{idkey=3573b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1489-reaccion-di-ciudadano-jaime-falconi-na-sr-rene-herde-aruba-ta-wordo-cuestiona-awendia-pa-falta-di-transparencia-y-accountability%3FItemid%3D101][title=Reaccion+di+ciudadano+Jaime+Falconi+na+sr.+Rene+Herd%C3%A9%3A+Aruba+ta+wordo+cuestiona+awendia+pa+falta+di+transparencia+y+accountability][desc=Dia+20+di+juli+2015+sr.+Jaime+Falconi+a+haci+cinco+pregunta+riba+su+Facebook+personal%2C+dirigi+na+parlamentario+Rene+Herd%C3%A9+%28AVP%29.+Ayera+%2826+di+juli%29+sr.+Herd%C3%A9+a+contesta+e+prome+dos+preguntanan+di+sr.+Falconi.Preguntanan+di+sr.+Falconi%3A+Segun+e+definicion+di+United+Nations+%28Brundtland+1987%29+sostenibilidad+tambe+ta+nifica+cu+inversion+awor+no+mag+di+perhudica+e+siguiente+generacion.+E+debe+nacional+actual+lo+endueda+nos+siguiente+generacion+en+gran+forma.+Esey+ta+permisibel%3F+Klik+aki+pa+lesa+e+]}
Dia 20 di juli 2015 sr. Jaime Falconi a haci cinco pregunta riba su Facebook personal, dirigi na parlamentario Rene Herdé (AVP). Ayera (26 di juli) sr. Herdé a contesta e prome dos preguntanan di sr. Falconi.

Preguntanan di sr. Falconi:

1. Segun e definicion di United Nations (Brundtland 1987) sostenibilidad tambe ta nifica cu inversion awor no mag di perhudica e siguiente generacion. E debe nacional actual lo endueda nos siguiente generacion en gran forma. Esey ta permisibel? Klik aki pa lesa e contesta di sr. Herdé riba e pregunta aki.
2. AVP ta na fabor pa cambia e forma cu nos ta genera energia na Aruba. Enbez di uza productonan di petroleo, AVP kier uza energia di solo, biento, awa, etc. Sr. Herde por splica dicon anto ta apoya un posibel reapertura di refineria? Klik aki pa lesa e contesta di sr. Herdé riba e pregunta aki.
3. Ki tempo lo cuminsa spaar 300 miyon tur aña? Mester logra prome e independencia di crudo y esey segun e plan di e gobierno lo mester ta na 2020, pues lo cuminsa spaar anto despues di 2020 anto? Klik aki pa lesa e contesta di sr. Herdé riba e pregunta aki.
   
4. Inversion den energia alternativo ta bastanto caro segun expertonan.Tin fondo pa por inverti den energia alternativo of mester acudi atrobe na proyecto PPP? Klik aki pa lesa e contesta di sr. Herdé riba e pregunta aki.
   
5. "Groeien y no snoeien" ta e maneho di gobierno cu a acelera un aumento barbaro di e debe nacional. Segun sr. Herde "esey no ta e unico cos cu ta conta. E calidad di bida, mas hende cu trabao, cuido di salud pagabel pa tur hende, entradanan mas sigur pa trahado y pensionado, miho oportunidad pa habri negoshi y haci ganashi, oportunidadnan nobo pa hobennan". Kende a beneficia anto di e cambionan manera menciona door di sr. Herde. Prijs di comestibel a subi y tur cos a bira mas caro a base di e medidanan cu a y lo wordo tuma. E forsa di compra en berdad a wordo debolbe na pueblo y comercio? Dicon tanto critica anto di pueblo y comercio? contesta di sr. Herdé: pending

ArenaPoliti.co a ricibi un reaccion di sr. Falconi riba contesta #1 di sr. Herdé:

REACCION DI CIUDADANO JAIME FALCONI NA SR. RENE HERDE: ARUBA TA WORDO CUESTIONA AWENDIA PA FALTA DI TRANSPARENCIA Y ACCOUNTABILITY
Na prome lugar permitimi gradisi sr. Herde pa e forma profesional cu su persona a tuma su tempo pa contesta e preguntanan y duna un splicacion detaya di e maneho di e gobierno di Aruba. Lo mi kier a coregi e forma con sr. Herde a dirigi su mes na mi persona como presidente di PARA. Mi a hasi e preguntanan riba mi Facebook personal como un ciudadano di pais Aruba y na ningun momento como miembro di PARA. Igualmente lagami reitera cu ami no ta presidente di PARA.

