{idkey=1681b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1490-reaccion-di-ciudadano-jaime-falconi-na-sr-rene-herde-introduccion-di-energia-renovabel-pa-un-isla-mester-ta-pagabel%3FItemid%3D101][title=Reaccion+di+ciudadano+Jaime+Falconi+na+sr.+Rene+Herd%C3%A9%3A+Introduccion+di+energia+renovabel+pa+un+isla+mester+ta+pagabel][desc=Lo+siguiente+ta+un+reaccion+di+sr.+Jaime+Falconi+riba+e+contesta+cu+sr.+Rene+Herd%C3%A9+a+duna+riba+e+pregunta+aki+di+sr.+Falconi%3A+%26quot%3BAVP+ta+na+fabor+pa+cambia+e+forma+cu+nos+ta+genera+energia+na+Aruba.+Enbez+di+uza+productonan+di+petroleo%2C+AVP+kier+uza+energia+di+solo%2C+biento%2C+awa%2C+etc.+Sr.+Herde+por+splica+dicon+anto+ta+apoya+un+posibel+reapertura+di+refineria%3F%26quot%3BMi+ta+atrobe+gradisi+sr.+Herde+pa+e+forma+profesional+cu+su+persona+a+atende+cu+e+preguntanan+cu+mi+a+hasi.+Den+e+articulo+anterior+a+ser+de]}
Lo siguiente ta un reaccion di sr. Jaime Falconi riba e contesta cu sr. Rene Herdé a duna riba e pregunta aki di sr. Falconi: "AVP ta na fabor pa cambia e forma cu nos ta genera energia na Aruba. Enbez di uza productonan di petroleo, AVP kier uza energia di solo, biento, awa, etc. Sr. Herde por splica dicon anto ta apoya un posibel reapertura di refineria?"


Mi ta atrobe gradisi sr. Herde pa e forma profesional cu su persona a atende cu e preguntanan cu mi a hasi. Den e articulo anterior a ser dedica atencion riba finansas, economia y enseñanza. Awor ta toca turno na un topico bastante importante: uso di petroleo pa genera energia versus e uso di energia renovabel.

Mi ta completamente di acuerdo cu sr. Herde cu e uso di petroleo pa genera energia no ta na beneficio di nos mundo, nos medio-ambiente y sigur no pa nos siguiente generacionan. Reciente Jim Hansen un experto ambientalista hunto cu 16 otro expertonan internacional a presenta un rapport na unda ta adverti mundo riba e consecuencia cu e uso di petroleo lo tin pa nos clima door di e emision di CO2. Mi tin di agrega si cu hopi otro colega di sr. Hansen no ta comparti su opinion.

Un 5 pa 10 aña pasa e discusion pa hasi un cambio gradual di energia genera door di petroleo pa uno renovabel tabata relevante. E terra tabata fertil pa introduci ideanan nobo pa genera energia alternativo, pasobra e tempo ey un scenario a ser presenta na unda supuestamente crudo lo a caba den un tempo cortico y e prijs di crudo tabata bastante halto. Loke tambe a hunga un rol importante ta e desaroyo accelera di ideanan scientifico nobo pa genera energia alternativo. Awendia nos ta ripara cu na diferente parti di mundo mas crudo y gas a wordo descubri loke entre otro a induci cu e prijs di petroleo a baha substancialmente. Esaki tabata tin como consecuencia directo cu inversionan pa sigui realisa y desaroya energia alternativo a bira menos atractivo.

Mi no ta cuestiona e maneho di gobierno pa introduci energia renovabel na Aruba, nogmaals esey ta su pregorativo. Sr. Herde tin razon cu lo yega un tempo cu crudo lo caba y tambe cu mester tene cuenta cu e efectonan negativo di e uso di crudo, pero e pregunta ta si mester introduci energia alternativo den e forma accelera manera ta e plan di e gobierno, si tene na prome lugar na cuenta cu e diferente desaroyonan nobo cu ta tumando lugar mundialmente cu ta mustra cu e prijs di crudo lo no subi di e hopi ey.

Na di dos lugar apesar cu inversion den energia renovabel lo por ta menos atractivo, toch esfuersonan grand ta tumando lugar pa busca formanan mas eficiente y menos costoso pa genera energia alternativo y na di tres lugar mester tene debido cuenta cu e situacion local di nos finansas y economia.

Mi ta comparti e opinion di sr. Herde atrobe cu reapertura di e refineria ta di sumo importancia pa nos Isla. E lo crea trabou di inmediato, pero lagami ta cla den expresa mi opinion cu reapertura di nos refineria no mag di ta un escusa pa stop e introducion di energia renovabel. Al contrario reapertura di e refineria lo brinda e gobierno un oportunidad unico pa gradualmente y di un forma responsabel introduci energia renovabel, mientras cu nos yiunan di tera ta haña e oportunidad di aporta na nan Isla despues di a termina estudionan avansa den exterior, tambe riba tereno tecnico.
Di e manera aki nos ta duna nos enseñansa e mes un chens di loke sr. Herde y ami a haña tempo cu nos a termina nos estudio basico na Aruba.


E articulo aki a trata pregunta #2 di sr. Falconi. Pa lesa pregunta, contesta y reaccion #1, klik riba e siguiente links:

Expresionnan haci den e articulo aki no necesariamente ta refleha opinion di ArenaPoliti.co