{idkey=402b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1659-parlamentario-mr-xiomara-maduro-minister-eman-ta-entrega-e-lucha-di-e-pueblo-aki-pa-biba-liber-y-dicidi-pa-nos-mes%3FItemid%3D101][title=Parlamentario+mr.+Xiomara+Maduro%3A+Minister+Eman+ta+entrega+e+lucha+di+e+Pueblo+aki+pa+biba+liber+y+dicidi+pa+nos+mes][desc=Siman+pasa+e+mayoria+den+Parlamento+di+Aruba+a+bay+di+acuerdo+pa+cu+e+ley+pa+oficialisa+e+supervision+financiero+di+CFT+pa+Aruba.+Di+e+manera+aki+AVP+a+entrega+e+derecho+di+nos+Pais+pa+dicidi+pa+nos+mes+riba+nos+mesun+cartera+ya+cu+awor+ta+Hulanda+cu+CFT+lo+tin+e+palabra+final+pa+cada+florin+cu+wordo+gasta+na+nos+Pais.+E+ta+un+berguensa+cu+mal+gobernacion+di+Gabinete+Eman+a+yega+te+na+e+extremo+unda+cu+Minister+Eman+ta+entrega+e+lucha+di+e+Pueblo+aki+pa+biba+liber+y+dicidi+pa+nos+mes.Debe+ta+kit]}
Siman pasa e mayoria den Parlamento di Aruba a bay di acuerdo pa cu e ley pa oficialisa e supervision financiero di CFT pa Aruba. Di e manera aki AVP a entrega e derecho di nos Pais pa dicidi pa nos mes riba nos mesun cartera ya cu awor ta Hulanda cu CFT lo tin e palabra final pa cada florin cu wordo gasta na nos Pais. E ta un berguensa cu mal gobernacion di Gabinete Eman a yega te na e extremo unda cu Minister Eman ta entrega e lucha di e Pueblo aki pa biba liber y dicidi pa nos mes.

Debe ta kita libertad di un Pais
E ta condenabel cu Minister Eman den menos di 5 aña di gobernacion ta redobla un debe cu nos Pais a acomula den 23 aña di tempo. Cu un debe cu ta core den 4 mil miyon florin pa un Pais cu un economia dependiendo solamente riba turismo manera esun di Aruba, e ta un situacion penoso. Un debe asina halto ta trece cune cu e Pais ta wordo corta den su libertad, ya cu bo ta bira dependiente di esnan cu bo debe. Ya caba gastonan di interes ta core den 200 miyon florin riba un presupuesto cu ta core den 1 mil miyon. Esaki ta un peso grandisimo cu ta pone cu no ta resta suficiente fondo pa por inverti den salubridad, educacion y seguridad di nos Pais. Si bo economia no ta lora pa trece placa den caha di gobierno, ta e Pueblo ta wordo castiga cu mas medida pa asina por yega na fondo pa paga debe. Ta tristo cu despues cu e Pais aki pa largo tempo a conoce un finanzas publico cu un debe manehabel na unda di cada florin 40 cent ta bay pa paga debe, a yega te na e extremo na unda di cada florin mas di 80 cent ta bay pa paga debe na man di Gabinete Eman. Cu su maneho iresponsabel, Minister Eman enves di libera nos, a haci nos Pueblo catibo di esnan cu nos debe.

Nos no ta baas mas den nos mes cas
Desde cu Minister Eman a yega na mando e ta corda Pueblo con su antepasadonan a inicia e lucha pa nos por ta ‘baas den nos mesun cas’ pa asina nos por haya e autonomia pa dicidi riba nos mesun destino. Tur hende por corda ainda con Minister Eman a bay den welga di hamber bisando cu e ta dispuesto pa duna su bida pa conserva nos autonomia ya cu e supervicion financiero di CFT ta kita nos derecho di dicidi pa nos mes. Anto awe cu cara seco Minister Eman mes a entrega e autonomia aki den teblachi bek na Hulanda. Esta un berguensa! Cu esaki Minister Eman a traiciona e lucha di Betico Croes y di tur e homber y muhernan balente cu a lucha pa awe nos por tabata tin e libertad pa dicidi pa nos mes den nos mesun cas. E ta di condena cu Minister Eman debi na su mal maneho a pone cu e Pueblo aki ya no ta baas mas den su mesun cas.

Traicion
E hecho cu Minister Eman cu su mal maneho financiero a hiba nos na e extremo cu ta endueda nos grandemente y ta entrega autonomia di nos Pais pa dicidi den nos mesun cartera, ta nada mas cu un acto di traicion cu lo keda graba den historia y mente di e Pais aki.

30 augustus 2015

Expresionnan haci den e articulo aki no necesariamente ta refleha opinion di ArenaPoliti.co