{idkey=8704b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2176-mireille-sint-jago-mep-seguro-di-studiantenan-na-hulanda-ta-causa-problema%3FItemid%3D101][title=Mireille+Sint+Jago+%28MEP%29%3A+Seguro+di+studiantenan+na+Hulanda+ta+causa+problema+][desc=Casi+un+a%C3%B1a+a+pasa%2C+cu+Michelle+Hooijboer-Winklaar+a+forsa+un+cambio+den+e+seguro+di+salud+di+studiantenan+na+Hulanda.+Cu+e+cambio+aki+e+studiantenan+a+wordo+perhudica+na+un+manera+formal.+Nan+mester+tin+placa+pa+nan+bishita+dokter+y+cumpra+medicina%2C+pasobra+cu+Insure2Study+no+ta+paga+consulta+y+medicina+adelanta.+Nos+studiantenan+mester+tuma+tempo+di+nan+estudio+pa+declara+nan+gastonan+medico+na+ora%2C+sino%2C+nan+ta+haya+boet.+Ademas%2C+e+pakete+di+cuido+inclui+a+bira+menos.+E+ta+increibel+cu+un+Mi]}
Casi un aña a pasa, cu Michelle Hooijboer-Winklaar a forsa un cambio den e seguro di salud di studiantenan na Hulanda. Cu e cambio aki e studiantenan a wordo perhudica na un manera formal. Nan mester tin placa pa nan bishita dokter y cumpra medicina, pasobra cu Insure2Study no ta paga consulta y medicina adelanta. Nos studiantenan mester tuma tempo di nan estudio pa declara nan gastonan medico na ora, sino, nan ta haya boet. Ademas, e pakete di cuido inclui a bira menos.

E ta increibel cu un Minister di Enseñansa, cu mester percura pa e bienestar di nos studiantenan, no tin nan bienestar como prioridad. E Minister aki a complica y perhudica e bida di nos studiantenan door di duna nos hobennan mas stress y problemanan. Imagina bo cu bo ta bo so den un pais, leu di bo famia y bo ta sinti malo. Caminda aña pasa e studiantenan por a bay dokter di cas di biaha, p’asina haya nan salud bek mas pronto posibel y no perde les, e aña aki e 1200 studiantenan mester a paga adelanta pa nan haya cuido medico. Pa despues nan sinta y haci administracion pa haya nan placa bek. Si nan tin tentamen y falta tempo pa haci esey, nan ta haya nan mes confronta cu gastonan extra y boet of nan no ta haya nan placa bek mas tampoco. Mientras tanto e seguro aki si, ta ricibi sumanan halto di Land Aruba como prima medico pa e studiantenan.

Pues awor e studiantenan mester paga pa cualkier consulta y medicina cu nan mester pa despues entrega un declaracion na Insure2Study. Antes e studiante no mester a preocupa si e tin placa of no pa bay dokter di cas. E por a acudi na e dokter di biaha, p’asina e haya e cuido medico necesario pa no perde hopi di su lesnan. Cu su carchi di seguro, su gastonan tawata wordo paga automaticamente. Asina no a kita tempo di nan estudio tampoco.

Pa nos studiantenan, cu ta na Hulanda nan so y cu mester pone nan atencion na nan estudio, e seguro nobo di Insure2Study ta kita tempo di nan estudio. Tur luna e studiantenan mester corda pa haci nan administracion, p’asina haya nan placa bek di Insure2Study cu nan a paga pa haya cuido medico. Pues e sistema aki ta beneficia solamente Insure2Study, pasobra nan ta sigui ricibi placa di Gobierno di Aruba pero nan gastonan ta menos, door cu tin hopi studiante cu no sa, no tin tempo of ta lubida di declara nan gastonan medico.

E ta un berguensa caba con e cambio di e seguro aki a bay. Cu un compania cu tawata tin un capital di solamente 1 florin na su nomber por a gana e bid aki. Ademas Insure2Study no por a cumpli cu ni un jaarverslag financiero, door cu e compania a wordo lanta net un rato prome cu e bid a cera. Un otro berguensa ta cu awor politiconan manera Van Raak y Bosman na Den Haag tin pregunta tocante e forma di mal gobernacion cu ta pasa na Aruba. Gobierno di Mike Eman y den e caso aki Michelle Hooijboer-Winklaar, ta sigui cu nan mal gobernacion y ta sigui susha e nomber di Pais Aruba. Riba dje, nan ta perhudica nos futuro profesionalnan door di haci nan bida na Hulanda mas duro.

Expresionnan haci den e articulo aki no necesariamente ta refleha opinion di ArenaPoliti.co