{idkey=7832b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1369-minister-bermudez-mi-no-por-imagina-cu-lo-tin-dificultad-pa-aplica-e-cambio-aki-den-comercio%3FItemid%3D101][title=Minister+Bermudez%3A+%E2%80%9CMi+no+por+imagina+cu+lo+tin+dificultad+pa+aplica+e+cambio+aki+den+comercio%E2%80%9D][desc=Aumentooficial+di+BAZV+cu+1+%25+y+rebaho+di+Prima+di+AZV+cu+1%25%26amp%3Bnbsp%3B+ORANJESTAD+-+Cu+11+voto+na+fabor+y+5+contra+diabierna+atardi+parlamento+a+aproba+e+concepto+di+ley+pa+trece+cambionan+den+e+prima+di+BAZV+y+AZV.+Di+e+forma+aki+un+otro+faceta+di+e+reforma+financiero+fiscal+a+tuma+luga+di+directo+pa+indirecto.+Minister+Bermudez+ta+splica+cu+den+cambio+aki%2Ce+reduccion+di+e+prima+di+AZV+pa+e+empleadonan+ta+toca+nan+directamente+den+nan+entrada%2C+pues+nan+ta+haya+mas+forsa+di+compra.+Di+otro+banda+e+a]}
Aumentooficial di BAZV cu 1 % y rebaho di Prima di AZV cu 1% 

ORANJESTAD - Cu 11 voto na fabor y 5 contra diabierna atardi parlamento a aproba e concepto di ley pa trece cambionan den e prima di BAZV y AZV. Di e forma aki un otro faceta di e reforma financiero fiscal a tuma luga di directo pa indirecto.

Minister Bermudez ta splica cu den cambio aki,e reduccion di e prima di AZV pa e empleadonan ta toca nan directamente den nan entrada, pues nan ta haya mas forsa di compra. Di otro banda e aumento di e prima di 1% di BAZV ta trece cun’e cu no ta solamente e empleadonan pero tambe tur otro consumidor incluso e turistanan lo contribui via e prima aki di BAZV den e fondo di AZV.

“Esaki kiermen cu bo tin un grupo di contribuyente hopi mas amplio cu solamente e empleadonan cu ta paga e prima aki y p’esey nos a dicidi di haci e cambio aki di baha e prima di AZV pa e empleado y aumenta e BAZV cu 1%”, e mandatario di finanzas a indica.

Pa loke ta trata e fecha di introduccion, Minister Bermudez a splica den parlamento diabierna ultimo cu ora ta trata di un cambio di ley cu no ta beneficioso pa e contribuyentenan, esaki no por haya forsa retroactivo, lo cual ta nifica cu e aumento di BAZV ta drenta na vigor na momento cu e wordo anuncia y despues di confirmacion di Sr. Gobernador, Freddis Refunjol.

Sin embargo e mandatario a informa cu e reduccion di prima di AZV pa empleado si por haya forsa retroactivo paso e ta na beneficio di e trahadonan y p’esey tambe a dicidi di mantene e fecha di, 1 Juli 2015. “Esaki kiermen cu tin tempo suficiente pa adapta e cambionan aki na calculacion di e payroll pa tur comerciante”, Minister Bermudez a expresa.

Na mes momento den e transcurso di e tratamento di ley aki, algun gremio a manifesta nan preocupacionnan como tambe critica pa cu e cambionan aki di cual Minister Bermudez a expresa cu e no ta compronde e oponencia aki ya cu e empleadonan lo gosa di un reduccion di prima di AZV ora cu nan haya nan pago semanal/kinsena/mensual, sin cu esaki mester representa un gasto pa e comerciante.

“Esaki lo duna tur empleado un grado di satisfaccion paso nan ta haya mas forsa di compra sin cu esey tin di costa e doño di trabou of comerciante 1 cen”, e mandatario a bisa.

Minister Bermudez a sigui splica cu den e caso di e aumento di BAZV, esaki ta un ‘heffing’ indirecto, pues e comerciante ta inclui esaki den su prijs, loke ta nifica cu no ta e doño di trabou of comerciante ta page tampoco, pero ta e consumidor ta cumpr’e ora cu e ta cumpra un producto of ora e gosa di un servicio.

Pues basicamente no tin ningun aumento den e carganan pa e comerciante, “solamente cu tur empleadonan lo ta un tiki mas contento ora cu nan mira cu nan ta haya netto, mas cu luna pasa paso nan a haya e reduccion di e prima di AZV”, e mandatario a indica.

Finalmente Minister Bermudez a expresa cu e no ta kere tampoco cu e aki aumento di BAZV por trece problema pa ningun comerciante, pues e mandatario ta sigura cu lo cual un comerciante mester ta hopi bon den dje ta precisamente pa anticipa riba tur cambio, muy en particular pa loke ta trata belasting.

“Mi ta sigur cu ya caba nan ta anticipando riba e cambionan aki cu tabata conoci caba desde dos luna pasa ora cu e la wordo amenda durante e tratamento di nos presupuesto” asina e mandatario di finanzas a confirma.

Minister Bermudez a aclaria tambe cu esaki ta un impuesto cu ta existi basicamente desde 2007, y e BAZV riba su mes ta desde aña sin embargo e tecnica aki ta igual na esun di BBO. “Mi no por imagina mi cu ainda despues di tanto tempo cu lo por tin cualkier comerciante cu un problema pa aplica esaki den su negoshi y administracion”.

Expresionnan haci den e articulo aki no necesariamente ta refleha opinion di ArenaPoliti.co