{idkey=5357b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2195-ing-mike-de-meza-aunke-no-por-duna-ningun-garantia-ainda-di-e-negociacionnan-cu-citgo-e-ta-mustrando-sumamente-bon%3FItemid%3D101][title=Ing.+Mike+de+Meza%3A+Aunke+no+por+duna+ningun+garantia+ainda+di+e+negociacionnan+cu+CITGO%2C+e+ta+mustrando+sumamente+bon][desc=Diferente+Ehecutivo+di+CITGO+na+Aruba+e+siman+aki%26amp%3Bnbsp%3BORANJESTAD+%E2%80%93+Ing.+Mike+de+Meza%2C+Minister+di+Economia%2C+Comunicacion%2C+Energia+y+Medio+Ambiente%2C+a+duna+un+relato+di+e+ultimo+desaroyonan+di+e+negociacionnan+relaciona+cu+reapertura+di+refineria+di+Aruba.+%E2%80%9CE+%E2%80%98due+diligence%E2%80%99+di+nan+parti+ta+bayendo+positivo%2C%E2%80%9D+sr.+De+Meza+a+bisa%2C+refiriendo+aki+na+CITGO%2C+e+compania+estableci+na+Houston%2C+Texas+cu+tin+interes+grandi+pa+tuma+operacionnan+di+e+refineria+over.+%E2%80%9CNos+tin+contacto+cu+nan+diar]}
Diferente Ehecutivo di CITGO na Aruba e siman aki 

ORANJESTAD – Ing. Mike de Meza, Minister di Economia, Comunicacion, Energia y Medio Ambiente, a duna un relato di e ultimo desaroyonan di e negociacionnan relaciona cu reapertura di refineria di Aruba. “E ‘due diligence’ di nan parti ta bayendo positivo,” sr. De Meza a bisa, refiriendo aki na CITGO, e compania estableci na Houston, Texas cu tin interes grandi pa tuma operacionnan di e refineria over. “Nos tin contacto cu nan diariamente y semanalmente, riba diferente nivel. E siman aki atrobe tin diferente ehecutivo di CITGO na Aruba y gobierno tin combersacionnan planea cu e ehecutivonan di mas halto di CITGO.”

“Na momento cu nos a drenta den gobierno, cu e refineria no tabata den operacion, tabata un trabou sumamente grandi cu nos a traha riba dje y ya nos tin 6 aña trahando riba esaki. Nos a logra na 2010 un Settlement Agreement, pa kita tur e disputa cu tabata tin den corte un banda, pa ‘settle’, crea un plataforma nobo pa e posibilidad pa e mundo industrial petrolero por a continua na Aruba,” segun Minister di Econommia di Aruba, “y nos a logra den esey tambe, pero mercado a deteriora na aña 2012 cu a haci cu atrobe a stop e operacion di e refineria.”

Ing. de Meza a sigui splica cu a sigui traha y busca avenidanan pa por busca un operador nobo. A tuma contacto y reuni cu companianan petrolero estatal regional y mundial grandi manera di Brasil, Colombia, Venezuela, Mexico, Merca, Europa, Africa y te hasta den region di Arabia. “Mi por bisa toch cu den discusionnan cu a bira mucho mas intensivo, pa 2 aña caba, nos ta bezig cu e posibilidad di PDVSA y CITGO, un compania estableci na Merca.”

“Nos a logra na fin di aña pasa pa sinta na mesa y a yega na firma un MoU cu CITGO,” sr. de Meza a splica. El a sigui bisando cu pa mas o menos e cuater ultimo simannan aki tin un cantidad grandi di expertonan di CITGO na Aruba, den e refineria, ta haciendo nan evaluacionnan tecnico y economico. “E ta asina cu 30 di november tin un ‘meetpunt’ den e proceso di e prome fase aki di ‘due diligence’.” Na e momento ey, de Meza ta splica cu, e partidonan ta bay sinta na mesa y ta revisa tur informacion. Ta presenta conclusionnan na e momento ey y ta determina e ora si ta sigui pa e siguiente fase. Despues di 30 di november ta sigui un di dos fase, cu ta dura di 1 te 31 di december. Den e fase ey gobierno tambe ta parti integral di e negociacionnan, caminda ta bay discuti loke yama, ‘Heads of Agreements’, cu ta e partinan mas substancial y grandi si acaso yega na un conclusion positivo cu ta tuma over e refineria.

“31 di december ta e fecha crucial, caminda gobierno di Aruba mester tuma su conclusion, CITGO mester tuma su conclusion y si e dos conclusionnan ey ta positivo e ora ta sigui cu e fase final, caminda ta bay negocia e “Definite Agreement”. Den e periodo ey ta bay haci acuerdonan definitivo entre e partidonan, incluyendo tambe acuerdonan definitivo cu Valero, caminda Valero lo pasa tur ‘assets’ pa gobierno y gobierno e ora lo drenta den un acuerdo definitivo cu CITGO. “Tur esaki mester tuma luga den 3 luna y pa 31 di maart 2016, tur esaki mester ta completamente finalisa,” segun Minister de Meza.

Ing de Meza: “e proceso ta mustrando bon, pero nos no por duna ningun garantia ainda te ora tur cos ta cla, pero e ta mustrando sumamente positivo.”

Expresionnan haci den e articulo aki no necesariamente ta refleha opinion di ArenaPoliti.co