{idkey=3986b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F835-mireille-sint-jago-mep-zero-tolerancia-pa-cu-abuso-contra-maestronan%3FItemid%3D101][title=Mireille+Sint+Jago+%28MEP%29%3A+Zero+tolerancia+pa+cu+abuso+contra+maestronan%21][desc=Un+scol+mester+ta+un+lugar+sigur.+No+solomente+pa+e+alumno%2C+pero+tambe+pa+e+maestro+y+otro+trahadornan+di+un+scol.+Un+lugar+caminda+hende+ta+trata+otro+cu+respet+y+diferencia+di+opinion+ta+wordo+soluciona+na+un+manera+profesional+y+adecua.+Mayoria+di+esnan+cu+ta+bishita+un+scol+aki+na+Aruba%2C+ta+sinti+mes+ora+cu+tin+ordo+y+disciplina+y+cu+tin+un+ambiente+di+positividad.+E+mayornan+mester+ta+envolvi+den+e+educacion+di+su+yiu%2C+pa+asina%2C+hunto+cu+scol%2C+por+detecta+cualkier+problema+mas+trempan+possi]}
Un scol mester ta un lugar sigur. No solomente pa e alumno, pero tambe pa e maestro y otro trahadornan di un scol. Un lugar caminda hende ta trata otro cu respet y diferencia di opinion ta wordo soluciona na un manera profesional y adecua. Mayoria di esnan cu ta bishita un scol aki na Aruba, ta sinti mes ora cu tin ordo y disciplina y cu tin un ambiente di positividad. E mayornan mester ta envolvi den e educacion di su yiu, pa asina, hunto cu scol, por detecta cualkier problema mas trempan possibel. Un bon cooperacion entre e mayornan, maestronan y e directiva di scol, ta sumamente importante pa carga y comparti e responsabilidad pa e desaroyo di cada un alumno.

Sinembargo, mayornan por tin diferencia di opinion tocante e metodo cu un maestro ta practica pa educa e alumnonan mas miho posibel. Por pidi un reunion cu e maestro of Hoofd pa papia over di esey. Locual si no por wordo tolera, ta pa esaki bira un discussion, caminda e mayor ta kibra e ambiente di paz y tranquilidad cu ta reina den un scol, of piho ainda, drenta den klas pa discuti na un manera abusivo dilanti di muchanan innocente, yiunan di otro mayor, cu no merece ni lo acepta abuso di e forma aki contra un maestro dilanti di nan yiunan. No tin ningun excuus pa comportacion asina. Comportacion di e forma aki, no mester wordo accepta. Akinan por bisa simpelmente, cu zero tolerancia ta e unico solucion cu por wordo acepta.

Gobierno, mas specifico, Minister di Enseñansa y su Ministerio, lo mester percura pa tur scol no solomente tin un protocol di conducto y procedura con pa reaciona riba situacionan abusivo y violente, cu lo por tuma lugar na un scol, nan mes tambe mester sostene y promove pa mayornan, maestronan y staf semper communica na un manera professional ora tin diferencia di opinion: 'There is a time and place for everything.' No por tolera, cu p.e. un mayor ta drenta den klas y cuminsa discuti dilanti di tur muchanan cu un maestro of maestra. Esey no ta e manera pa soluciona un problema. Riba dje, esaki ta haci daño na e ambiente di siguridad cu nos alumnonan mester di dje pa por desaroya mas miho posibel. E confiansa y respet cu nos como maestronan ta traha riba dje, ta algo cu ta wordo traha dia pa dia, aña pa aña. Asina ta logra crea un ambiente sigur pa nos alumnonan. Nos no por tolera cu esaki ta wordo destrui pa ningun mayor cerca ningun maestro, pasobra un caso asina por crea un precedent pa henter e mundo di enseñansa aki na Aruba. Ya caba tin varios maestra cu ta admiti cu pa varios motibo, nan no ta sinti nan mes sigur mas dilanti klas. P'esey, e unico maneho cu por wordo tolera, di maestro, mayor, staf y un Minister di Enseñansa mester ta: 'Zero Tolerancia!'

Expresionnan haci den e articulo aki no necesariamente ta refleha opinion di ArenaPoliti.co