{idkey=8368b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1739-parlamentario-mr-xiomara-maduro-indicadornan-di-economia-no-ta-dunando-un-senal-positivo%3FItemid%3D101][title=Parlamentario+mr.+Xiomara+Maduro%3A+Indicadornan+di+economia+no+ta+dunando+un+se%C3%B1al+positivo][desc=Siman+pasa+nos+a+reuni+cu+Banco+Central+pa+haya+un+bista+di+e+economia+di+nos+Pais+basa+riba+e+indicadornan+di+consumo%2C+inversion%2C+exportacion+y+importacion.+Mester+bisa+cu+e+indicadornan+ta+duna+se%C3%B1al+cu+no+ta+positivo+pa+nos+economia.Consumidor+no+tin+confiansaE+consumidor+su+confiansa+ta+hopi+abou.+Hopi+tin+miedo+pa+haci+inversionnan+grandi+pa+motibo+di+falta+di+confiansa.+Na+2014+cu+tur+e+problemanan+cu+a+surgi+cu+Hulanda+a+pone+cu+e+confiansa+di+e+consumidor+a+bay+perdi.+Y+awor+na+2015+cu+]}
Siman pasa nos a reuni cu Banco Central pa haya un bista di e economia di nos Pais basa riba e indicadornan di consumo, inversion, exportacion y importacion. Mester bisa cu e indicadornan ta duna señal cu no ta positivo pa nos economia.

Consumidor no tin confiansa
E consumidor su confiansa ta hopi abou. Hopi tin miedo pa haci inversionnan grandi pa motibo di falta di confiansa. Na 2014 cu tur e problemanan cu a surgi cu Hulanda a pone cu e confiansa di e consumidor a bay perdi. Y awor na 2015 cu e incertidumbre cu ta reina rond di e medidanan ta pone cu e confiansa di e consumidor ta na e nivel ‘lowest ever,’ segun Banco Central. E falta di confiansa aki ta pone cu no tin consumo suficiente pa engrandese nos economia.

Mas consumo di coriente y gas
E cifranan ta mustra cu tin mas consumo di coriente y gas. Banco ta relata e consumo di mas grandi di coriente na e hecho cu hopi turista awor ta kedando na cas y esaki ta pone cu tin un subida di e consumo di coriente. Pa locual ta e subida di consumo di gas, Banco ta kere cu esaki ta debi cu awor hopi hende ta cushina na cas pa bende cuminda y e negoshi aki ta keda refleha den e consumo mas grandi di gas na e casnan. Esaki ta indicacion cu hotelnan y restaurantnan ta perde benta, locual por pone cupo di trabou na peliger y tranca nos economia.

Mas container pero menos invoerrechten
Banco ta haya remarcabel cu e cantidad di container cu ta wordo importa ta subi pero cu e entrada di invoerrechten pa gobierno no ta refleha esaki. No tin un splicacion valido ainda pa esaki pero segun Banco kizas esaki ta debi na importacion di producto mas barata, of cu falta control debido of tin tardansa ora di saca container for di waf. Un investigacion mester brinda claridad riba esaki pasobra kizas tin un economia informal ta creciendo cu ta afecta e economia formal di nos Pais door di perdida di entrada pa gobierno y competencia inhusto pa esnan cu si ta opera legalmente.

Menos importacion di cuminda y cement
Dos indicador cu sigur ta hala atencion ta esnan di importacion di cuminda y cement. Tur dos a baha considerablemente. Nos Pais a haya mas bishita di turista y bo lo spera cu tin mas importacion di cuminda. Pero segun Banco e importacion di cuminda a baha drasticamente. Esaki ta un senial cu e turista cu nos Pais ta recibi no ta gasta manera bo lo ta spera di nan. Mescos ta conta pa importacion di cement. Na unda cu gobierno a anuncia proyectonan grandi, lo bo a spera cu e importacion di cement lo ta refleha esaki, pero esaki no ta asina ya cu e importacion di cement a cay hopi. Esaki ta trece duda den e ehecucion di e proyectonan cu ta andando cu kizas ta sufriendo retrasonan cu nan turno ta afecta nos economia tambe.


8 september 2015

Expresionnan haci den e articulo aki no necesariamente ta refleha opinion di ArenaPoliti.co