{idkey=100b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F13-upp-cu-acusacionnan-infunda-e-minister-di-salubridad-kier-tapa-su-incompetencia%3FItemid%3D101][title=UPP%3A+Cu%C2%A0acusacionnan+infunda+e+minister%C2%A0di%C2%A0salubridad%C2%A0kier+tapa%C2%A0su+incompetencia][desc=Sr.+Schwengle+atrobe+ta+den+noticia%2C+y+atrobe+ta+demostra+un+biaha+mas+su+incapacidad+y+su+incompetencia.+Awor+aki%2C+mescos+cu+ela+haci+cu+e+director+di+SABA%2C+e+ta+culpa+e+sindicato+SEPPA+di+ta+%E2%80%9Chunga%E2%80%9D+politica.+Pero+no+tabata+ni+e+sindicato+ni+e+empleadonan+di+laboratorio+cu+a+haci+declaracionnan+inacceptabel+den+un+medio+di+comunicacion+y+cu+ta+sigui+busca+confrontacion+pa+medio+di+corant%3B+Schwengle+mester+haci+su+trabou+debidamente+y+trata+di+yega+na+un+palabracion+cu+e+sindicato+y+su+mie]}

Sr. Schwengle atrobe ta den noticia, y atrobe ta demostra un biaha mas su incapacidad y su incompetencia.

Awor aki, mescos cu ela haci cu e director di SABA, e ta culpa e sindicato SEPPA di ta “hunga” politica. Pero no tabata ni e sindicato ni e empleadonan di laboratorio cu a haci declaracionnan inacceptabel den un medio di comunicacion y cu ta sigui busca confrontacion pa medio di corant; Schwengle mester haci su trabou debidamente y trata di yega na un palabracion cu e sindicato y su miembronan.

Lagami refresca e minister su memoria. Den e periodo cu ami tabata encarga cu salubridad publico, mi a cuminsa deliberacionnan cu e sindicato pa agilisa e proceso di privatisacion di e laboratorio. Mi a logra convence e sindicato cu esaki lo por ta e mihor forma pa garantisa sobrevivencia di e laboratorio. Na ningun momento mi a haña e impresion cu e empleadonan lo no kier a participa den un posibel cambio di structura di e landslaboratorio. Alcontrario e sindicato y empleadonan a demostra desde comienso di e discusion un empeño grandi pa traha riba un solucion permanente y faborabel, no solamente pa e empeadonan, pero principalmente pa e calidad di servicio cu e patient merece y ta exigi. En todo caso hamas tabata e intencion di hinca landslaboratorio den man priva. Intencion tabata pa hacie un NV, pero cu e pueblo como e unico doño!

A palabra cu empleadonan nobo lo wordo tuma den servicio como arbeidscontractant y no como empleado publico, en espera di e structura nobo di laboratorio. Lamentablemente mi mester constata cu e decision aki awor a resulta di ta hopi desbentahoso pa e empleado di laboratorio, pasobra:

1. A reduci nan entrada cu 20%, sin cu a tene cuenta cu e consecuencia cu esaki lo por tin pa e calidad di servicio di e laboratorio. E minister a indica cu e a traha cu alma y cuerpo pa salba trabou di e empleadonan, pero e minister ta lubida di indica cu e ‘medidanan’ lo no tabata necesario si su gobierno no a hiba un maneho financiero desastroso pa locual e como minister a hañé obliga di reduci extra gasto na laboratorio.

2. No por a haci un apelacion pa bin na remarca pa un ‘pensioenregeling’ manera ley ta exigi desde 2011. Aki gobierno di Aruba mes ta duna muestra atrobe di no ta cumpli cu ley, manera si ta exigi di doñonan di trabou den sector priva.

3. Nan credibilidad ta wordo cuestiona door di e actual minister. Ta e minister a declara di no ta satisfecho cu e trabou desplega door di e empleadonan, y a bay hasta asina leu di a lanta acusacionnan infunda riba e forma cu empleadonan supuestamente lo ta ‘usa’ e material di laboratorio.

E minister ta indica den su declaracion na prensa cu ta en espera di atrobe un otro rapport. Awor aki ta trata di un investigacion haci door di AIB. Pero ya caba e minister anterior di salubridad a institui un comision pa conseha e minister riba un cambio di rumbo di e laboratorio. Kiko e minister a haci cu e analysis y e recomendacionnan haci door di e comision aki? A tiré den prullenbak tambe manera a haci cu e nombracion di un Inspecteur di Salubridad Publico ?

Schwengle ta casi un aña encarga cu salubridad, deporte y cuido di nos grandinan, y su unico ‘logro’ ta cu te ainda NO tin un maneho y cu ta haci declaracionnan difamatorio y acusacionnan infunda den direccion di esnan cu sí ta dispuesto pa carga e responsabilidad cu nan trabou ta necesita. Minister Schwengle ta un fracaso como mandatario responsabel pa salubridad, y cada bes cu e habri su boca ta demostra su incapacidad y incompetencia. Hasta Raad van Advies a haci mencion special di e falta di maneho di su ministerio den nan investigacion y recomendacionnan haci pa cu e presupuesto di 2014.

 

Den nomber di Union Patriotico Progresista – U.P.P.

Candelario – Booshi – Wever

Brazil, october 6, 2014

 

Expresionnan haci den e articulo aki no necesariamente ta refleha opinion di ArenaPoliti.co