{idkey=5984b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1476-rene-herde-avp-sostenebilidad-no-ta-un-proyecto-of-un-accion-so-e-ta-un-forma-di-pensa-y-di-maneha-pais%3FItemid%3D101][title=Rene+Herd%C3%A9+%28AVP%29%3A+Sostenebilidad+no+ta+un+proyecto+of+un+accion+so.+E+ta+un+forma+di+pensa+y+di+maneha+pais][desc=Den+un+articulo+scirbi+den+pura%2C+partido+MEP+a+reacciona+riba+e+articulo+di+sostenebilidad+cu+ami%2C+Rene+Herde%26%23039%3B+a+publica.+Tambe+sr.+Jaime+Falconi%2C+presidente+di+e+organisacion+PARA%2C+a+haci+mi+5+pregunta+%26%23039%3Bpolitico%26%23039%3B+riba+e+tema+aki.+Den+e+articulo+aki+mi+lo+atende+cu+e+reaccion+di+partido+MEP.+Den+un+didos+articulo+lo+mi+contesta+e+preguntanan+di+sr.+Jaime+Falconi+di+PARA.+SOSTENEBILIDADMEP+a+reacciona+manera+un+%26quot%3Bpushi+brabo%26quot%3B+y+a+crea+e+impresion+di+kier+competi+pa+un+corona+di+ken+ta+mas+sostenib]}
Den un articulo scirbi den pura, partido MEP a reacciona riba e articulo di sostenebilidad cu ami, Rene Herde' a publica. Tambe sr. Jaime Falconi, presidente di e organisacion PARA, a haci mi 5 pregunta 'politico' riba e tema aki. Den e articulo aki mi lo atende cu e reaccion di partido MEP. Den un didos articulo lo mi contesta e preguntanan di sr. Jaime Falconi di PARA.

SOSTENEBILIDAD
MEP a reacciona manera un "pushi brabo" y a crea e impresion di kier competi pa un corona di ken ta mas sostenibel. Full fout! Mi critica cu MEP no ta kere den e concepto di sostenebilidad ta pasobra ta MEP mes na mas cu un ocasion a critica e concepto di sostenebilidad abiertamente. Si MEP ta sostene e concepto di sostenebilidad, anto ta bon pa Aruba. No lo mester spera oposicion di MEP den futuro riba proyectonan cu tema aki. E oposicion fuerte di MEP contra e didos parke di mulina a crea sinembargo hopi duda si MEP ta sostene e concepto di sostenebilidad. E argumento principal di MEP contra di e didos parke di mulina tabata cu e mulinanan ta mucho serca di casnan y ta causa enfermedad. E realidad ta cu e mulinanan na Vader Piet (San Nicolas) ta mas serca di casnan na Juana Morto, cu e didos parke di mulina lo ta di casnan na Curimiau y Sero Pela. Tampoco tin niun preuba di cu e mulinanan ta causa enfermedad. Si esey ta e caso, anto MEP mester splica pakico na San Nicolas si ta bon pa pone mulinanan di biento.

MAS CU MEDIO AMBIENTE
E concepto di sostenebilidad ta ensera hopi mas cu sostenebilidad di medio ambiente y energia. E ta ensera tur area di bida den comunidad. E ta ensera balansa y desaroyo sano riba tereno social, economico, salubridad, husticia, enseñansa, etc. Ta pesey AVP ta papia di sostenebilidad di henter nos comunidad. Enbez di papia di esey MEP a scohe pa pone e tema di finansa publico riba mesa. Tambe ta bon! Pasobra e caminda cu MEP a laga Aruba na 2009, cu un economia cu a cay te -15% (negativo = perde 15% di entrada di henter nos pais), desempleo di 12%, decadencia fisico y social, centronan di ciudad bandona y barionan den stof, sigur no por wordo considera  un maneho pa hiba na sostenebilidad. E INVERSIONNAN cu AVP a haci den infrastructura y mas ainda den forsa di compra di specialmente esnan cu entrada mas abao, a percura pa saca nos economia for di e abismo cu MEP a lague aden y pone bek riba un crecemento di 1.5-3% anual. Den bista di MEP, e placa cu AVP a pone bek den cartera di trahadornan di sector publico y sector priva, den cartera di pensionadonan, den salba e fondonan di pensioen y sigura mas cu 20 mil pensionado nan entrada pa futuro, den stabilisa e seguro medico, ta malgastamento di placa. E maneho pa yega na "Presupuestonan Balansa" pa despues cuminsa paga tur e debenan di nos pais, tambe e debenan di gobiernonan di MEP, ta e prome paso pa sostenebilidad financiero. E forma balansa cu AVP a haci esaki ta un stap importante den crea balansa social y sostenebilidad socio-economico a largo plazo.

VISION Y MANEHO
Sostenebilidad ta mas cu un proyecto y hopi palabra. E motibo cu lider di AVP, Mike Eman ta wordo invita pa conferencianan internacional y ta representa Reino Hulandes riba foro internacional, no ta pasobra ela laga pone panelnan di solo dilanti aeropuerto y crea e parke di panel solar mas grandi den Caribe. E no ta tampoco pasobra ela inicia e maneho pa tur hende por pone panel solar riba nan dak di cas y scol y haya placa bek pa energia cu genera pa e red di Elmar. No ta pesey tampoco. E ta wordo considera un lider riba e tema di sostenebilidad, pasobra ela crea un vision realistico, fiha metanan concreto y mustra e caminda pa cana pa un pais chikito manera Aruba yega na e punto di 100% energia renovabel y un comunidad cu un miho balansa socio-economico. E tema di sostenebilidad socio-economico ta un di e retonan mas grandi di mundo pa futuro. E vision di e lider di AVP ta sumamente interesante den esaki. E ta ambicioso pero realisabel. E no ta ensera un proyecto specifico. E ta un proyecto grandi pa un comunidad mas husto y sostenibel a largo plazo. E ta mustra con un pais chikito manera Aruba, por ta "grandi" y innovador.

Expresionnan haci den e articulo aki no necesariamente ta refleha opinion di ArenaPoliti.co