{idkey=252b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1466-mep-avp-ta-conoci-di-ta-un-partido-cu-ta-discrimina-y-persigui-tur-su-contrincantenan-politico%3FItemid%3D101][title=MEP%3A+AVP+ta+conoci+di+ta+un+partido+cu+ta+discrimina+y+persigui+tur+su+contrincantenan+politico][desc=Ta+tristo+pa+constata+con+un+pais+democratico+manera+Aruba+ya+a+yega+den+un+etapa+di+dictadura+bao+di+regimen+di+Gabinete+Mike+Eman.+Un+regimen+cu+ta+trapa+riba+su+pueblo+y+cu+ta+biba+cu+e+ilusion+cu+nan+lo+no+sali+nunca+mas+for+di+gobierno%2C+lubidando+cu+ningun+dictadura+na+mundo+ta+dura+mil+a%C3%B1a.+Hecho+ta+cu+no+ta+for+di+awor+pero+desde+entrada+di+e+prome+gobierno+di+AVP+na+1986%2C+persecucion+politico+contra+tur+esnan+cu+no+a+vota+pa+AVP+tabata+na+orden+di+dia.+Asina+pues+e+tempo+aya+e+gobierno+]}
Ta tristo pa constata con un pais democratico manera Aruba ya a yega den un etapa di dictadura bao di regimen di Gabinete Mike Eman. Un regimen cu ta trapa riba su pueblo y cu ta biba cu e ilusion cu nan lo no sali nunca mas for di gobierno, lubidando cu ningun dictadura na mundo ta dura mil aña. Hecho ta cu no ta for di awor pero desde entrada di e prome gobierno di AVP na 1986, persecucion politico contra tur esnan cu no a vota pa AVP tabata na orden di dia. Asina pues e tempo aya e gobierno di AVP a kita tur e trahadornan cu tabata traha pa TAV (Tijdelijke Arbeids Voorziening), esta hendenan tabata gana un salario chikito y sin ningun piedad e gobierno aki a kita pan for di boca di criaturanan inocente.

Mas abuso di AVP
Tambe  AVP sin misericordia a jaag riba un gran cantidad di director di departamentonan di gobierno y otro ambtenaarnan, manda nan cas y otronan cu nan no a logra di kita for di trabao, nan a wordo manda den exilio na Hulanda. Te hasta tabata tin un ex-director di Departamento di Asunto Economico cu mester a bay 10 biaha Corte pa bringa su retiro na man di e abusadornan di AVP y cual tur e casonan el a gana y mester a wordo poni bek den su funcion di director. Tur esaki y mas a sosode tempo cu e ruman di Mike Eman, esta Henny Eman tabata Prome Minister di Aruba.

Profesionalnan integro
Sinembargo bao di e regimen di Mike Eman, e practica di persecusion politico a continua ya cu ta un gran cantidad di director y profesionalnan den departamentonan di gobierno a wordo kita malamente for di trabao. Aki mester referi entre otro na e top den Departamento di Finanza y tambe di Departamento di Impuesto cu a wordo persigui y kita for di trabao, ya cu nan como profesional integro a haci nan trabao den forma corecto y por ehempel a manda cobra e refineria Valero e suma miyonario di BBO cu nan debe pueblo. Pero e gobierno desformal y abusado aki no kier pa nos profesionalnan haci nan trabao corectamente y kier impone pa e profesionalnan aki kibra ley y exonera e multinacional di pago di BBO. Tur e profesionalnan aki nunca a demostra nan color politico, pero debi cu nan no ta complace cu e maldad di Gabinete Eman, nan tur a wordo cori for di gobierno.

Mina estado di derecho
No mester lubida tambe con bao di regimen di Mike Eman, un ciudadano humilde cu tabata tin su kiosco den centro di ciudad a wordo persigui politicamente y e gobierno dictatorial manera ladron den anochi a laga basha e kiosco abao. Ora cu e caso aki a yega den Corte, huez a declara cu e gobierno di AVP ta mina y zaag na e pianan di nos estado di derecho, pa no bisa cu e gobierno aki a converti su mes den un regimen dictatorial y facista. Y pa no lubida loke a sosode aña pasa oktober caminda un pueblo indefenso a wordo maltrata y bati riba instrucccion di e regimen Mike Eman. Tur loke a y ta sigui sosode den dictadura aki tin e bendicion total di e lider di fraccion di AVP, Baba Herde cu desde algun aña caba ta papia continuamente di cu e aparato gubernamental mester wordo haci “MEP Proof”, pues tur loke ta personanan cu a vota y/of apoya MEP mester wordo elimina for di gobierno.

Persecusion ta continua
Awor e persecusion politico a culmina contra un candidata riba lista di MEP cu desde algun aña caba ta wordo stroba pa traha y caminda Baba Herde tin e tribilidad pa haci varios pregunta sugestivo na e Minister di Enseñansa pa loke ta e trabaonan cu e profesional aki a desplega desde 2011 te 2015. Tur esaki Baba a haci pa trata na intimida y persigui su contrincante politico.  Hecho ta cu na lugar cu Baba Herde haci pregunta na tur su ministernan encuanto tur e “trabaonan” cu e mas cu 400 coordinadornan ta haci pa gobierno y puntra cu si nan ta na pia di trabao tur dia, awor e kier bay mete cu un profesional den enseñansa cu den forma dinamico ta traha pa nos studiantenan. Locual Baba Herde mester compronde di un bes pa semper ta cu nos no ta bay acepta mas su groserianan y su discriminacion contra MEP. Hecho ta cu bao di gobernacion di MEP (2001-2009) semper su persona a wordo trata cu respet y a wordo laga den tur trankilidad pa traha (?) den ramo di enseñansa y tabata forma parti di tur comision cu tin di haber cu enseñansa. MEP hamas a aplica e formula di “AVP Proof” riba Baba Herde. Pues un suplica ta bay na Baba Herde pa baha for di lomba di MEP, stop cu su discriminacion, stop cu persecucion politico, stop cu su locura di “MEP Proof” y cuminsa haci su trabao drechi como parlamentario di pais Aruba.

Expresionnan haci den e articulo aki no necesariamente ta refleha opinion di ArenaPoliti.co