{idkey=9646b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1100-booshi-wever-upp-maneho-di-ensenanza-di-nos-pais-y-derecho-di-mucha-maneho-incoherente-of-djis-maneho-di-showboat%3FItemid%3D101][title=Booshi+Wever+%28UPP%29%3A+Maneho+di+ense%C3%B1anza+di+nos+pais+y+derecho+di+mucha%3A+maneho+incoherente%2C+of+djis+maneho+di+%E2%80%9Cshowboat%E2%80%9D][desc=Cu+atencion+Union+Patriotico+Progresista+%28UPP%29+a+tuma+nota+di+e+biahe+di+ministro+Paul+Croes+pa+Ginebra+%28Swisa%29+pa+asina+atende+e+reunion+di+Comision+di+Derecho+di+Mucha%2C+na+unda+cu+su+persona+lo+mester+bay+duna+un+raportahe+di+e+situacion+di+Aruba.+E+raportahe+aki%2C+segun+e+comunicado%2C+ta+forma+parti+di+cumplimento+cu+e+tratado+di+derecho+di+mucha%2C+di+cual+Aruba+tambe+ta+forma+parti.+E+minister+ta+forma+parti+di+e+delegacion+di+Reino+Hulandes%2C+y+lo+mester+bay+duna+un+bista+riba+e+situacion+di+Ar]}
Cu atencion Union Patriotico Progresista (UPP) a tuma nota di e biahe di ministro Paul Croes pa Ginebra (Swisa) pa asina atende e reunion di Comision di Derecho di Mucha, na unda cu su persona lo mester bay duna un raportahe di e situacion di Aruba.
E raportahe aki, segun e comunicado, ta forma parti di cumplimento cu e tratado di derecho di mucha, di cual Aruba tambe ta forma parti.
E minister ta forma parti di e delegacion di Reino Hulandes, y lo mester bay duna un bista riba e situacion di Aruba pa loke ta nos muchanan. Asina e ta menciona topiconan importante manera educacion, formacion, salud y participacion di muchanan y hubentud na desaroyo den nos comunidad.
E minister ta gaba riba e desaroyo integral hiba dor di e gabinete actual, y unda cu a bin cu varios maneho pa atende cu nos muchanan. Tambe pa loke ta nos hobennan.

Riba su mes tabata un comunicado cortico, yen di retorica di bon maneho, maneho integral y union bou organisacionnan y gobierno, pa asina traha duro na proteccion y cuido di nos muchanan.

Ora cu nos di UPP analisa e comunicado cortico aki, nos por ripara cu ta trata aki atrobe di “scucha mi palabranan, y no mira mi echonan”. Pasobra loke nos por observa ta, cu pa loke ta e derecho di enseñanza pa nos mucha- y hobennan, nos ta conociendo hustamente un retraso.
UPP ta spera cu ora minister Croes ta na Ginebra, e por ta sincero cu e audiencia y no sigui cu mala maña di “bende hende un 6 pa un 9” manera ta bin ta socediendo aki na Aruba.
Nos por ripara un maneho incoherente riba loke ta derecho di mucha, particularmente esun di enseñanza, y un maneho contradictorio na loke ta derecho di mucha y palabracion internacional, pa loke ta concerni enseñanza primaria universal, cu e aña aki lo bira tambe e aña di midimento, manera cu ta tuma lugar tambe den e dianan aki na e Foro di Educacion Mundial na Inchon, Sur Corea, na unda cu ta discuti e agenda pa Educacion Mundial, adoptando un declaracion nobo pa cu 2030.
Na e conferencia aki Ban Ki-moon, secretario general di Nacionnan Uni, a accentua cu enseñanza ta di e mesun prioridad cu e derecho riba salud y empleo, ya cu esaki ta e arma pa bringa pobresa, opresion y menasa latente di extremismo.

Y kico nos por wak anno 2015 na Aruba?
Minister di Enseñanza sra. Hooijboer, ta acorda cu SKOA pa aumenta e “Ouderlijke Bijdrage/Schoolgeld”, haciendo asina cu enseñanza no ta gratis mas (bayendo tambe contra di un mocion unanime di Parlamento pasa recientemente). Y e aumento aki a bin, pasobra e gobierno tin otro prioridadnan. E placa cu mester a bay pa educacion di nos muchanan, ta desaparece den saco di compinchinan di e ministernan.
Mientras cu nos por wak cu tin discriminacion pa nos muchanan cu tin di pasa test pa drenta Colegio Arubano, y tambe normanan mucho halto pa nos hobennan cu ta termina MAVO, evitando nan pa drenta Colegio Arubano.
Pues derecho di nos muchanan y hobennan ta wordo limita severamente, y nos por mira un minister di Enseñanza debil ta djis pidi pa tene consideracion cu e forma di pago di school basico, y pa duna nos hobennan un chens pa drenta school mas avanza.

UPP ta spera cu minister di Hubentud por duna un relato serio y sincero di e situacion real na Aruba.

UPP no a toca mes ainda e cantidad di muchanan cu no ta ricibi e alimentacion necesario tur dia, pa motibo di e situacion di crisis cu e gobierno di Minister Paul Croes a bin ta hincando nos pueblo aden.
Si 60% di nos comunidad ta gana apenas un sueldo minimo, cuanto ta e muchanan cu sea mainta of anochi no tin algo na stoma pa nan por crece sanamente y por desaroya nan facultadnan intelectual.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 25, 2015

Expresionnan haci den e articulo aki no necesariamente ta refleha opinion di ArenaPoliti.co