{idkey=8201b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1506-rene-herde-na-jaime-falconi-nos-ta-stimula-inversion-di-sector-priva%3FItemid%3D101][title=Rene+Herd%C3%A9+na+Jaime+Falconi%3A+Nos+ta+stimula+inversion+di+sector+priva][desc=Sr.+Jaime+Falconi+di+PARA+a+haci+mi+5+pregunta+riba+maneho+di+nos+pais.+Den+tres+articulo+mi+ta+contesta+su+preguntanan.+Ata+aki+preguntanan+3+y+4+y+mi+contestanan.+Pregunta+%23+3Ki+tempo+lo+cuminsa+spaar+300+miyon+tur+a%C3%B1a%3F+Mester+logra+prome+e+independencia+di+crudo+y+esey+segun+plan+di+e+gobierno+lo+mester+ta+na+2020%2C+pues+lo+cuminsa+spaar+anto+despues+di+2020+anto%3FContesta%3A+corecto.+Na+momento+cu+Aruba+ta+genera+100%25+of+mas+di+e+energia+cu+e+mester+for+di+solo%2C+biento+y+awa%2C+e+no+lo+tin+cu+imp]}
Sr. Jaime Falconi di PARA a haci mi 5 pregunta riba maneho di nos pais. Den tres articulo mi ta contesta su preguntanan. Ata aki preguntanan 3 y 4 y mi contestanan.

Pregunta # 3
Ki tempo lo cuminsa spaar 300 miyon tur aña? Mester logra prome e independencia di crudo y esey segun plan di e gobierno lo mester ta na 2020, pues lo cuminsa spaar anto despues di 2020 anto?
Contesta: corecto. Na momento cu Aruba ta genera 100% of mas di e energia cu e mester for di solo, biento y awa, e no lo tin cu importa productonan di petroleo mas. E ora en berdad nos lo spaar tur e placa ey. Pero por haci mas. Awor caba WEB ta spaar hopi caba cu e cambionan den eficiencia di genera awa y coriente. E contribucion di e parke di mulina y panelanan di solo, tambe ta kita e necesidad di importa asina hopi producto di petroleo. Mientras nos genera mas energia di solo y biento, nos ta importa menos y gasta menos na productonan di petroleo. E ta un proceso gradual. Esaki ta e motibonan pakico practicamente tur pais ta inverti den energia renovabel. Aña pasa Dinamarca a yega e punto cu e ta genera mas cu 100% di e energia cu e tin mester for di biento, awa y solo. Loke e genera dimas, e ta bende cu paisnan bisiña. Nos tambe por!

Pregunta # 4
Inversion den energia alternativo ta bastanto caro segun expertonan. Tin fondo pa por inverti den energia alternativo of mester acudi atrobe na proyecto PPP?
Contesta: Tur inversion ta costa placa. E inversionnan pa traha e prome parke di mulina di biento na Vader Piet a bin di inversionistanan priva. E invesionnan pa reapartura di e refineria lo bin di inversionistanan priva. E construccion y renobacion di hotelnan na Aruba a bin di inversionistanan priva. Gobierno ta stimula inversionnan priva den tur sector. Asina no tin cu inverti fondonan publico. Pero tin algun area, manera scolnan, infrastructura na Aruba (waf, aeropuerto, camindanan, edificionan di gobierno, hospital) cu bo no ta haya inversionista priva. Pa e tipo di proyectonan asina gobierno mes mester inverti of crea un "partnership" cu inversionistanan priva pa haci e inversionnan aki. (= Proyectonan PPP) Creasion di un fondo di inversion nobo pa remplasa FDA ta un forma pa crea fondo pa inversionnan di nos mes aki na Aruba, sin mester depende di fiansa for di banconan of di exterior. Esey ta e idea tras di e "Aruba Investment Fund" cu gobierno ta pensa riba dje.
E pregunta no ta si mester inverti. Inversion ta necesario semper. E pregunta no ta tampoco si un inversion ta "pagabel". Tur inversion mester wordo paga. Mes ora of manera un auto of un cas, segun un plan di pago over di algun aña. Aruba nunca a faya den esey. E pregunta cu semper mester haci ta si e inversion ta rendabel. Rendabilidad di un inversion ta bisa si tin sentido pa haci e inversion. Den e caso di e inversionnan grandi cu Aruba a haci den e ultimo añanan, di e renobacion di barionan te na e hospital nobo, e waf nobo, e renobacion di aeropuerto, e construccion di e "Green Corridor", e "Avenida Watty Vos" y e inversionnan den energia renovabel, tur sin excepcion ta sumamente rendabel. Nan ta aumenta eficiencia, reduci gasto of aumenta entrada di placa pa Aruba. Nan ta crea oportunidadnan economico nobo of ta mehora calidad y seguridad di bida di nos hendenan. E inversionnan cu gobierno di AVP a haci den ultimo seis aña y mey ta cumpli cu e criterio essencial aki. Pesey nan ta bon pa Aruba!

Expresionnan haci den e articulo aki no necesariamente ta refleha opinion di ArenaPoliti.co