{idkey=445b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F931-booshi-wever-upp-upp-ta-urgi-parlamento-pa-pidi-gobierno-y-ministernan-pa-para-of-por-lo-menos-temporisa-cierto-proyectonan-pa-asina-alivia-e-maneho-financiero-cu-ta-masacrando-nos-pueblo%3FItemid%3D101][title=Booshi+Wever+%28UPP%29%3A+UPP+ta+urgi+Parlamento+pa+pidi+Gobierno+y+ministernan+pa+para%2C+of+por+lo+menos+temporisa+cierto+proyectonan%2C+pa+asina+alivia+e+maneho+financiero+cu+ta+masacrando+nos+pueblo][desc=Ultimamente+UPP+a+bin+ta+tuma+nota+cu+di+berdad+e+gobierno+di+Mike+Eman+parce+di+ta+perdiendo+tur+nocion+di+realidad.+Si+na+prome+instante+minister+di+Finanzas%2C+Sr.+Angel+Bermudez%2C+por+a+duna+e+impresion+di+ta+un+minister+experto%2C+dia+pa+dia+e+ta+bira+un+figura+decepcionante+pa+loke+ta+trata+nos+gobernacion+aki+na+Aruba.+Nos+historia+financiero+desde+2009+padilanti+a+bira+un+historia+tristo.Si+prome+nos+a+haya+pa+4+a%C3%B1a+largo+un+ministro%2C+esta+Sr.+Mike+de+Meza%2C+cu+a+hinca+Aruba+den+un+abismo+fin]}
Ultimamente UPP a bin ta tuma nota cu di berdad e gobierno di Mike Eman parce di ta perdiendo tur nocion di realidad.
Si na prome instante minister di Finanzas, Sr. Angel Bermudez, por a duna e impresion di ta un minister experto, dia pa dia e ta bira un figura decepcionante pa loke ta trata nos gobernacion aki na Aruba.

Nos historia financiero desde 2009 padilanti a bira un historia tristo.
Si prome nos a haya pa 4 aña largo un ministro, esta Sr. Mike de Meza, cu a hinca Aruba den un abismo financiero nunca antes bisto, y despues pa 8 luna un ministro di finanzas, esta Sr. Juan David Irausquin, cu su curashi a caba na filingrana prome cu el a cuminsa gatia, awe nos ta hinca cu un supuesto experto, cu parce di ta mas ocupa pa wak con ta complace politicamente esnan cu a dune un oportunidad, y no ta importe kico lo pasa cu e pais aki.
E ultimo nombracionnan di hendenan cu salarionan barbaro den nos situacion financiero deplorabel, ta otro prueba di esaki.

UPP ta kere cu ta tempo pa di berdad Parlamento di Aruba, representando Pueblo di Aruba, tuma un postura mas critico, mirando cu ta bay trata presupuesto 2015, pa asina nan tuma e pasonan necesario pa obliga gobierno y ministernan pa para, of por lo menos temporisa proyectonan cu lo no yuda nos awor aki na nada, y cu Pueblo di Aruba, y generacionnan cu ta bini, lo tin di bay paga schat di placa den e siguiente añanan nos dilanti, por lo menos 30 aña.

Asina nos di UPP ta pensa cu p.e. e proyecto di Green Corridor, cu nos por a tende director di DOW, sr. Marlon Croes, papia riba dje recientemente, cu ta bezig ta finalisando e financiamento, cu ainda tin tempo pa para esaki y warda pa un otro momento, ora cu situacion financiero mehora.
Nos pregunta na Parlamento ta, ya cu nos no tin confianza mas den nos gobierno, con e proyecto di Green Corridor aki por a wordo inicia, y cu cua financiamento, si te ainda ta wordo papia cu mester termina e financiamento di e proyecto aki.

Den mesun rosea nos ta tende minister di Finanzas papia di cu mester bin cu Transaction Levy (Transaction Tax) pa bay cubri gastonan di proyectonan PPP, bou cual e proyecto aki di Green Corridor lo bay cay.
Cu introduccion di un Tax asina aki gobierno y minister di Finanzas lo caba di crash nos economia y nos sistema bancario, no pa alivia e situacion malisimo di nos finanzas publico, sino mas bien pa yuda compinchinan politico haya proyecto.
E proyecto di Green Corridor no ta ni na bienestar di P’ariba di Brug, ni na bienestar di economia di Aruba, ni na bienestar di nos medio ambiente/naturaleza, sino na bienestar di cambradanan politico di AVP, cu a yuda financia nan campaña politico, y kizas lo ta comprometi pa sigui yuda.

Gobierno di e forma aki ta sigui deshaci di tur su obligacionnan directo y ta ponenan riba lomba di Pueblo.
Nos a wak esaki caba den e ultimo aña, na unda e responsabilidad pa e fondonan di AZV, APFA y SVB, ta wordo kita for di gobierno y hinca directamente cerca e fondonan aki, cu na su turno lo bay saca nan deficitnan ("tekorten")  for di Pueblo, e clase trahador.
Y nos por mira con politiconan di AVP ta keda gaba cu esaki ta un logro grandi, pa asina por drecha e finanzas publico.
Pero nos sa cu esaki no ta berdad. Nos ta mira cu gastonan di gobierno no ta baha, pero al contrario, ta sigui bin cu mas medidanan pa asina por chica e Pueblo aki, pa asina un grupito rond di AVP por keda biba lekker!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 20, 2015

Expresionnan haci den e articulo aki no necesariamente ta refleha opinion di ArenaPoliti.co