{idkey=1512b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F167-xiomara-ruiz-maduro-gabinete-eman-ta-hibando-un-maneho-di-caba-cu-e-clase-media-y-asina-crea-pobresa%3FItemid%3D101][title=Xiomara+Ruiz-Maduro%3A+Gabinete+Eman+ta+hibando+un+maneho+di+caba+cu+e+clase+media+y+asina+crea+pobresa][desc=Gabinete+Eman+ta+hibando+un+maneho+financiero+desastroso+cu+ta+corona+cu+un+KB+y+un+investigacion+di+CFT+cu+ta+comproba+con+nan+a+abusa+di+e+fondonan+publico+di+nos+Pais.+Menos+cu+1%25+di+tur+e+miyones+cu+nan+a+fia+nan+a+inverti+den+Pueblo+ya+cu+e+mayoria+di+e+fondonan+publico+a+wordo+malgasta+den+proyectonan+pa+haci+nan+amigonan+mas+rico.+Esnan+cu+mas+ta+sufri+ta+e+clase+media+cu+cada+ves+ta+wordo+confronta+cu+mas+medida+pa+por+yena+e+caha+di+Gabinete+Eman+pa+nan+por+sigi+malgasta.+Di+e+manera+ak]}

Gabinete Eman ta hibando un maneho financiero desastroso cu ta corona cu un KB y un investigacion di CFT cu ta comproba con nan a abusa di e fondonan publico di nos Pais. Menos cu 1% di tur e miyones cu nan a fia nan a inverti den Pueblo ya cu e mayoria di e fondonan publico a wordo malgasta den proyectonan pa haci nan amigonan mas rico. Esnan cu mas ta sufri ta e clase media cu cada ves ta wordo confronta cu mas medida pa por yena e caha di Gabinete Eman pa nan por sigi malgasta. Di e manera aki e clase media ta desapareciendo creando un pobresa grandi na nos Pais.

Cada ves nos ta scucha Minister Eman y parlamentarionan di AVP gaba cu e Gabinete Eman ta percura pa esnan mas vulnerabel den nos comunidad dunando un cantidad di placa den forma di toelagen. Bunita y noble pa bisa. Pero ningun dia nos ta tende nos Minister Eman bisa di unda e placa ta bin pa e por cumpli cu tur e promesanan popular aki. Banda di esaki nos no ta scucha e mandatario aki y ningun otro minister of parlamentario di AVP bisa nada di e clase media di e Pais aki cu tambe ta pasando den momentonan duro y ta cuminsa desaparece pa bay forma parti di e grupo mas vulnerabel di nos Pais.

E clase media na nos Pais tambe ta birando vulnerabel ya cu nan no ta bin na remarke pa ningun toelage, pero nan ta paga si pa tur tipo di medida popular cu Gabinete Eman introduci pa por tene hende contento pa haya nan confiansa di voto. Pasobra ta e clase media ta paga pa tur sorto di toelage. Ta e clase media ta paga pa medida di grondbelasting, AOV, AZV y APFA. Ta e clase media ta esun cu ta perdiendo cupo di trabou. Ta e clase media ta esun cu ta wordo perhudica pa concurencia inhusto. Y aki poco dia ta e clase media su placa na banco ta esun cu lo bira menos danki na e belasting riba transaccion cu Minister Eman lo introduci pa por haya fondo pa paga pa e proyectonan Private Public Partnerschip (PPP) liga na amigonan di partido.

E ta bisto pa esun cu kier wak e. E plan di Gabinete Eman ta pa caba cu e clase media pa asina resta solamente dos grupo di cuidadano na nos Pais, e riconan y e pobernan. E riconan lo haya tur proyecto cu lo wordo paga di e placa di belasting di e pobernan. Pero e pobernan lo recibi tur sorto di toelagen di Gabinete Eman pa asina nan por keda manera un esclavo contento. Nan trabou duro nunca lo hiba nan mas na yega na locual nos conoce awor como e clase media, ya cu monopolionan crea awor lo evita esaki a todo costo.

Pueblo di Aruba kizas awor aki hopi no ta realisa cu locual ta pasando na nos Pais ta a consecuencia di e filosofia comunitario cu ta core manera un linia cora den e gobernacion di Gabinete Eman. E riconan lo haya tur cos y e pobernan lo ser trata manera esclavo contento. Tene na cuenta cu ta e filosofia aki ta locual cu dia pa dia ta cabando cu e libertadnan y e felicidad di e Pueblo aki.

4 november 2014

Expresionnan haci den e articulo aki no necesariamente ta refleha opinion di ArenaPoliti.co