{idkey=8054b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1226-booshi-wever-upp-mientras-cu-e-narcismo-di-mike-e-ta-cabando-cu-e-pais-aki-parlamento-ta-sigui-drumi%3FItemid%3D101][title=Booshi+Wever+%28UPP%29%3A+Mientras+cu+e+%26quot%3Bnarcismo%26quot%3B+di+Mike+E.+ta+cabando+cu+e+pais+aki%2C+Parlamento+ta+sigui+drumi%21%21+%5B%2Baudio%5D][desc=Algun+luna+atras+UPP+a+haci+un+apelacion+na+Parlamento+di+Aruba%2C+particularmente+na+e+13+parlamentarionan+di+AVP%2C+pa+lanta+for+di+so%C3%B1o+y+asina+asumi+nan+responsabilidad+pa+para+proyectonan+descabeya%2C+cu+ta+sigui+hinca+nos+pais+y+hunto+cu+ne+henter+nos+pueblo%2C+den+un+abismo+completo.+Nos+a+pidi+nan+pa+urgi+na+Mike+E.+y+su+gabinete+pa+nan+tuma+nan+retiro+y+asina+duna+espacio+na+un+Gabinete+di+Emergencia+of+un+Gabinete+di+Transicion.+Pero+nos+por+ripara+cu+keto+bay+nan+ta+na+so%C3%B1o+of+ta+sigui+acep]}
Algun luna atras UPP a haci un apelacion na Parlamento di Aruba, particularmente na e 13 parlamentarionan di AVP, pa lanta for di soño y asina asumi nan responsabilidad pa para proyectonan descabeya, cu ta sigui hinca nos pais y hunto cu ne henter nos pueblo, den un abismo completo.
Nos a pidi nan pa urgi na Mike E. y su gabinete pa nan tuma nan retiro y asina duna espacio na un Gabinete di Emergencia of un Gabinete di Transicion. Pero nos por ripara cu keto bay nan ta na soño of ta sigui acepta e “narcismo” di Mike E.

E sucedido di diadomingo mainta na Linear Park sigur ta muestra cu Mike E. por wordo considera como “ontoerekeningsvatbaar”, mirando su actuacion dilanti di e manifestantenan.
No ta na nos di UPP pa bisa con gruponan civil den nos sociedad mester hiba nan manifestacion, pero mescos cu ta e caso den pasado recien, unda nos a desaproba e insultonan y humiliacion den direccion di nos gobernador, nos ta kere cu pusha y insulta Prome Minister di nos pais tampoco por carga nos aprobacion.
UPP tambe ta hiba e pensamento cu Mike E. y su gang di Alibaba mester bay.
Pero mester tene cuenta si cu ora cu bo sembra maishi, ta maishi bo lo cosecha y bo no por spera patia. Y nos por comprende cu e odio cu Mike E. y su gang a sembra, y ta sembrando contra nos propio hendenan, lo no tin nada otro di cosecha sino e mesun odio.
Y nos no tin di permiti Mike E. haya e oportunidad pa bira martir di e desgracia cu e y su gobierno y su partido ta hincando henter nos pueblo aden.

Sin duda nos di UPP ta kere cu Mike E., como Prome Ministro di e pais aki, a perde tur “nocion di realidad”, ora el a haya ta bon di bay reta esnan cu tabata haciendo uzo di nan derecho democratico di protesta.
E invitacion sigur di Mike E. ta muestra cu tin hopi “bolt” los cerca e persona aki, y Dios gracia cu e manifestantenan a contene nan mes y a evita di bay den e provocacion cu hustamente e video ta mustra cu Mike E. kier a logra.
UPP ta lamenta tambe e manipulacion cu a sigui, particularmente na Tele-Aruba, cu awor ta conta cu director nobo cu sigur tambe ta un mucha manda di e gobierno berde aki.

Na e actuacion di Mike E. nos por a mira un persona sumamente bruha cu kier a comberti e oportunidad den uno na su bentaha, dor di purba bira e victima, mientras cu nos tur sa cu ta e pueblo di Aruba te e victima mas grandi.
Mas askeroso tabata e hecho cu den oranan di merdia riba su Facebook, Mike E. ta haya bon di pone cu su heroe- y idolonan, esta Martin Luther King jr., John F. Kennedy y Robert F. Kennedy, a wordo asesina, pero cu nan soño y nan causa a wordo fortifica pa nan sacrificio. Y cu e tambe lo ta dispuesto pa carga esaki. Esaki sigur ta un muestra di “Locura di Grandeza”, unda cu e ta trata di compara su mes cu personahenan grandi di mundo.

Pero lastimamente si bo analisa e persona di Mike E., su actuacionnan y su palabranan, tin hopi desbalance cu e personanan di peso di nos historia mundial. E hendenan aki por tabata tin soñonan grandi, pero Mike E. su soño, no ta soño di e pueblo aki. Mas bien nos por bisa cu e soño di Mike E. ta e “WORST NIGHTMARE” di e Pueblo aki. Su soño ta pa e bira e homber di “green” den mundo. Su soño ta pa e keda wordo recorda den buki di historia y den Oranjestad cu un estatua, manera cu e presidente di Turkemistan y Sadam Hoessein a laga traha pa nan mes algun tempo pasa.

E causa di Mike E., no ta e causa di Pueblo aki.
Mientras cu Mike E. ta soñando cu Aruba Green, Green corridor, etc., pueblo dia pa dia ta wordo chica, lagando menos den su cartera pa e por come y cria su yiunan. UPP por ilustra esaki cu su “conferencia di Prensa” ultimo, unda cu el a trata di splica con ta para cu e comision cu mester wordo forma pa atende cu apertura di e refineria, manera e mocion unanime di Staten recientemente a exigi di gobierno.
En cambio nos por wak cu el a bira rond, splica con el a bin haya e refineria sera, con na 2010 el a bin cu un "settlement agreement", y con cos no a bay manera mester, PERO..................tin speransa, ya cu Aruba lo bay haya un green corridor, cu lo percura pa un calidad di bida mas halto, cu lo bin un area bunita pa hende cana y jog den dje.
Un coneccion di 4 via, cu lo bay habri posibilidadnan grandi.
Mientras tanto nos pais ta den un decadencia na unda no tin trabou, no tin entrada y poco poco pobreza ta birando mas grandi. Nos clase media tambe poco poco ta disapareciendo.
Esaki ta Aruba su “WORST NIGHTMARE”, loke pa Mike E. ta su soño.

Den un relato anterior nos a mustra caba cu a bira tempo pa Parlamento (lesa AVP) tuma un postura mas pro-Pueblo, envez di e reaccion cu Baba H. a publica, esta uno di confrontacion.
Mester baha Mike E. y lague bay un tratamento, ya cu e ta “ontoerekeningsvatbaar”. Ta solamente asina nos pais y nos Pueblo por wordo salba.
Pero tanten nos Parlamento ta na soño y no ta actuando, e “narcismo” di Mike E. ta cabando cu nos Pueblo.
Rapport di CFT atrobe ta duna nos Parlamento (12 Parlamentario e biaha aki) un "brevet van onvermogen", pero nan ta opta pa sali na defensa di e destructor mas grandi cu nos pais a conoce, esta Mike E, e narcista!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 16, 2015

Expresionnan haci den e articulo aki no necesariamente ta refleha opinion di ArenaPoliti.co