{idkey=9428b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1982-rene-herde-avp-ignorancia-ta-peligroso-ignorancia-pa-motibo-politico-ta-pio%3FItemid%3D101][title=Rene+Herd%C3%A9+%28AVP%29%3A+Ignorancia+ta+peligroso.+Ignorancia+pa+motibo+politico+ta+pio][desc=MEP+y+PDR+ta+sigui+nenga+berdad+pa+convinencia+partidista%26amp%3Bnbsp%3BUn+a%C3%B1a+y+dos+luna+a+pasa+desde+cu+gobierno+Hulandes+a+scohe+concientemente+pa+viola+leynan+di+Reino+y+di+Aruba+pa+mete+den+asuntonan+interno+y+autonomo+di+Aruba.+Desde+prome+momento+expertonan+legal+di+tur+pais+di+Reino+a+mustra+cu+loke+Hulanda+a+haci+ta+ilegal.+Den+e+a%C3%B1a+cu+a+pasa+Conseho+Consultativo+%28Raad+van+Advies%29+di+Aruba%2C+di+Corsow+y+di+Sint+Maarten%2C+los+di+otro+a+yega+na+mes+un+conclusion%3A+e+%26%23039%3BKB%26%23039%3B+cu+gobierno+Hulandes+a+pon]}
MEP y PDR ta sigui nenga berdad pa convinencia partidista 

Un aña y dos luna a pasa desde cu gobierno Hulandes a scohe concientemente pa viola leynan di Reino y di Aruba pa mete den asuntonan interno y autonomo di Aruba. Desde prome momento expertonan legal di tur pais di Reino a mustra cu loke Hulanda a haci ta ilegal. Den e aña cu a pasa Conseho Consultativo (Raad van Advies) di Aruba, di Corsow y di Sint Maarten, los di otro a yega na mes un conclusion: e 'KB' cu gobierno Hulandes a pone riba gobernador di Aruba pa wanta e presupuesto ta ilegal. Un aña mas laat - despues di a stroba concientemente un peticion di Parlamento Hulandes pa Raad van State haci un analisis y duna un conseho riba legalidad di e 'KB' - Raad van State ta yega na e conclusionnan indiscutibel aki: 1. gobierno Hulandes a viola Statuto di Reino, Constitucion di Aruba y Reglamento di Orden di Gobernador di Aruba; 2. Gobierno Hulandes a duna instruccion na gobernador di Aruba cu no tabata permiti. Gobernador ta autonomo y no un extencion di gobierno Hulandes; 3. 'KB' ta illegal.

IGNORANCIA POLITICO
Enbez di tuma na serio e violacion sistematico y conciente di ley y reglamentonan cu ta rigi nos paisnan di Reino, partidonan MEP y PDR a scohe pa sera wowo y ignora e violacionnan grave di e fundeshi legal di nos pais. PDR y MEP na prome instancia a defende e KB como legal y husto. Despues nan a declara cu no mester wak e violacionnan di ley aki. Un aña despues MEP y PDR ta declara cu tur esaki a pasa caba y e violacionnan flagrante di Statuto, Constitucion y Reglamento di Orden di Gobernador di Aruba no ta importante. Netamente e abogadonan di e dos partidonan aki cu tanto ta papia di derecho, ilegalidad, violacion di ley, autonomia y abuso di poder, ta scohe pa ignora e violacion di derecho ancra den leynan di Reino y di nos pais. Nan ta sostene violacion di e autonomia interno di nos pais den Reino y e violacion di e posicion autonomo di Gobernador di Aruba. Netamente e lidernan di MEP y PDR cu como abogado tin cu traha cu veredicto y analysisnan legal pa defende nan clientenan, ta nenga di reconoce y haci bon uso di esakinan awor. Anto netamente ora ta trata di interes vital di nos pais. Loke nan ta haci no ta djis expresa un punto di bista riba un asunto legal comun. Esaki no ta djis vota contra di mocionnan den parlamento pa defende autonomia di nos pais, pa defende e posicion autonomo di Parlamento di Aruba pa dicidi riba presupuesto y pa defende e posicion autonomo di Gobernador di Aruba, pa niun Gobierno di Hulanda kere cu nan por hunga cun'e. Ta tristo cu e abogado y lidernan di MEP y PDR ta nenga di uza e analysis legal di Raad van Advies y Raad van State pa haci loke como abogado bo mester haci: defende cu alma y cuerpo e interes di bo cliente cu e constitucion, leynan, analysis y  veredictonan legal cu tin. Den e caso aki e cliente ta bo pais y e posicion di gobernador! Loke nan ta haci ta pio ainda. Nan ta scohe pa no haci loke politiconan responsabel ta haci: nan ta nenga di defende nan pais pasobra nan ta kere cu ta conveni nan pa bringa AVP enbez di defende Aruba. E ignorancia conciente di e realidad pa motibonan politico partidista ta un peligro grandi pa nos pais. Specialmente ora e ta bin di asina yama "lidernan politico"!

Expresionnan haci den e articulo aki no necesariamente ta refleha opinion di ArenaPoliti.co