{idkey=3603b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F207-booshi-wever-upp-un-biaha-mas-mini-minister-schwengle-ta-haya-brevet-van-onvermogen%3FItemid%3D101][title=Booshi+Wever+%28UPP%29%3A+Un+biaha+mas+mini+minister+Schwengle+ta+haya+brevet+van+onvermogen][desc=Den+medionan+di+comunicacion+nos+por+a+tuma+nota+di+un+declaracion+di+nos+mini-minister+di+Salud%2C+na+unda+ta+ser+anuncia+cu+e+decision+kiko+lo+sosode+cu+Landslab%2C+un+biaha+mas+ta+wordo+posponi.+Den+e+declaracion+aki+Alex+S.+ta+laga+sa+cu+e+ta+pospone+e+anuncio+pa+complace+cu+SEPPA%2C+pero+de+facto+su+decision+ta+tuma+caba%3A+Landslab+lo+bay+cay+bow+di+HOH.+Alex+S.+ta+usa+como+argumento+cu+kier+deshaci+di+Landslab%2C+pasobra+e+ta+nifica+un+gasto+pa+gobierno+cu+e+no+ta+dispuesto+pa+sigui+paga.+Alex+S.+]}

Den medionan di comunicacion nos por a tuma nota di un declaracion di nos mini-minister di Salud, na unda ta ser anuncia cu e decision kiko lo sosode cu Landslab, un biaha mas ta wordo posponi. Den e declaracion aki Alex S. ta laga sa cu e ta pospone e anuncio pa complace cu SEPPA, pero de facto su decision ta tuma caba: Landslab lo bay cay bow di HOH.

Alex S. ta usa como argumento cu kier deshaci di Landslab, pasobra e ta nifica un gasto pa gobierno cu e no ta dispuesto pa sigui paga. Alex S. ta lubida di splica pueblo cu Landslab tin derecho di existencia (rapport AIB), pasobra contrario na otro departamentonan di gobierno, Landslab si ta genera basta entrada cu ta ser paga door di AZV. No ta por nada mi persona den pasado a tuma e decision pa haci e landslab un NV di gobierno, pues cu ta pueblo lo ta doño.

Mi a basa mi decision riba un estudio di factibilidad cu a wordo haci e tempo ey, na unda a bin sali na cla cu un landslab bon dirigi y cu cambio den e tarifanan, lo por cubri su gastonan, y tambe lo por bai haci ganashi tambe. Y e ganashi aki lo ta pa e pueblo mes.

Ta kiko a cambia anto den e ultimo 5 añanan, pasobra tur cos tabata bayendo den un bon direccion despues di a redacta un Plan Social hunto cu SEPPA, na unda e interes y derechonan di e empleadonan y e Landslab a keda palabra y bon atendi. Ta kiko a pasa cu henter e ehercicio haci conhuntamente cu e directie y SEPPA?

Un otro cos straño den e declaracion ta cu lo bay pone Landslab bow di HOH. Mi no ta kere cu HOH ta un instituto filantropico cu ta willing pa asumi responsabilidad di acepta un extra gasto di 17 miyon cu Alex S. ta papia di dje. Claro cu no, Landsab TIN derecho di existencia, y p’esey HOH tambe ta hambra pa tume over, esey kizas pa sigui yena saco di e mafiosonan di Miami, of di cierto specialistanan cu ta abusando eyden cu consentimento di e Raad van Toezicht presidi pa sr. Gino Goeloe, cu ta un otro mucha manda di Mike E. E empleadonan di Landslab cu awor tin un bon plan di pensioen, lo bay cay bow di esun di HOH cu nos tur sa cu ta laga masha hopi di desea !!

Un otro aspecto hopi remarcabel ta e hecho cu Alex S. ta declara di lo tene e reunion, apesar cu ya e la tuma su decision caba. E pregunta ta e ora ey si ta di spetakel e ta tuma SEPPA, y si SEPPA ta guli manda bow y bai firma "bij het kruisje". Mas ridiculo e asunto ta bira ora cu nos bin compronde cu e reunion lo tuma lugar, riba peticion di SEPPA, hunto cu Mike E.

Si Alex S. kier play e "tough guy" bisando cu ta E ta tuma e decision, dicon anto a acepta e peticion di SEPPA pa laga Mike E. tambe ta presente den e reunion?
E splicacion ta obvio ya cu desde inicio di e gabinete Mike E. II, Alex S. a profila su mes como e mucha manda di Mike E, y e mester haci loke "his master’s voice" bise pa haci.
E presencia di Mike E. na e reunion mester wordo considera nada mas y nada menos como un brevet van onvermogen directamente manda pa e mini-minister aki. Y awor no solamente den su estatura, pero awor den su accionnan tambe.

Ta di spera cu SEPPA para duro pa e futuro di e Landslab y su empleadonan, y no sucumbi pa e "fleure de bouche" di Mike E. Y no lubida cu e mini-minister lo sigui al pie de la letra loke Mike E ordene pa haci. E miho opcion pa Landslab, su empleadonan y pa Aruba, ta pa haci Landslab un NV di Gobierno, tur otro opcion lo sali desventahoso pa tur esnan involvi.


Den nomber di Union Patriotico Progresista – U.P.P.
Candelario – Booshi – Wever
Brazil, november 12, 2014

Expresionnan haci den e articulo aki no necesariamente ta refleha opinion di ArenaPoliti.co