{idkey=2239b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1205-mep-gabinete-eman-a-impone-medidanan-cruel-riba-lomba-di-pueblo-y-p-asina-supuestamente-salba-e-fondonan-social%3FItemid%3D101][title=MEP%3A+Gabinete+Eman+a+impone+medidanan+cruel+riba+lomba+di+pueblo+y+p%E2%80%99asina+supuestamente+salba+e+fondonan+social][desc=No+ta+pasa+un+siman+cu+politiconan+di+AVP+kier+sigui%26amp%3Bnbsp%3B+manipula+mente+di+pueblo+treciendo+padilanti+cu+e+Megadebe+di+4+biyon+florin+crea+pa+Gabinete+Eman+a+ser+inverti+entre+otro+den+e+fondonan+social+di+SVB%2C+APFA+y+AZV.+Constantemente+por+tende+e+politiconan+aki+sclama+cu+ta+danki+na+e+sumanan+miyonario+di+inversion+nan+lo+a+logra+pa+salba+e+fondonan+aki.+Pero+nada+di+esaki+ta+berdad%2C+ya+cu+ta+e+participantenan+di+e+fondonan+aki+mes+mester+a+sacrifica+y+paga+pa+tur+e+medidanan+cu+a+ser+impo]}
No ta pasa un siman cu politiconan di AVP kier sigui  manipula mente di pueblo treciendo padilanti cu e Megadebe di 4 biyon florin crea pa Gabinete Eman a ser inverti entre otro den e fondonan social di SVB, APFA y AZV. Constantemente por tende e politiconan aki sclama cu ta danki na e sumanan miyonario di inversion nan lo a logra pa salba e fondonan aki. Pero nada di esaki ta berdad, ya cu ta e participantenan di e fondonan aki mes mester a sacrifica y paga pa tur e medidanan cu a ser imponi riba nan lomba.

Medidanan den SVB
Pa loke ta e fondonan di SVB, Gabinete Mike Eman durante 5 aña di nan gobernacion a impone e siguiente medidanan riba e participantenan di SVB:
1) A aumenta e prima di AOV cu 1% entrante 1 di januari 2014,  2) A aumenta e prima di AOV cu 1% mas entrante 1 di januari 2015, 3) A individualisa e prima di AOV pa parehanan casa. Consecuentemente e parehanan aki tur aña ta perde di haya un suma di 4000, 5000 y te hasta mas cu 6000 florin di restitucion di AOV, 4) Den forma abrupto a aumenta e edad di pensioen di viehez di 60 te 65 aña. Cu e amento aki un pensionado soltero durante 5 aña ta entrega un suma di Af. 63420,00 y pa parehanan casa nan ta entrega un suma astronomico di Af. 106800,00 den e fondo di SVB.
Sinembargo despues cu Gabinete Eman a suta e participanten di e fondo di SVB cu tur e medidanan menciona, na December 2014 sin ningun tiki di escrupulo nan a exonera nan mes di un debe di 58 miyon florin di prima di AOV cu nan no a traspasa pa SVB. Esaki nos di MEP ta considera ladronicia den optima forma, ya cu e trahadornan ta sangra, mientras cu e gobernantenan ta derocha e primanan ricibi.

Medidanan den APFA
Pa loke ta e fondonan di APFA, Gabinete Eman a impone e siguiente medidanan riba lomba di e participantenan di APFA:
1) Den forma abrupto a aumenta e edad di pensioen di ambtenaarnan te 65 aña. Aki tambe e pensionadonan lo perde di haya un suma substancial di nan pensioen y cual suma lo keda den fondo di APFA, 2) A aplica franchise y middelloonregeling y consecuencia di esey ta cu e participantenan lo haya un reduccion den nan suma di pensioen y cu ta bay directamente den caha di APFA, 3) A reduci e Duurtetoeslag di e ambtenaarnan for di 36.1% te cu 17.7%, consecuentemente ora cu e ambtenaarnan bay cu pensioen nan lo bay sinti un reduccion substancial di nan pensioen y cual suma tambe lo keda den caha di APFA, 4) E franchise a ser aumenta for di 14059 florin te cu 17616 florin y e porcentahe di acumulacion di pensioen a ser baha di 2.15% te cu 1.75%. Pues aki tambe mas placa lo keda den fondo di APFA y e empleado publico cu awe ta entrega mas lo haya menos den futuro.
Cu hopi fanfaria Gabinete Eman recientemente a anuncia cu nan a hinca 170 miyon florin den APFA y p’asina yega na un porcentahe di cobertura di 100%. Pero aki tambe nan kier manipula mente di pueblo, ya cu e suma di 170 miyon florin nan a fia for di e propio APFA y pa APFA hinca esaki bek den su fondo. Finalmente Gabinete Mike Eman a bolbe crea un debe di 170 miyon florin extra cerca APFA y pa cual henter comunidad tin cu paga e debe aki.

Medidanan den AZV
Pa loke ta e fondonan di AZV, Gabinete Eman a impone e siguiente medidanan:
1) A aumenta e prima di AZV cu 1% entrante 1 di januari 2011, 2) A aumenta e BBO cu 1% pa AZV (Health Tax) entrante 1 di december 2014, 3) Lo bay aumenta e BBO cu 1½% pa AZV (Health Tax) entrante 1 di juli 2015, 4) Contribucion popio pa Eerste Hulp, Huisartsenpost y receta boticario ta pendiente pa ser impone.
Asina nos por mira cu finalmente ta e participantenan den SVB, APFA y AZV mes mester sangra te muri debi na e gran cantidad di medidanan cu a ser poni riba nan lomba y p’asina e gobernantenan di AVP gaba tur dia cu ta nan a salba e tres fondonan aki. Alavez locual nan no ta conta pueblo ta cu semper den nan gobernacion, den forma iresponsabel nan no tabata traspasa e fondonan di primanan di AOV, AZV y APFA cu ta ser reteni di e trahadornan, manera por ehempel na 2001 cu nan a laga un debe atras di 270 miyon florin den APFA.
Hecho ta cu no ta ningun arte pa goberna di e forma mediocre aki, esta di crucifica e participantenan cu tur e medidanan y pa despues cana rond y pretende di ta e gran salbadornan di e pais aki. 

Expresionnan haci den e articulo aki no necesariamente ta refleha opinion di ArenaPoliti.co