{idkey=9663b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1265-upp-upp-ta-sostene-e-ponencianan-di-plataforma-union-di-papiamento-papiamento-ta-un-idioma-madura-completo-y-di-nivel-intelectual-pa-por-sina-nos-yiunan-den-dje%3FItemid%3D101][title=UPP%3A+UPP+ta+sostene+e+ponencianan+di+Plataforma+Union+di+Papiamento%3A+Papiamento+ta+un+idioma+madura%2C+completo+y+di+nivel+intelectual+pa+por+si%C3%B1a+nos+yiunan+den+dje%21][desc=Partido+UPP+a+tuma+nota+di+un+comunicado+recien+cu+a+wordo+emiti+pa+diferente+organisacion-%2Fplataformanan+cu+ta+sali+na+vanguardia+di+Papiamento%2C+unda+a+duna+un+splicacion+amplio+riba+e+postura+di+Hulandes+enfrente+di+Papiamento.E+organisacion%2Fplataforma+ta+termina+puntrando+si+tanto+Union+di+Idioma+Hulandes+y+Ministerio+di+Ense%C3%B1ansa+di+Hulanda+ta+bailando+un+polka+colonial.UPP+ta+sostene+completamente+e+punto+di+bista+cu+e+Plataforma+Union+di+Papiamento+a+vocifera+den+nan+comunicado.+Ministeri]}
Partido UPP a tuma nota di un comunicado recien cu a wordo emiti pa diferente organisacion-/plataformanan cu ta sali na vanguardia di Papiamento, unda a duna un splicacion amplio riba e postura di Hulandes enfrente di Papiamento.
E organisacion/plataforma ta termina puntrando si tanto Union di Idioma Hulandes y Ministerio di Enseñansa di Hulanda ta bailando un polka colonial.

UPP ta sostene completamente e punto di bista cu e Plataforma Union di Papiamento a vocifera den nan comunicado. Ministerio di Enseñansa Hulandes, siguiendo e manera di pensa di Union di Idioma Hulandes, ta degenera nos idioma Papiamento na un idioma di segunda categoria (tweederangstaal), mescos cu ya nan ta bin ta tratando nos como ciudadanonan di segunda categoria.
Asina nos por compronde cu nan ta propone pa Hulandes keda manteni na Boneiro como lenga di instruccion (esta di enseñansa), ya cu Hulandes ta fungi pa e hobennan como porta di entrada pa desaroyo intelectual cu cua nan por logra obtene un diploma y sigura asina un mihor futuro.
E minister hulandes encarga cu enseñansa, ta considera Papiamento mas bien como un idioma social, cultural y comunitario, pero na Islanan Ariba cu ta resorta bou di Hulanda, esta St. Eustatius y Saba, na unda Ingles ta e idioma cu ta sobresali, SI a escohe Ingles como lenga di instruccion den enseñansa.
Corectamente Plataforma Union di Papiamento ta conclui cu e Secretario di Estado di Enseñansa cu e decision aki ta balota Papiamento como un idioma inferior. Apesar cu riba islanan di Corsow y Aruba ainda e ministernan no tin mucho di bisa riba e punto aki, UPP ta kere cu ta necesario pa Parlamento pone atencion riba loke a keda presenta aki.

Realisacion di union y solidarismo bou nos ciudadanonan, sea cual sea nan origen y cultura, ta pa medio di un integracion real na unda e forsa catalisador mester ta e cultura, tradicion, norma- y balornan Arubiano y e idioma Papiamento, sin obviamente perde respet pa cultura di otronan.
UPP ta mira enseñansa como un di e hermentnan importante pa logra na crea un comunidad asina. Na unda Papiamento como idioma di instruccion na nos scolnan lo duna nos studiantenan un mihor oportunidad pa desaroya nan conocemento, evita frustracion innecesario pa motibo di no ta domina e idioma hulandes, y yuda asina un mehoracion di nan formacion formal.
UPP ta kere cu Papiamento tin tur e capacidad pa ta un idioma intelectual, un idioma avansa, cu por para banda di tur otro idioma. E hecho cu nos tin comprendi cu nos tin nos prome graduadonan den Master di Papiamento, ta muestra cu Papiamento ta un idioma completo.
Si nos kier traha na un comunidad basa riba union y solidarismo, riba uno di bon ciudadania, Papiamento por contribui na e proceso di integracion y aceptacion. Hulandes, cu awor aki rond di 5% ta papi’e como idioma di cas, lo no por fungi como tal.
Papiamento mester wordo mira y acepta como e motor catalisador di un proceso di integracion y tambe como uno cu ta contribui na promove e proceso intelectual di nos yiunan. Si 70% di nos poblacion ta papia e idioma, ta mas cu logico pa introduci Papiamento como idioma di instruccion na scolnan. Esaki lo contribui tambe na un ciudadano mas critico y analitico, cu na final lo tin su bentahanan pa creacion di nacion basa riba solidarismo, bon ciudadania y union.

Mundo politico na Aruba, apesar di tin diferente representante den Parlamento, nunca a demostra interes particular pa desaroyonan moderno riba tereno di enseñansa, y a hasta bira lomba pa problemanan grandi cu enseñansa ta enfrentando e ultimo tempo.
Ta bon conoci cu enseñansa ta den decadencia, nos hoben studiantenan tin problema grandi cu conducta y comportacion, y mayornan mester a acepta hasta un aumento di e contribucion na SKOA , mientras e cantidad di alumno cu ta slaag pa nan examen escolar atrobe a mustra un deterioro.
E forza di Papiamento ta keda te awe den e hecho cu el a sobrebibi tur mareanan difamatorio cu kier a stroba su pleno desaroyo.
P’esey UPP, como partido politico, ta duna sosten na e punto di bista di Plataforma Union di Papiamento. Mirando e influx di e ultimo añanan di Hulandesnan na Boneiro, ta mas cu logico cu mantene e idioma Hulandes como idioma di instruccion, ta na bienestar di e mucha Hulandes cu despues mester bay bek Hulanda pa e sigui den e bida na Hulanda.
P’esey, na momento cu nos aki tambe keda permiti gobierno Hulandes sigui interveni den nos asuntonan, ta yega un dia cu nos tambe ta bay yega na e situacion cu Boneiro ta atravesando, y Aruba (Corsow tambe) lo bay haya su mes confronta cu mesun situacion.
Envez cu Parlamentarionan ta ocupa nan mes con pa limita derecho constitucional y fundamental di demostracion y manifestacion, nan por dedica mas tempo pa tambe vocifera y puntra Ministernan di Aruba, kico ta e estado di desaroyo di topiconan asina importante manera Papiamento den nos enseñansa.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 21, 2015

Expresionnan haci den e articulo aki no necesariamente ta refleha opinion di ArenaPoliti.co