{idkey=1582b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F232-booshi-wever-upp-cobramento-di-serlimar-ta-un-otro-prueba-cu-mike-e-tin-su-prioridadnan-robes-poni%3FItemid%3D101][title=Booshi+Wever+%28UPP%29%3A+Cobramento+di+Serlimar+ta+un+otro+prueba+cu+Mike+E.+tin+su+prioridadnan+robes+poni][desc=For+di+basta+tempo+caba+ta+saliendo+e+noticia+cu+pronto+lo+bay+cuminza+cobra+pa+recohemento+di+desperdicio+di+cas.+Y+den+curso+di+siman+pasa+un+anuncio+oficial+a+sali+cu+entrante+1+di+januari+2015+lo+cuminza+cobra+pa+e+servicio+aki.+Remarcabel+aki+ta+cu+ta+usa+como+argumento+cu+lo+bay+usa+e+ley+di+2005+pa+haci+tal+cobranza.+Den+nos+concepto+esaki+ta+djis+pa+un+biaha+mas+desvia+di+e+atencion+cu+e+Mike+E.+a+desgracia+e+pais+aki+door+di+su+maneho+financiero+desastroso+yena+cu+corupcion.+En+bez+di+c]}

For di basta tempo caba ta saliendo e noticia cu pronto lo bay cuminza cobra pa recohemento di desperdicio di cas. Y den curso di siman pasa un anuncio oficial a sali cu entrante 1 di januari 2015 lo cuminza cobra pa e servicio aki. Remarcabel aki ta cu ta usa como argumento cu lo bay usa e ley di 2005 pa haci tal cobranza. Den nos concepto esaki ta djis pa un biaha mas desvia di e atencion cu e Mike E. a desgracia e pais aki door di su maneho financiero desastroso yena cu corupcion. En bez di carga su responsabilidad gubernamental di un forma responsabel y splica pueblo con pa motibo di a malgasta placa di pueblo den proyectonan innecesario y corupto, awor su gobierno mester bay ehecuta al pie de la letra e recomendacionnan cu CFT a impone riba Mike E., cu e.o. tin como consecuencia cu lo mester cuminza cobra nos pueblo pa e servicio mediocre cu Serlimar ta ofreciendo.

E ley di 2005 en berdad ta crea e posibilidad pa cobra pa e servicio cu Serlimar ta ofrece pa loke ta trata e parti di UTILIDAD cu ta un tarea di gobierno. Ta p'esey den e ley ta stipula cu loke lo por a bay cobra p'e ta, e RECOHEMENTO Y PROCESAMENTO di e desperdicio di cas. Tur otro tareanan cu Serlimar ta ofrece ta for di e fondonan publico general esaki mester wordo paga. Awor nos a bin tuma nota cu pueblo lo mester bay paga pa solamente RECOHEMENTO DI DESPERDICIO, y pa colmo tambe pa e parti di e contratistanan cu ta traha banda di caminda. Un parti di e tarea cu no tin nada di haber cu e pensamento cu "de vervuiler betaalt". E contractonan aki ta cay bow di "verfraaiing" cu mester wordo financia door di e "algemene middelen".
Dus atrobe nos ta riparando cu e gobierno aki no ta haciendo nada pa baha su gastonan, pero mas bien ta "verschuif" su gasto, sea door di privatisa departamentonan of bay cobra pa servicionan cu ta nan responsabilidad y cu mester wordo paga door di placa cu nan ta ricibi di belasting. Ata aki otro prueba cu Mike E. tin su prioridadnan full robes poni. Keda yena saco di e financistanan di su campaña y sigui pone hendenan riba contractnan banda di caminda. Si realmente kier a haci algo pa e pueblo, dicon no ta paga e contratistanan banda di caminda cu fondonan cu ta ser haya di e turistanan. Ta pa nan tambe e contratistanan ta tene nos pais limpi toch? Dicon ta nos pueblo mester paga pa esaki tambe?? Dicon no a haci manera cu mi persona hunto cu ex-colega Swaen a haci, esta SCOHE pa NO cobra. Nos a percura pa aloca placa for di fondonan publico pa financia HENTER e operacion di Serlimar. Ta asina aki ta traha na bienestar di e pueblo.

