{idkey=1374b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1507-gabinete-me-ii-riba-invitacion-special-prome-minister-eman-ta-tene-discurso-pa-conseho-di-siguridad-e-organo-mas-halto-di-nacionnan-uni%3FItemid%3D101][title=Gabinete+ME+II%3A+Riba+invitacion+special+Prome+Minister+Eman+ta+tene+discurso+pa+Conseho+di+Siguridad%2C+e+organo+mas+halto+di+Nacionnan+Uni][desc=Sra.+Jocelyne+Croes+%E2%80%9CEsaki+tin+su+refleho+positivo+pa+pais+Aruba%E2%80%9D+ORANJESTAD-+Prome+Minister+Mike+Eman+a+biaha+diaranzon+atardi+pa+New+York+pa+tira+un+discurso+na+e+organo+mas+halto+y+renombra+di+Nacionnan+Uni%2C+cu+ta+e+Conseho+di+Siguridad.+Eman+a+wordo+invita+pa+papia+eynan+representando+Reino+Hulandes.+Un+discurso+pa+Conseho+di+Siguridad+di+Nacionnan+Uni+ta+algo+grandi%2C+di+un+inmenso+prestigio+cu+amplio+dimension.+Premier+Eman%2C+kende+ta+wordo+compa%C3%B1a+pa+su+Raadsadviseur+sra.+Jocelyne+Croe]}
Sra. Jocelyne Croes “Esaki tin su refleho positivo pa pais Aruba”

ORANJESTAD- Prome Minister Mike Eman a biaha diaranzon atardi pa New York pa tira un discurso na e organo mas halto y renombra di Nacionnan Uni, cu ta e Conseho di Siguridad. Eman a wordo invita pa papia eynan representando Reino Hulandes. Un discurso pa Conseho di Siguridad di Nacionnan Uni ta algo grandi, di un inmenso prestigio cu amplio dimension. Premier Eman, kende ta wordo compaña pa su Raadsadviseur sra. Jocelyne Croes, ta papia tambe riba ‘Green Economy’ y ta tene encuentronan bilateral na UN. Sra. Croes a amplia un poco riba e biahe aki y e motibo di e invitacion. “Algo cu sin duda tin su refleho positivo pa pais Aruba”.  

Sra. Jocelyne Croes: “Pa algun tempo caba Aruba a bin ta desaroyando un bon nomber riba tereno di energia renobabel y henter e tema sostenibilidad. Esaki tambe na nivel internacional. Hopi hende no ta para keto na esaki, pero ta algo unico cu 20% di energia di Aruba ta wordo genera door di biento. Banda di esaki tin otro iniciativanan manera esun di energia solar y e ‘waste to energy project’. Loke cu ta resalta den tur esaki ta e vision pa tin un sociedad cu ta basa riba un sentido di equidad y bienestar mas grandi.” Sra. Croes a enfatisa cu internacionalmente e asuntonan aki ta hala atencion y organisacionnan manera Nacionnan Uni y Banco Mundial ta boga e ora pa haci uso di e programanan di desaroyo cu por sirbi pa otro paisnan.

Riba e pregunta kico e impacto di presencia di Premier Eman na Nacionnan tin pa Aruba sra. Croes a subraya cu den e caso aki Aruba ta wordo poni riba un plataforma mundial como ehempel pa otro paisnan con un desaroyo sostenibel por cana. “Esaki ta crea un nomber pa Aruba cu ta atrae no solamente mas turismo, pero tambe mas posibilidad pa inversion internacional. Algo cu semper ta bon pa cualkier pais. Pero mas ainda cu Aruba ta crea un nomber riba su mes y ta crea oportunidad pa otro organisacionnan cu kier traha cu Aruba por establece nan mes aki y coopera cu Aruba pa logra nos metanan.”

E biahe aki di Prome Minister Eman ta algo imponente, sigur si tene na cuenta cu e ta e unico mandatario cu a wordo invita pa representa Reino Hulandes den un di e organisacionnan mas influyente conoci mundialmente. Sra. Croes a bisa cu esaki sin duda ta algo masha remarcabel. “E hecho cu Aruba ta wordo invita ta bin door cu Aruba ta creando un nomber hopi fuerte pa loke ta su esfuersonan riba tereno di energia renobabel.” Sra. Croes a splica cu durante su estadia na Merca Minister President Eman ta bay papia na dos ocasion na UN. “Dilanti di e Conseho di Siguridad di Nacionnan Uni e ta papia riba asuntonan di siguridad cu ta toca islanan chikito (SIDS). E tema ta con paisnan chikito ta wordo afecta door di cambionan climatologico, algo cu ta wordo mira como un asunto di siguridad. Aruba ta un ehempel con para e efectonan cu ta causa e cambionan di clima. E di dos punto cu MinPres lo papia riba dje ta riba siguridad den nos awanan, riba tera y con den Reino hunto nos ta coopera cu wardacosta pa miho siguridad den region. Aruba ta traha cu otro partnernan den region riba e tema di siguridad. Eman lo toca tambe e punto di nos awa en general, di e calidad cu mester ta optimal, pa pesca pero tambe pa e ta di un calidad halto cu nos por use pa bebe. Esakinan ta e puntonan cu lo wordo trece padilanti.”

Sra. Jocelyne Croes a bisa cu Minister President ta bay papia specificamente tambe riba ‘Green Economy’ hunto cu Prome Minister di Maladiven, Samoa y cu e under secretary general di Landlocked Developing Countries y SIDS sr. Acharya. E encuentro aki ta den un otro station di United Nations. Banda di e dos enfokenan importante aki Prome Minister Eman lo tin reunionnan cu esnan di Developing Program cu kier habri un centro na Aruba riba conocimento di energia renobabel y sostenibilidad. Ademas di esaki Eman lo tin varios reunion bilateral. E lo reuni cu Prome Minister di Jamaica, cu e representante permanente di e mision di Haiti y esun di CARICOM na UN. “E reunionnan aki ta pa keda dialoga con mehora e cooperacion den region riba temaman di siguridad, algo hopi bon. Siguridad no ta algo cu ta regarda bo pais so. Pesey mester discuti riba prevencion y un reunion di e nivel aki ta habri caminda pa Aruba por haya solucionnan door di traha hunto cu otro paisnan y tambe organonan internacional manera Nacionnan Uni pa mehora e situacion na nivel internacional, pero cu su efecto directo riba e situacion local”.

Expresionnan haci den e articulo aki no necesariamente ta refleha opinion di ArenaPoliti.co