{idkey=7877b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2049-mep-insiguridad-na-aruba-tin-nos-pueblo-kibra%3FItemid%3D101][title=MEP%3A+Insiguridad+na+Aruba+tin+nos+pueblo+kibra][desc=MEP+NO+TIN+CONFIANSA+DEN+MINISTER+DOWERS+%26amp%3Bnbsp%3BFraccion+di+MEP+un+biaha+mas+ta+condena+cu+e+maneho+y+vision+di+Minister+di+Husticia+Arthur+Dowers+pa+combati+criminalidad+obviamente+ta+fayando.+Lider+di+MEP+a+enfatisa+riba+e+inseguridad+reinando.%E2%80%9CVarios+di+nos+grandinan+ta+biba+na+cas+di+nan+yiunan%2C+y+hopi+famia+ta+bai+traha+laga+nan+grandinan+nan+so+na+cas.+Pero+te+hasta+esey+ta+peligroso+awendia%2C+si+nos+mira+cuanto+anciano+ta+wordo+atraca%2C+ta+wordo+bati%2C+ta+wordo+mara+te+hasta+cu+tape+na+man%2C]}
MEP NO TIN CONFIANSA DEN MINISTER DOWERS  

Fraccion di MEP un biaha mas ta condena cu e maneho y vision di Minister di Husticia Arthur Dowers pa combati criminalidad obviamente ta fayando. Lider di MEP a enfatisa riba e inseguridad reinando.

“Varios di nos grandinan ta biba na cas di nan yiunan, y hopi famia ta bai traha laga nan grandinan nan so na cas. Pero te hasta esey ta peligroso awendia, si nos mira cuanto anciano ta wordo atraca, ta wordo bati, ta wordo mara te hasta cu tape na man, pia y cara. Pero tambe mamanan ta biba den ansha ora di manda su yiu scol, y ni ey nan no ta safe mas. Of ora nos hobennan bai cinema, como mama ta den ansha bo ta constantemente”.

CIFRAS NO TA WORDO PUBLICA
MEP ta condena tambe cu e minister di husticia no ta publica ningun cifra, tampoco den e Statistical Yearbook 2013 di Centraal Bureau voor de Statistiek. E ultimo cifranan tabata di 2011, cu a mustra cu criminalidad a aumenta cu 70% desde cu gabinete Mike Eman a tuma over. Con minister Dowers por maneha si e no tin cifras? Con nos por confia kiko cu e minister bisa si nos no tin cifras? Con bo kier pa nos controla gobierno si no tin cifras? Cu gobierno ta sconde informacion pa Parlamento ta pasa hopi. Cu Presidente di Parlamento mes ta laga gobierno sconde informacion for di nos y get away cune, tambe nos ta mira hopi. Pero esaki ta algo mucho peor: gobierno mes no kier publica cifras. Con bo por maneha SIN cifras?

MEP NO TIN CONFIANSA DEN MINISTER DOWERS
Di otro banda, pueblo no mester di cifras pa sinti cu criminalidad ta aumentando seriamente ultimo 6 anjanan, y nos pais ta mas insigur cu nunca antes e tawata. Ainda nos por corda un propaganda durante tempo di campanja di AVP, den cual Mike Eman ta sali tras di un cura manera un salbador y ta bisa cu AVP tin un plan y AVP tin e team. Awe nos por mira cu no tin ni un plan, ni un team.
Fraccion di MEP a pidi e plan di maneho di minister di husticia na hopi ocasion, pero e minister no a hasi casi di e peticion aki, y sosteni pa e mayoria den Parlamento, nunca a cumpli.
“Atraco ta cos di tur dia, tiroteo tambe ta mas regla cu excepcion. Hendenan ya no ta ni yama polis mas. E gobierno aki deliberadamente a keda sin controla nos fronteranan, y importacion ilegal di arma, di droga y di hende ta wordo facilita, y gobierno no kier hasi nada pa frene. Y ora cu a cuestiona minister Dowers riba esaki, su contesta tawata: ta percepcion di e pueblo ta eroneo! Mientras tanto e minister no ta mustra di ta realisa cu e problema ta serio. E minister tin un actitud masha arogante, y ta hasi manera cu tur cos ta bon na Aruba y ta oposicion ta exagera. Nos fraccion no tin ningun confiansa den e minister aki. MEP kier mira un Aruba mas sigur pa nos muchanan y hobennan por desaroya trankil, y pa nos famianan y especialmente nos grandinan no biba den ansha di wordo atraca. Aruba merece mihor, mucho mihor”, lider di MEP a duna di conoce.

Expresionnan haci den e articulo aki no necesariamente ta refleha opinion di ArenaPoliti.co