{idkey=8657b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1560-booshi-wever-upp-cu-un-cara-inocente-manera-di-un-angel-pero-cu-un-alegria-inmenso-den-su-curazon-minister-di-finanzas-ta-anuncia-cu-ta-hinca-aruba-den-mas-debe%3FItemid%3D101][title=Booshi+Wever+%28UPP%29%3A+Cu+un+cara+inocente+manera+di+un+%E2%80%9Cangel%E2%80%9D%2C+pero+cu+un+alegria+inmenso+den+su+curazon%2C+minister+di+finanzas+ta+anuncia+cu+ta+hinca+Aruba+den+mas+debe][desc=Algun+dia+pasa+minister+Benny+Sevinger+a+anuncia+di+a+horca+nos+pueblo+pa+hopi+a%C3%B1a+cu+e+proyecto+di+Green+Corridor+ora+cu+gobierno+a+para+garantia+pa+e+prestamo+di+ODINSA+na+Deutsche+Bank%2C+dunando+otro+prueba+con+ta+sigui+hinca+e+pais+aki+den+mas+debe.+Despues+nos+por+a+mira+con%2C+sin+ningun+clase+di+remordimento%2C+a+otorga+Ringweg+III+na+Mota-Engil+pa+un+suma+di+riba+400+miyon+florin.+Otro+proyecto+cu+pueblo+lo+bay+paga+pa+medio+di+e+famoso+PPP.+Nos+a+bin+compronde+cu+ta+na+DOW+pa+termina+e+Fina]}
Algun dia pasa minister Benny Sevinger a anuncia di a horca nos pueblo pa hopi aña cu e proyecto di Green Corridor ora cu gobierno a para garantia pa e prestamo di ODINSA na Deutsche Bank, dunando otro prueba con ta sigui hinca e pais aki den mas debe.
Despues nos por a mira con, sin ningun clase di remordimento, a otorga Ringweg III na Mota-Engil pa un suma di riba 400 miyon florin. Otro proyecto cu pueblo lo bay paga pa medio di e famoso PPP.
Nos a bin compronde cu ta na DOW pa termina e Financial Closing, pero ya ta premira cu ta bay tin un competencia grandi bou di esnan cu lo ta desea di participa den e financiamento aki, mirando e exito di e financiamento di Green Corridor.

Nos no tin di lubida tampoco e hospital, cu tambe ta bay den casi 1 biyon florin ora cu pueblo caba di paga esaki den 25 aña.
Hasta e ponemento di luznan LED door di ELMAR ta a base di un financiamento di un CIBC di Canada cu tambe ta habri su portanan na Aruba, y cu awor tin un rancamento di siboyo, mirando cu ya tabata tin un consorcio di banco aki na Aruba cu na prome instante a keda di financia e proyecto aki.
Mientras cu e.o. Cft a urgi gobierno pa mira con ta mitiga e gastonan di gobierno y mescos temporisa proyectonan, pa asina reduci e peso financiero di nos debe nacional, nos ta mira cu lo contrario ta sosode y cu ta sigui aumenta gastonan, y tambe ta sigui cu proyectonan cu por tabata tin un paro sikiera temporal.

Nos por a mira un protocol cu a wordo firma riba 2 mei di aña aki, unda tanto Mike E. y Angel B. a compromete cu Hulanda cu via ley, kitando y minando asina e poder di Staten y naturalmente nos autonomia, lo institui un CAft. Hulanda, cu e miras cu e ley di CAft lo pasa prome cu 1 di augustus, na juni a duna OK y permiso na gobierno pa fia placa riba mercado internacional.
Y awor nos por mira cu ta na Suisa tabata tin un “roadshow” unda a bay bende Aruba pa haya prestamo, y a haya Credit Suisse asina leu pa presta Aruba un 130 miyon dollar atrobe.
Esaki Angel B. cu un cara di coco ta bin conta pueblo cu pasobra e presupuesto a wordo aproba, y cu Hulanda, lesa Conseho di Minister di Reino, a duna OK, nan a bay busca un otro fianza riba mercado internacional. E ta considera cu tur esaki ta den cuadro legal, y cu e suma aki equivalente na 296 miyon florin lo yuda Aruba pa e aña aki.
Riba e pregunta kico e ta haciendo como minister di Finanzas pa controla y baha e gastonan, cu cara seco e ta bisa cu esaki ta un challenge ya cu ta tur dia e ta vigila e debe. Esaki sigur ta un otro tuma pueblo haci, pasobra vigila e gastonan, ainda no ta implica cu bo ta bahando esaki. Mas bien nos tur ta vigila e gasto, y unico cos cu nos ta wak cu ta sigui, subi y subi.
Frapante ta tambe di biaha cu Angel B. ta bisa cu mester cobra tambe loke mester cobra, y cu e pagador di belasting mester corda cu e tin un obligacion di paga. Pasobra gobierno mester haya e parti cu ta toke. Esaki ta zona manera e “fair share” di ex-Minister Swaen, cu hopi hende a critica den pasado.

Loke cu UPP tin na informacion, den e mesun rosea cu Minister Angel B. ta anuncia cu na september lo cuminsa splica e reforma fiscal, cu esaki tambe ta bay ta devastador pa e clase media particularmente, cu ta esun cu ta cumpli cu su belasting, pero cu lo bay mira cu mas belasting nan lo paga na final. Esaki pa motibo cu ta bay kita tur e aftrekposten, loke ta haci cu chens pa haya placa bek ta sigui bira menos, mescos cu a sosode ora cu a individualisa e prima di AZV y AOV. Asina esnan cu tin hypotheek, lo no tin chens mas pa desconta e interes p.e. Of bo ta sostene bo yiu cu ta studia, tampoco lo bay ta parti mas di aftrek.

Mientras tanto nos por a scucha e politico cu a resusita, esta Juan David Irausquin, apesar e ta bisa di no ta cu e gobierno aki mas, cu sin mas mester pasa tur e medidanan cu tin proponi. Esey ta su conseho na gobierno y parlamento.
Mirando tur e prestamonan y compromiso financiero cu e gobierno di Aruba den e ultimo dianan aki ta bezig ta hinca Aruba aden, nos di UPP ta puntra na unda nos Banco Central ta keda cu su comentarionan?
Kico ta qouta di debe nacional na e momento aki relaciona cu nos GDP?
Preguntanan cu ningun instancia no ta comenta riba nan, y tur hende parce di ta “Laat de boel maar waaien”.
Aruba y Arubianonan, Quo Vadis?


Den nomber di Union Patriotico Progresista – U.P.P.
Candelario A. S. D. Wever
Brazil, augustus 12, 2015

Expresionnan haci den e articulo aki no necesariamente ta refleha opinion di ArenaPoliti.co