{idkey=8266b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F150-xiomara-ruiz-maduro-mep-mal-gobernacion-a-habri-caminda-pa-reino-mete-den-asunto-interno-di-pais-aruba%3FItemid%3D101][title=Xiomara+Ruiz-Maduro+%28MEP%29%3A++Mal+gobernacion+a+habri+caminda+pa+Reino+mete+den+asunto+interno+di+Pais+Aruba][desc=Minister+Eman+a+entrega+nos+autonomia+financiero+deliberadamente+Den+e+dianan+aki+a+surgi+un+discucion+riba+e+legalidad+di+e+KB+cu+a+ser+imponi+door+di+Reino+riba+e+gobernacion+di+Gabinete+Eman.+Un+di+e+puntonan+cu+Raad+van+Advies+a+trece+dilanti+ta+ensera+cu+e+presupuesto+di+nos+Pais+ta+asunto+di+nos+Pais+y+pesey+Reino+no+tin+e+autoridad+pa+impone+un+KB+cu+ta+duna+instruccion+riba+un+asunto+cu+no+ta+toca+Reino.+Nos+ta+di+acuerdo+cu+Raad+van+Advies+su+conclucion+cu+e+presupuesto+di+nos+Pais+ta+]}

Minister Eman a entrega nos autonomia financiero deliberadamente

Den e dianan aki a surgi un discucion riba e legalidad di e KB cu a ser imponi door di Reino riba e gobernacion di Gabinete Eman. Un di e puntonan cu Raad van Advies a trece dilanti ta ensera cu e presupuesto di nos Pais ta asunto di nos Pais y pesey Reino no tin e autoridad pa impone un KB cu ta duna instruccion riba un asunto cu no ta toca Reino. Nos ta di acuerdo cu Raad van Advies su conclucion cu e presupuesto di nos Pais ta un asunto interno di nos Pais. Pero den e caso specifico aki di presupuesto 2014, nos ta di opinion cu e mal gobernacion di Gabinete Eman mes a habri caminda pa Reino mete den asunto interno di nos Pais y cu Minister Eman deliberadamente a haci esaki pa entrega nos autonomia financiero.

KB, CFT, STANDARD AND POORS,’FITCH, IMF, PRESUPUESTO 2014
E ta fresco den memoria di e Pais aki con na juli 2014 nos Pais a pasa e berguensa di wordo confronta pa un KB cu a wordo imponi riba cabes di Gabinete Eman den cual Gobernador di Aruba a haya e instruccion di Conseho di Reino pa no firma e presupuesto di 2014 promer cu e haya un bista real di e situacion financiero di nos Pais y tampoco firma promer cu Gabinete Eman haci e cambionan conforme e investigacion di CFT. E KB aki no a yega cay for di shelo, pero tabata tin un trayectoria largo promer cu ela bira un realidad. Ta for di hopi tempo caba Conseho di Reino tabata pidiendo Gabinete Eman pa brinda un claridad riba e situacion financiero di nos Pais, ya cu Conseho di Reino no tabata mira mehoracion den e cifranan financiero di nos Pais. Gabinete Eman a firma dos protocol (Donner y Diahuebs Santo) cu Hulanda primitiendo cada di ves di mehora nan gobenacion financiero pero ta pio so consnan a bira y e rapportnan di Standard and Poors,’ Fitch y di IMF a confirma tur sospecho di Reino riba e mal maneho financiero di Gabinete Eman. Ora cu Hulanda a ripara con Gabinete Eman y e mayoria den Parlamento di Aruba a djies bulldoze e presupuesto pa 2014 sin tene debido cuenta cu e conseho extenso di Raad van Advies riba esaki, y cu Minister Eman no a tene su mes na e palabracionnan cu a wordo haci cu Conseho di Reino, e caminda a wordo habri pa Reino mete cu nos presupuesto y e finanzas publico di nos Pais.

REINO MESTER PARA MAL GOBERNACION ORA E TA PERHUDICA E PUEBLO
Conforme articulo 43 di Statuut Reino mester garantisa bon gobernacion den tur e Paisnan cu ta forma parti di Reino. Pesey ora cu Conseho di Reino a constata e mal gobernacion di Gabinete Eman nan no por a keda mucho mas largo sin haci nada y mester a actua pa para esaki. Pasobra nan ta conciente cu e mal gobernacion aki lo hiba na medidanan servero pa e Pueblo di Aruba cu na su turno lo ocaciona un pobresa grandi na Aruba y esaki mester wordo evita a todo costo.

MINISTER EMAN TA ENTREGA NOS AUTOMOMIA FINANCIERO
Locual awor mester wordo cuestiona ta cu ki intencion Minister Eman a hiba e mal maneho financiero aki. Ta parce manera cu ela firma tur e protocolnan cu Hulanda y haci un desastre financiero pa asina deliberadamente haya entrega e autonomia financiero di nos Pais. E welga di hamber tabata djies un show pa mustra cu e ta lucha pa nos autonomia, siendo cu enrealidad deliberadamente ela habri e caminda pa Reino por mete den asunto interno di nos Pais. Si esaki ta e berdad, tempo lo siña nos, pero pa awor tur cos ta mustra cu Minister Eman a traiciona e Pais aki.

2 november 2014

Expresionnan haci den e articulo aki no necesariamente ta refleha opinion di ArenaPoliti.co