{idkey=7846b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1935-lider-honorario-nelson-oduber-durante-congreso-2015-ora-avp-goberna-nan-ta-laga-pata-pata-di-debe-y-aruba-na-werki-anto-mep-tin-cu-bin-pa-ruim-op-de-boel-parti-2%3FItemid%3D101][title=Lider+honorario+Nelson+Oduber+%28MEP%29+durante+Congreso+2015%3A+%E2%80%9COra+AVP+goberna+nan+ta+laga+pata+pata+di+debe+y+Aruba+na+werki%2C+anto+MEP+tin+cu+bin+pa+ruim+op+de+boel%E2%80%9D+%28Parti+2%29][desc=Lider+honorario%2C+sr.+Nelson+Oduber+den+su+discurso+durante+Congreso+2015+di+MEP+a+elabora+riba+e+lema+y+programa+di+campa%C3%B1a+pa+eleccion+1989%2C+esta+%E2%80%9CUn+futuro+briyante+pa+un+y+tur%E2%80%9D.Aki+el%E2%80%99a+mustra+riba+e+similaridad+cu+e+lema+actual+%E2%80%9CSolo+ta+sali+pa+nos+tur%E2%80%9D+y+cu+mester+mira+esaki+den+contexto+cu+ora+MEP+goberna%2C+Solo+ta+sali+pa+un+y+tur%2C+pero+ora+otro+goberna+ta+pa+previlegiado%2C+pa+family%2C+friends+and+lovers.+Nel+a+trece+padilanti+cu+den+e+periodo+di+Gabinete+Eman+1+%281986-1988%29+Aruba+]}
Lider honorario, sr. Nelson Oduber den su discurso durante Congreso 2015 di MEP a elabora riba e lema y programa di campaña pa eleccion 1989, esta “Un futuro briyante pa un y tur”.
Aki el’a mustra riba e similaridad cu e lema actual “Solo ta sali pa nos tur” y cu mester mira esaki den contexto cu ora MEP goberna, Solo ta sali pa un y tur, pero ora otro goberna ta pa previlegiado, pa family, friends and lovers. Nel a trece padilanti cu den e periodo di Gabinete Eman 1 (1986-1988) Aruba a conoce Mafianan Italiano, garantianan y debenan astronomico. Tin partido politico, ora nan goberna nan ta laga pata pata di debe y Aruba na werki, anto MEP tin cu bin pa ruim op de boel, pa despues nan bisa pa no vota pa MEP pasobra MEP ta un partido di medida.

MEP no ta goberna pa awe so
MEP no ta un partido di medida, pero nos ta un partido di hendenan responsabel. Ora nos goberna, nos no ta goberna pa awe so, nos ta goberna pa mayan y despues, pa e Aruba cu nos tin cu laga, si nos bay for di gobierno, cu nos a laga Aruba den un bon direccion, un Aruba cu un credibilidad financiero cu un desaroyo unda tin trabao y unda cu tin felicidad pa e pueblo. Solo mester sali pa un y tur, ya cu Aruba no ta di un grupo so cu a gana eleccion y tampoco di medionan comprometi cu ta yuda manipula pueblo. Enfaticamente Nel a mustra riba e hecho cu bo no por manipula y gaña y p’asina gana eleccion y unabes den gobierno bo ta haci y deshaci. Un pais mester wordo organisa y bon administra. Un pais su gobernacion no ta diferente di un famia. Bo no por haci y deshaci cu e pais. E no ta di bo, e ta di nos tur.

Elogio pa gobiernonan di MEP
Mas aleu Nel Oduber a elabora riba e 4 gobiernonan cu el’a guia. Tur e indicadornan economico, tur e rapportnan di IMF, Fitch, Standard & Poor’s a duna elogio so pa locual MEP a haci pa e pais aki. Tambe Nel a amplia riba e relacion cu Hulanda. Entre otro MEP mester a lucha pa haya e 250 miyon florin di Plant N.V. ya cu Hulanda kier a keda cu e placa aki. Ora MEP ta den gobierno, nos por tin friccion y discusion cu Hulanda, a base di argumento. Pero hamas gobiernonan di MEP a haya supervison manera cu tin awor aki. Ta bisto pa un y tur cu nos a yega den un situacion cu bo tin actualmente un gobierno bao curatela, un gobierno dirigi door di CAFT y Hulanda.

Aclamacion como lider di MEP
Den e ultimo parti di su discurso Nel a papia riba e cualidadnan di nos lider sra. Evelyn Wever-Croes. Nel tabata enfatico y a bisa cu nos mester duna nos lider actual un continuidad. Y no un continuidad sin mas, pero pa su integridad hopi halto, pa su inteligencia, pa su perseverancia, pa un hende cu organisatoriamente ta hopi bon forma y por haci e trabao. MEP no ta un partido di dinastia, ni di ningun famia. Nos ta un partido cu a base di un democracia, un structura nos ta eligi y reeligi nos lider. Dilanti henter e publico presente cu tabata sumamente entusiasma, Nel a propone sra. Evelyn Wever-Croes como lider di MEP, mirando e bunita trabaonan den un tempo dificil y cu tur e problemanan cu e pais aki tin, e debenan, e refineria cera, presupuestonan cu deficitnan hamas bisto den historia, un Banco Central morto na soño y un pais cu ta den un situacion hopi dificil, cu nos mester por confia un hende cu a duna su ultimo 4 añanan na e partido, pa tene e partido mas tanto posibel hunto pa nos por wak como partido den e mesun direccion. Cu tin retonan financiero, economico, social, di structura estatal y criminalidad ta un hecho. Ta increibel pa bo mira un pais cu no tin helicopter cu ta bula riba bo cas mas, cu no tin visibility team mas pa cuida nos turistanan y nos hendenan, cu no tin radar mas y cu bo por drenta sali manera bo kier. E pais a bira un bananenrepubliek, kico bo kier bo ta haci, pasobra no tin ordo mas. Finalmente Nel a declara: “Si bo kier un pais cu ordo, si bo kier un pais cu hendenan responsabel, si bo kier un pais berdaderamente goberna den forma democratico, anto bo mester duna hendenan cu tin e ingredientenan cu por asumi responsabilidad y hiba nos pais den e bon direccion”. Cu aplauso y gritonan di alegria e multitud presente a lanta para y pa medio di aclamacion a aproba e proposicion di sr. Nelson Oduber pa sra. Evelyn Wever-Croes guia partido MEP pa otro cuater aña mas.

Expresionnan haci den e articulo aki no necesariamente ta refleha opinion di ArenaPoliti.co