Un paar di dia prome cu e anuncio di cobramento di parti di Serlimar, a sali un anuncio tambe cu Serlimar ta den deliberacion cu Eco-Tec pa pasa e desperdicio cu Serlimar ta recohe pa Eco-Tec. For di basta tempo caba mi ta alertando e pueblo pa esaki. Despues cu e compania aki a haya un contracto multi-miyonario SIN NINGUN CLASE DI DESTAHO PUBLICO pa bendemento di gas na WEB, y alabes cu pa colmo de los colmos cu WEB MES ta pone y paga pa e tuberia aki (9 miyon florin), ata awor Eco-Tec lo bay haya e desperdicio cu ABO como pueblo lo mester bay paga p'e, GRATIS.
Eco-Tec despues lo bay bende, despues cu a converti e desperdicio aki den gas, na e prijs cu nan tin gana di cobra na WEB. E inversion aki Serlimar tambe lo por a ehecuta y asina genera ganashi cu lo por a wordo usa na bienestar di nos pueblo, y no manera ta e caso awor pa sigui yena saco di e Riconan na Aruba y asina por ta garantisa di sigui probecha di financia pa e campaña caro di e partido di Mike E. E dicho ta alerta nos caba cu pisca ta muri pa su boca, pasobra ta e mesun Mike E. aki a yama e mesun hendenan aki pa corupto. Ta kiko a pasa anto, Mike E a join e hendenan cu ela yama pa corupto?? Cu otro palabra pueblo lo bay paga dobbel pa e recohemento di e desperdicio cu nan ta genera?? Asina mi tambe por haci negoshi.
Ta tristo di por constata cu ningun gremio, ni sindical ni comercial, ta bisa nada di e "DEAL" multi-miyonario aki. Pa colmo ata un ex-presidente di ATIA ta hasta elogia con otorgamento di e proyecto aki a tuma lugar.
Ta bisto cu e prioridadnan poni pa Mike E. ta pa sigui derocha placa den proyectonan cu ta yena saco di financistanan, di mafiosonan, y esnan cu ta presta nan mes pa sigui elogia e fechorianan di e gobierno corupto aki. Mira cuanto medida ta wordo tuma, y loke falta ainda pa wordo implementa, y tur esaki pa motibo di derochamento di placa e ultimo 5 añanan. Loke ta haci e situacion mas pio ainda ta e hecho cu Mike E, banda di ta masacra nos pueblo cu medidanan, ta traiciona nos pueblo y su lucha pa ta baas den su mesun cas, cu e acuerdo di 3 di juli 2014 na unda Mike E. MES a invita CFT bin haci un investigacion den nos asuntonan puramente interno, esta nos finanzas publico. Y pa colmo ata e mesun traidor aki, ta bisa tambe cu CFT A BIN PA KEDA!!
A bira tempo pa tur gremionan, particularmente e sindicatonan, stop di grita y subi caya y exigi pa e gobierno aki baha y conhuntamente pone un gobierno transitorio pa un tempo defini, introduci leynan pa garantiza cu Aruba lo wordo goberna basa riba reglanan di "GOOD GOVERNANCE" y sin cu mester di intervencion di ningun hende of organo di pafo. Y dentro di un 6 luna yama eleccion nobo, basa riba e leynan nobo, pa pueblo huzga na un manera liber sin campañanan miyonario, pero basa riba programanan realistico y realisabel.
Y no lubida; "TA E PUEBLO SO POR SALBA E PUEBLO!"

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, november 17, 2014

 

Expresionnan haci den e articulo aki no necesariamente ta refleha opinion di ArenaPoliti.co