{idkey=694b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1475-prome-minister-mike-eman-e-periodo-aki-ta-uno-di-transicion-y-transformacion%3FItemid%3D101][title=Prome+Minister+Mike+Eman%3A+%E2%80%9CE+periodo+aki+ta+uno+di+transicion+y+transformacion%E2%80%9D][desc=Desaroyo+di+Aruba+ta+den+un+etapa+nobo+di+progreso+cu+Green+Corridor%26amp%3Bnbsp%3BORANJESTAD+%E2%80%93+%E2%80%9COra+wak+bek+den+historia+riba+e+periodo+aki%2C+e+ta+bay+ta+uno+di+transicion+y+transformacion%2C%E2%80%9D+Prome+Minister+Mike+Eman+a+bisa+durante+un+entrevista+cu+el+a+tene+na+final+di+un+bishita%2C+hunto+cu+su+colega+Minister+de+Meza%2C+na+waf+nobo+di+Barcadera+cu+ta+den+fasenan+avansa+di+construccion.+Prome+Minister+Eman+a+bisa+esaki+despues+cu+a+puntr%E2%80%99e+loke+ta+wordo+papia%2C+esta+cu+Green+Corridor+no+mester+bin+awo]}
Desaroyo di Aruba ta den un etapa nobo di progreso cu Green Corridor 

ORANJESTAD – “Ora wak bek den historia riba e periodo aki, e ta bay ta uno di transicion y transformacion,” Prome Minister Mike Eman a bisa durante un entrevista cu el a tene na final di un bishita, hunto cu su colega Minister de Meza, na waf nobo di Barcadera cu ta den fasenan avansa di construccion.

Prome Minister Eman a bisa esaki despues cu a puntr’e loke ta wordo papia, esta cu Green Corridor no mester bin awor. El a splica cu, “na momento cu bo paralisa bo pais, manera cu nos a hay'e na 2009 bo ta haya deterioro, bo ta haya desempleo, bo ta haya falta di perspectiva, bo ta haya situacionnan caminda bo pais no ta competitivo. Nos tabatin un caida den turismo e tempo ey.”

Awendia, segun Prome Minister ta splica, e situacion ta diferente. A percura pa den cuminsamento di su gobernacion na 2009, inverti bek den nos pais pa Aruba por sobresali riba su competencia. “Ayera mi a comparti cu Minister Oduber e prome 6 lunanan di nos cifranan di turismo. Un aumento di 16% den e cantidad di bishitantenan di nos isla cu ta algo sumamente importante pa nos pais. Si nos mira e mercado di Merca, con el a bin ta desaroya, un mercado cu tabata hopi complica cu e crisis. Nos a inverti y a percura pa establece Aruba y bo ta mira un crecemento importante ey nan.”

E inversionnan tur ta riba termino largo. Hopi di nan ta percura pa e producto Aruba keda y sigui keda uno di calidad y por sigui desaroya. Green Corridor ta un proyecto cu ta bay percura pa pariba di brug haya un miho acceso, pero tambe un miho calidad di bida.

Banda di percura pa cuponan di trabou, miho fluho di trafico pa y for di pariba di brug, Green Corridor ta percura tambe pa un embeyecemento entre e careteranan y e casnan for di Pos Chikito, Savaneta, Zeewijk, Brazil, Cura Cabai, Mabon te cu San Nicolas.

Bishitantenan di Aruba ta bisa di ta impresiona cu e desaroyo di e ultimo añanan. Segun Prome Minister ta enfatisa no ta turista so, ta expresa esaki. Arubianonan of famia di Arubianonan den exterior ta keda impresiona ora cu nan wak con Caya grandi a keda of con adecua Linear Park ta tanto como embeyecemento di e producto Aruba y na e mesun momento un incentivo pa movecion saludabel di nos ciudadanonan. E desaroyo na de Vuyst, Village y Carnival Village tambe ta proyectonan cu ta impresiona hopi di nos bishitantenan y ta keda parti di e desaroyo di nos pais.

“Tur e proyectonan aki ta haci cu e calidad di bida pa nos hendenan ta mehora, ta crea trabou hustamente ora cu bo mester di dje, pero mas importante e ta keda un perspectiva economico pa e inversionistanan inverti.”

Relaciona cu Green Corridor, Prome Minister ta enfatisa cu ta importante pa mira cu e responsabilidad no ta uno pa paga den un solo bes, pero bo ta pas'e over di añanan, 20 aña. Di e manera aki, e peso no ta den un solo momento, pero e ta reparti den decadanan.

Esaki ta un proyecto cu pariba di brug tabatin mester di dje for di añanan atras caba. Gobiernonan a bin y gobiernonan a bay y nunca a realisa e proyecto aki, pa falta di boluntad. A planea hopi, a te hasta dun'e nomber di ‘Vierbaansweg pa San Nicolas’, pero na final a ehecut'e. Awe ta asina leu, cu ta haci'e, y financiamento ta basa riba un periodo di 20 aña.

Pariba di brug y particularmente San Nicolas, mester di e proyecto aki pa asina por ta mucho mas accesibel pa entre otro turistanan, pero tambe pa por desaroya e potencial economico di e miho manera cu ta posibel, awor cu e refineria no ta den operacion mas.

Expresionnan haci den e articulo aki no necesariamente ta refleha opinion di ArenaPoliti.co