Nos no sa precies kiko ta e intencion di lider di fraccion di AVP cu ultimo simannan ta lansando un racha di ponencianan absurdo dilanti relaciona cu crecemento economico. Cada biaha e ta fortificando e pensamento den pueblo cue no ta di confia pasobra su ponencianan mayoria di biaha ta carece di substancia. E cuenta di tira cifra di crecemento economico pa loco den comunicadonan sigur nota yude cu nada pasobra e ta perhudica su mes afectando e poco credibilidad cu e la resta. Na 2 ocasion lider di fraccion di AVP ta papia di crecemento economico lubidando kiko e ta scirbi. Den su promer version e ta papia cu economia a crece cu 18% bou AVP y a cai cu 15% bou di MEP.  Nos di oposicion a coregi'e cu datonan di banco central y cbs cuta demostra un scenario diferente cu loke e trece. Pero su afan y mal manera pa continua malinforma pueblo aparentemente ta un epidemia contagioso den AVP y esei nos por mira tambe di nos Prome minister. Siman pasa e la cambia su version cu e ponencia cu economia a crece cu 16% bou AVP y a cai cu 20% bou di MEP. Kiko esaki ta bisabo? Cu e no tin nocion mas di loke e ta papia pa colmo e no por splika tampoco. Notabel ta e hecho cu e grafico cu e la pone no ta ni cuadra cu e ponencia. Contrario na su insinuacion tin biaha no ta cuestion di core pa duna contesta sino di analisa bon ki disparate e lider di fraccion sosteniendo gobierno ta trece padilanti y otro biaha bo ta considera si di berdad ta bale la pena reacciona. 

 

E crecemento economico di un pais por wordo midi cu diferente indicador entre otro  1) crecemento nominal cual ta e aumento den placa door cu productividad a subi ( nominale groei) y 2) crecemento real (reëele groei) Cual porcierto ta e indicador mas usa mundialmente pasobra esaki ta tene cuenta cu inflacion dus ta tene consideracion cu e desaroyo di poder di compra. 

 

Mester enfatisa cu e splicacion cu e ta pidi pa clarifica " dicon Economia a cay cu 20% bou Gobierno di MEP entre 2004-2009 y a crece cu 16% bou AVP "ta un conclusion meramente personal di dje cual no ta basa riba niun fuente confiabel cual nos lo splica tambe. Ta asina cu MEP a goberna 8 aña completo y den su periodo di gobernacion logicamente e la conoce su retonan pero manteniendo su mes na normanan di finansas publico.

 

Pa por splica pueblo mihor y desbarata e ponencia sin base di sr. Herde nos a compila e datonan necesario di crecemento economico di tur 2 gobernacion. Den e graficonan bo por constata lo siguiente. Ningun di e 2 indicadornan no ta yega ni serca di e ponencia di sr. Herde. Durante e periodo di gobernacion di MEP si bo tuma e saldo di e desaroyo economico entre 2004-2009 bo ta haya un crecemento real di 1.1% y un crecemento nominal di 22.7%.  Nificando niun rato so cu economia a cai cu 20%. Na 2009 economia a cai debi na e impacto di e crisis financiero mundial cu a afecta tur pais rond mundo y e hecho cu valero a hunga politikeria y a dal sera no a yuda nos pais tampoco. 

 

 

Pa loke ta trata AVP si bo tuma e saldo di e desaroyo economico entre 2010-2014 e crecemento real ta di 4.7% y crecemento nominaal di 7.1% durante su periodo di 5 aña. Pregunta e ora ey ta: Ta di unda lider di fraccion AVP ta saca afor un crecemento di 18% of 16% bou AVP anto? Ta obvio cu e no por substancia loke e ta declarando y ta purba tira un para atrobe! 

 

 

Basa riba e cifranan aki pueblo por conclui cu sr. Herde ta contagia cu e malesa pa malinforma y manipula pueblo. Ademas e ponencianan absurdo ta ponebo pensa con por ta cu Aruba tin parlamentarionan asina? Bo no por kere cu cada rato cu bo ta scirbi boshi disparate pueblo lo bai kerebo pasobra den mesun intento bo ya caba a lubida tur e versionan cu bo mes a trece padilanti. E hecho cu nos tin parlamentarionan cu no por ni para tras di nan ponencianan cu fuentenan fededigno ta mas motibo pa desconfia den nan capacidad como representante di pueblo. Ta tristo pa mira cu nos pais ademas di ta wordo goberna pa mandatarionan incapas pa maneha nos finansas tambe tin cu deal cu parlamentarionan no sa di e tema pero kier bin purba lanta stof of crea scenarionan ficticio. Awor pueblo ta compronde dicon nos pais ta den un fase di deterioracion pasobra nos propio parlamentarionan no tin ni e conocemento y tampoco ta tuma e decencia pa busca informacion mas aleu pa despues formula ponencianan cu nan por defende. Ta pesei lider di fraccion di AVP mester stop di malinforma pueblo cu cifranan economico sin base of keda sin scirbi!