+tabatin+un+lider+manera+Prome+Minister+Mike+Eman%2C+e+situac]}
ORANJESTAD – Debi na un agenda druk Prome Minister Eman no por tabata presenta na apertura di e conferencia di UNHCR Caribbean Partners Network Agenda pero a priminti cu e lo tey na ciere di e reunion y a cumpli tambe. Diabierna atardi e reunion di 4 dia a finalisa den oranan di atardi cu e discurso di Prome Minister Mike Eman, kende a haya aplauso y elogio di e participantenan pa su pensamento visionario.

“Ohala cu na Corsou nos por tabatin un lider manera Prome Minister Mike Eman, e situacion di nos pais lo ta hopi diferente, “ Hendrik Stomp, di Cruz Cora Curacao a expresa despues di a scucha e mandatario hiba palabra. “Tabata bale la pena spera p’e te na final di nos reunion”. Stomp a keda impresiona pa e maneho cu e Gobierno di Prome Minister Eman ta hibando, pa crea un bida di 5 strea pa tur ciudadano, loke gobierno ta haciendo riba tereno di sostenibilidad, desaroyo di espacionan publico, participacion di pueblo pa medio di trabou di boluntario y promocion di comunitarismo. “Nos ta un isla chikito pero grandi den soñonan.”

Mas cu 20 pais y organisacion di e area di Caribe tabata representa na e Conferencia aki cu a conta cu 36 participante. Tabata un conferencia unda cu e tema principal tabata “con pa atende cu refugiadonan”, aunke cu e problema aki no t’asina grandi den e area aki manera na paisnan Europeo.

Prome Minister Eman a bisa e participantenan cu ta un placer pa comparti su conocemento na e Conferencia aki. El a señala cu Aruba ta un isla cu tin hopi di haber cu inmigracion. “Te cu algun siglo pasa nos tabata un isla masha poco habita y despues tabatin diferente momentonan grandi den historia cu a experencia inmigracion grandi.” A splica cu e prome inmigracion grandi cu Aruba a conoce tabata cu yegada di e refineria den añanan 1920. Aruba na e momento ey tabatin rond di 2 mil persona trahando den e refineria mientras cu e refineria tabatin mester casi 10 mil persona. Asina miles di ciudadano di Caribe a muda pa e isla aki, di cual mayoria a keda biba permanente riba e isla. Den e periodo ey, Aruba su poblacion a crece rapidamente den un periodo cortico, for di añanan 1920 te cu 1950, di 10 pa 50 mil persona. Cu ciere di e refineria na 1985, a cuminsa desaroya e sector economico di turismo, pa minimalisa e crisis cu a surgi dor di ciere di e refineria. Aruba den e periodo ey, Eman a bisa, a perde practicamente 50% di entrada di e pais y 30 pa 40% di cupo di trabou a disparce. “Aruba tabata enfrentando un crisis grandisimo’.  El a sigui conta con e lidernan di e tempo ey a mira un gran potencial den sector turistico y a desaroya esaki na su maximo. A duplica e cantidad di camber di hotelnan den un periodo cortico pa por enfrenta e crisis andando. Pero a logra mas cu duplica, pasobra a yega na casi 8 mil camber di hotel. Awendia a logra cu e turistanan cu ta yega Aruba via aeropuerto a bay di casi 200 mil te na mas cu un miyon, ademas di e casi 1 miyon cu ta yega via barconan crucero.   

Un entrada grandi di trahadonan a tuma luga den añanan 1990, ya cu for di un 35% di desempleo a move pa escasez di trahado.

Tur e splicacion aki tin un motibo. Unda cu un hende a nace, el a bisa, ta un simpel coincidencia. “E suela y naturalesa di mundo, no ta di nos. E ta un regalo di Dios y nos no por mir’e cu e isla ta solamente pa Arubianonan. Aunke cu siendo un isla chikito nos mester ta consciente di cuanto crecemento por permiti. Pero por atende inmigracion cu cierto sentido di hermandad. Si bo por comparti bo prosperidad economico y crea oportunidadnan pa otro muchanan tin retonan pa sigui un estudio na nan pais, si bo por comparti oportunidad pa otro hendenan, ta algo cu ta den curason di e Arubiano. Ora papia di refugiadonan ta mesun cos. “Nos no tin hopi experiencia cu situacionnan asina, contrario na otro partinan di mundo,  pero di tur manera nos lo aserca e situacion di refugiadonan cu e mesun sentido di tolerancia y hospitalidad.” Ta importante pa ta prepara. Inmigracion grandi debi na creacion di cuponan di trabou y oportunidadnan nobo, ta diferente cu un entrada grandi di refugiadonan, pasobra e pais lo no ta prepara pa absorba nan yegada. Pa Aruba ta masha importante cu “boso ta sinta aki y discuti con prepara e islanan aki mester ta prepara pa refugiadonan.”

Expresionnan haci den e articulo aki no necesariamente ta refleha opinion di ArenaPoliti.co