{idkey=8089b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F228-gabinete-me-ii-comerciantenan-di-aruba-tin-confiansa-den-e-upgrading-di-e-centro-comercial-di-aruba%3FItemid%3D101][title=Gabinete+ME+II%3A+Comerciantenan+di+Aruba+tin+confiansa+den+e+Upgrading+di+e+Centro+Comercial+di+Aruba][desc=Diabierna+ultimo+Aruba+Aloe+Balm+a+habri+un+bunita+tienda+den+Caya+Grandi+di+Oranjestad.+Banda+di+ta+un+bunita+tienda%2C+esaki+ta+marca+tambe+comienso+di+un+tendencia+comercial+nobo+den+Caya+Grandi+Aruba.+A+papia+hopi+cu+mester+diversifica+e+tipo+di+tiendanan+cu+tin+den+Caya+Grandi.+Entre+otro+ta+papia+di+tiendanan+cu+por+satisface+e+necesidadnan+comercial+di+turista.+E+cantidad+di+turistanan+cu+ta+bishitando+Caya+Grandi+ta+creciendo+dia+pa+dia+mas+pa+motibo+di+e+Tram+cu+ta+hacie+sumamente+facil+p]}

Diabierna ultimo Aruba Aloe Balm a habri un bunita tienda den Caya Grandi di Oranjestad. Banda di ta un bunita tienda, esaki ta marca tambe comienso di un tendencia comercial nobo den Caya Grandi Aruba. A papia hopi cu mester diversifica e tipo di tiendanan cu tin den Caya Grandi. Entre otro ta papia di tiendanan cu por satisface e necesidadnan comercial di turista. E cantidad di turistanan cu ta bishitando Caya Grandi ta creciendo dia pa dia mas pa motibo di e Tram cu ta hacie sumamente facil pa e turistanan yega den e centro comercial aki. Cu e tienda aki, e turista tin mucho mas incentivo pa ta y keda den Caya Grandi.

Apenas un dia prome, Prome Minister Eman y Minister di Infrastructura Sevinger tabata na final di Caya Grandi, specificamente na Plaza Niki Habibe, caminda a otorga permisonan pa Terasanan den Caya Grandi pa varios comerciante. Esaki ta habri e oportunidad pa turista y localnan por sinta y disfruta di algo di bebe y come den Caya Grandi. Esaki ta haci e Caya uno mucho mas atractivo pa e bishitante, mas efectivo pa comerciante y un seguransa pa empleo pa e trahador.

Director di Operacion na Aruba Aloe, Sr. Koos Veel, ta splica cu esaki ta di 15 tienda di Aruba Aloe Balm, tanto local como internacionalmente. “Nos ta sigur cu e lo bay bon,” Sr. Veel a segura, “pasobra nos a haci un ‘soft-opening’ siman pasa caba, dus tin un siman cu nos ta bendiendo caba y e ta bayendo bon.” E Director di Operacion di Aruba Aloe Balm a splica cu den Caribe, esaki ta e Caya Grandi di mas bunita y e ta un shopping experience pa esnan cu ta bishite. “E upgrading cu a wordo haci ta echt un exito total y nos ta kere cu pa pone tiendanan nechi, bunita den dje ta un cos cu ta bay hacie un exito rotundo.”

Sra. Audrey Croes Laclé di MAMBO tabata presente tambe pa apertura oficial di e tienda di Aruba Aloe Balm den Caya Grandi. Cu hopi entusiasmo el a splica cu e tienda di Aruba Aloe Balm, “ta un aanwinst pa Caya Grandi y masha tempo nos ta bogando pa e parti aki tambe di Caya bay un tiki mas upscale y esaki a duna e ehempel tambe mi ta kere.”

Banda di cu Aruba Aloe Balm, ta produci un producto cu ta wordo uza pa hopi tipo di meta, pa kemadura, solo y cuido general di cuero, e compania a bin ta haciendo un bon trabou den produci y mercadia su productonan, segun Sra. Croes-Laclé, te na unda nan tin un fama internacional te cu nan a ‘launch’ y distribui e productonan na Merca tambe cu nan label: ‘Made in Aruba’. “Mi ta kere cu esaki ta haci cu e turista cu semper tabata keda pega na cuminsamento di Caya Grandi ta bin facilmente mas pariba.”

Sra. Croes-Laclé a enfatisa, cu “conhuntamente cu loke ta bay ta pasando mas pariba den Caya tambe, un ‘City Hotel’, cu ta casi cla cu nan financiamento, ta spera cu pa mey mey di otro aña por tin e ground-breaking di esey y ta bay trece un revolucion grandismo y hopi mas trafico pa Caya.”

Cu e desaroyonan aki, Prome Minister Mike Eman a splica den su discurso durante di inauguracion di e tienda den Caya Grandi, ta mustra cu e ‘framework’ cu Gobierno a pone ta hayando contenido. “Tabata tin un momento cu mester a warda pa wak cu e sincronisacion entre loke gobierno a haci y loke comerciantenan di Aruba ta haci cu ne ta traha.” Prome Minister Mike Eman: “Awe nos por wak cu e ta traha. Cada rato tin un tienda nobo ta habri. Ayera nos a bishita algun negoshi nobo cu ta bay establece nan mes te na final di Caya Grandi. No unicamente pasobra nan ta wak cu e ‘mainstreet’ ta bunita, pero pasobra cu nan ta wak cu tin un infrastructura cu ta bay trece turista den henter Caya Grandi. Esaki ta un dia grandi pa Aruba.”

Expresionnan haci den e articulo aki no necesariamente ta refleha opinion di ArenaPoliti.co