Sr. Herde a hasi uso di un comparacion di e suma necesario pa construccion di un cas door di un famia pa splica e base di e inversion hasi door di gobierno pa un tempo largo. E comparacion aki ta en berdad un bon ehempel pa illustra dikon mester ta hopi cauteloso cu inversionan a largo plazo.

Na prome lugar historia a mustra cu mundo a wordo confronta cu un deterioro financiero inespera y a cay subsecuentemente den un recession a base di un mal maneho di banconan cu a otorga hipotecanan irrealistico na famianan sin cu a tene debidamente cuenta si e famianan lo por a paga esaki back. E famia tabata hinca nan mes den un hipoteca demasiado halto a base di falta di un control rigido di parti di e instancianan cu mester a hasi esaki y cu mas bien tabata hasta conseha e famianan pa purba di “reach to the stars” pasobra “the sky is the limit”.
Masha poco enfasis a wordo buta riba “accountability”.

Tur gobierno cu ta wordo eligi democraticamente tin e pregorativo y e derecho pa eherse un maneho cu a wordo delinea durante e campaña electoral y cu a wordo publica den e plan di gobernacion. E gabinete Mike Eman a tuma e decision pa “groeien en niet snoeien” a base di pensamentonan di e.o. sr. Paul Krugman. Loke mi a sinti falta di dje ta un paar di aspectonan manera transparencia y responsabilisacion.

Inverti den economia door di gobiernonan a sosode desde tempo cu e economista John Maynard Keynes a propaga esaki na 1936 y mester bisa cu na diferente pais esaki tabata exitoso manera na Merca y tambe Chile, pero tur economista lo conseha tambe cu ta importante y necesario pa indica di antemano un “plafond” di e gastonan, pasobra aki si no ta conta sin mas cu “the sky is the limit”. Loke a tuma lugar na Aruba ta cu tabata tin un falta di control debido y tambe falta di transparencia den e gastonan y cifranan real.

Na di dos lugar sr Herde ta indica cu e inversionan hasi ta juist den beneficio di e siguiente generacionan, manera e hobencita cu na 1989 cu a bay studia. Durante cu sr. Herde y mi generacion a wordo brinda e oportunidad pa sigui un estudio den exterior e economia di Antias y Aruba tabaya completamente diferente. Nos tabata papia e tempo ey di e refineria LAGO como e prome pilar economico y turismo, un programa di sr. Juancho Yrausquin d.f.m. tambe tabata duna indicacion di un crecemento exponencial. E tempo ey Aruba tabata wordo considera number un of dos den exportacion di koffie, dus Aruba “was booming” y e posibilidad pa sigui estudionan avansa na Hulanda door di un grupo creciente di studiantenan Arubiano tambe a aumenta door di otorgamento di studiebeurs y studieopdracht. Gobierno a inverti den enseñansa mirando e necesidad cu lo surgi den futuro pa profesionalnan riba tur tereno (no solamente turismo) y pasobra por a segura esnan cu a termina nan estudio cu nan lo a haña trabou. Mi tin e impresion cu hopi di esnan cu a sigui nan estudio den exterior en berdad a regresa tambe.

E situacion actual no por wordo compara cu esun di nos tempo. Mi a comprende cu e cifranan di e studiantenan cu ta sigui nan estudio na Hulanda no ta mucho alentador, sigur compara cu esnan cu ta caba nan estudio den regio of Merca y mas lamentable ta cu si nan caba mes no tin oportunidad pa regresa nan pais natal back, lagando nan cu un debe grandi y sin e speransa di por logra di crea un bida cu nan lo a soña cu ne den pasado.
E issue no ta si e gobierno mag di inverti of no, nogmaals esey ta su pregorativo. Den mi concepto e issue ta cu mester indica prioridad den e forma cu inversionan ta tuma lugar a base di cifranan real y tambe a base di un control severo door di Parlamento di Aruba assesora door di e.o. Raad van Advies, Algemene Rekenkamer y tambe SER. Tur esaki a wordo debidamente exponi den e investigacion ehecuta door di WODC riba peticion di gabinete Mike Eman I y cu te ainda tin tur e ingredientanan cu lo garantisa un bon gobernacion.


*ArenaPoliti.co lo sigui publica contestanan di tanto sr. Falconi como di sr. Herdé.

Expresionnan haci den e articulo aki no necesariamente ta refleha opinion di ArenaPoliti.co