{idkey=8039b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1511-gabinete-me-ii-prome-minister-mike-eman-den-su-tremendo-discurso-na-conseho-di-seguridad-di-nacionnan-uni-laga-nos-no-lubida-cu-desigualdad-tambe-ta-fomenta-inseguridad%3FItemid%3D101][title=Gabinete+ME+II%3A+Prome+Minister+Mike+Eman+den+su+tremendo+discurso+na+Conseho+di+Seguridad+di+Nacionnan+Uni+%E2%80%9CLaga+nos+no+lubida+cu+desigualdad+tambe+ta+fomenta+inseguridad%E2%80%9D+][desc=ORANJESTAD%2FNEW+YORK-+Prome+Minister+di+Aruba+Mike+Eman+tabatin+e+inmenso+honor+pa+por+a+dirigi+palabra+na+e+Conseho+di+Seguridad+di+Nacionnan+Uni+como+representante+di+Reino+Hulandes.+Pa+e+lider+maximo+di+e+isla+chikito+Aruba+yega+te+asina+pa+tira+un+discurso+pa+e+organo+mas+halto+di+Nacionnan+Uni+ta+algo+cu+sin+duda+amigo+y+enemigo+por+sinti+nan+mes+orguyoso+di+dje.+Un+triunfo+cu+poco+por+bisa+di+a+logra.+Eman+a+papia+riba+seguridad+pa+loke+ta+islanan+SIDS+%28Small+Island+Developing+States%29+di+cu]}
ORANJESTAD/NEW YORK- Prome Minister di Aruba Mike Eman tabatin e inmenso honor pa por a dirigi palabra na e Conseho di Seguridad di Nacionnan Uni como representante di Reino Hulandes. Pa e lider maximo di e isla chikito Aruba yega te asina pa tira un discurso pa e organo mas halto di Nacionnan Uni ta algo cu sin duda amigo y enemigo por sinti nan mes orguyoso di dje. Un triunfo cu poco por bisa di a logra. Eman a papia riba seguridad pa loke ta islanan SIDS (Small Island Developing States) di cua Aruba ta un di nan. Eman a bisa di ta masha honra di por papia den nomber di Reino Hulandes.

E iniciativa pa papiaden UN  riba seguridad di islanan SIDS a bin di New Zeeland cu a dirigi e reunion riba tratamento di retonan pa paz y seguridad.  Eman: “Esaki ta un topico cu tin interes particular den Reino Hulandes, ya cu tres di e cuatro paisnan di Reino - Aruba, Corsou y Sint Maarten ta de facto SIDS”. Eman a remarca cu ta pesey mes cu e ta masha orguyoso cu Reino tin asina un interes grandi den representa e voz di e islanan chikito tanto dentro como pafo di su fronteranan nacional. “Djis imagina boso mes un rato con bida ta den SIDS. E prome imagen cu ta bin den mente ta di un paraiso cu matanan di coco, rondona pa un lama cristalino. Si, Eman a subraya - e imagen aki ta cuadra completamente pa loke ta Aruba, Corsou, Sint Maarten y hopi otro islanan SIDS. Na mes momento ta un hecho cu hasta e habitantenan di paraiso mester deal cu nan parti di retonan serio. Algun reto ta local,  algun regional y otronan global”. Eman a toca den forma breve tres reto y a comparti cu e sala loke ta wordo haci pa enfrenta e retonan aki.

“Na prome lugar, e efectonan di cambionan di clima. E horor con sobrevivi un tormenta tropical extremo no ta un fenomeno desconoci den mi region. Bo sa cu e tormenta ta biniendo y riba cierto isla bo sa tambe cu no tin ceronan halto pa subi. Mientrastanto e lama halto y cycloon ta destruyendo tera, cas y scolnan. Na luna di maart, Pacifico tabata testigo di un tempo devastador y extremo ora cu cycloon Pam a pasa den e region. Cambio di clima ta afecta nos tur, pero esnan cu mas ta confronta e riesgonan grandi ta e islanan den desaroyo y fragil cu tin poco recurso y capacidad. Como parti di Reino Hulandes nos ta reconoce e necesidad pa enforsa e resistencia di e riesgonan aki. Esaki ta un di e razonnan pakico nos ta trahando duro pa yega na un areglo global legal na Paris e aña aki ainda. Reino Hulandes ta organisando su prome conferencia internacional  "Planetary Security: Peace and Cooperation in Times of Climate Change and Global Environmental Challenges" dianan 2 y 3 di november e aña akin a Palacio di Paz na Den Haag. E conferencia aki ta bira un evento anual pa di e forma aki mantene e enfoke creciente riba e topico importante aki”. Den su discurso Eman a subraya cu no ta paisnan grandi so por bringa cambio di clima den forma efectivo, pero cu cada pais con chikito cu e por ta, por contribui den bringa cambio di clima. Aruba, un isla chikito, ta trata na haci e isla independiente di petroleo fosil na 2020 y comparti nos conocimento cu otro paisnan, specialmente SIDS.  Nos ta kere – mescos cu otronan den e lucha aki – cu islanan chikito por fungi como laboratorio pa demonstra con haci e transicion aki.

Eman a splica cu na Aruba ta mira e cambio pa energia renobabel como parti di un vision mas amplio di prosperidad comparti na unda e isla ta tuma pasonan firme pa preserva e ambiente fisico pa siguiente generacionnan cu ta bin, pero nos ta sigura tambe nos prosperidad pa futuro generacionnan y nos ta percura pa nos ambiente social, economico y cultural prospera igual pa tur hende. “Laga nos no lubida cu desigualdad tambe ta fomenta inseguridad”.

Di dos reto cu SIDS ta haya nan mes confronta cu ne ta crimen transnacional. Hopi di islanan SIDS no tin e capacidad pa controla e awanan inmenso cu ta rondona nan. Esaki tin un impacto negativo pa por bringa crimennan transnacional. E menasa di netwerknan criminal cu ta deal den droga y arma por tin efectonan destabilisante. Na Aruba y den e otro partinan di Reino nos ta combati e menasanan aki hunto cu e Dutch Caribbean Coast Guard, cu ta patruya den e awanan di Aruba, Bonaire y Corsou. Pero regionalmente y internacionalmente mester enforsa e cooperacion pa ta mas efectivo.  Esaki ta yuda den reduci crimennan transnacional.

E di tres reto ta cu e falta di capacidad di patruya maritimo por conduci na exploitacion ilicito di recursonan natural, incluyendo piscamento illegal, piscamento cu no ta wordo raporta ni tampoco regula (IUU fishing). Esaki por tin impacto negativo riba e cantidad di pisca den e area. E daño na rifnan di coralnan unico por afecta e bida di habitantenan di SIDS. Ta pesey cu un ‘Sustainable Development Goal on Oceans’ riba su mes ta importante, pasobra e ta busca pa regula e cosecha di pisca y ta pone un fin na sobrepiscamento. Na 2020 piscamento IUU (Illegal, Unreported and Unregulated) cu ta descructivo mester caba. 

Expresionnan haci den e articulo aki no necesariamente ta refleha opinion di ArenaPoliti.co