Nos a tuma nota di un entrevista hasi cu lider di fraccion di AVP relaciona cu diferente topico entre otro stimulacion di economia, medida y bbo. En conexion cu esaki lo nos kier duna un reaccion riba su diferente ponencianan enfocando ribe parti stimulacion. 

 

Segun lider fraccion di AVP no tawatin otro opcion sino pa inverti hopi placa pa stimula Aruba su economia pasobra na man di MEP e lo a cai cu 15%. Remarcabel ta e hecho cu Sr. Herde no ta bisa cu Aruba mescos cu otronan paisnan rond di mundo a haya su mes confronta cu e effecto di  recession financiero despues di 2008 cu a afecta nos economia den e periodo di 2009-2010. Mester pone enfasis riba e hecho cu hasta den e promer aña (2010) cu Gabinete Eman a goberna, ainda e economia  sigui bai atras. 

 

Segun e cifranan presenta di banco central  den e rapport di CFT nos producto nacional domestico (BBP) bou mando di Gabinete Oduber tawata e ultimo añanan :

 

(in mln)

2007: 4.681

2008: 4.914

2009: 4.473

2010: 4.279

 

A base di e cifranan ariba bo por conclui e siguiente mutacionnan: un crecemento di e BBP di 2007 pa 2008 cu 4.98%. Di aña 2008 pa 2009 economia a sufri un caida di 8.97%. Finalmente e siguiente aña tawatin un caida atrobe di 4.33%. Claramente e efectonan di e crisis financiero tawata riba tur 2 signatura pasobra hasta den e promer aña di AVP economia tambe a cai.

 

Pa loke ta trata e contesta riba e pregunta ki otro opcion tawata tin na 2009 nos kier contesta lo siguiente. Na promer lugar aunke cu economia di Aruba a sufri un caida  e tawatin un crecemento sobresaliente den aña 2008 (den tur tempo) hasta cu un surplus den e presupuesto. Esaki kiermeen banda di e desaroyo economico cifranan di finansas publico semper a wordo maneha mas responsabel cu ta posibel. Por ehempel si nos tuma un averahe di e deficit financiero den e ultimo 3 añanan di gobernacion di MEP esaki tawata -1.37% mientras esun di AVP tawata -8.03%. Como politico hoben y critico e ta un decepcion pa mira con hopi nos a bai atras na mando di Gabinete Eman. 

 

Partido AVP su OPCION nunca mester tawata crea debenan astronomico ocasionando deficitnan financiero structural. Awe e consecuencia ta bisto nos debe nacional ta 80.7% y sin medidanan riguroso esaki lo yega y pasa 85%  pa aña 2018. Nos ta puntra nos mes te con leu bo kier hustifica cu economia a crece poco siendo cu e debe di gobierno a keda subi structural cu un averahe di 6% pa aña. E realidad cruel ta cu nos economia (GDP) di Aruba no a yega e nivel di 2008 pero e debe si a crece cu 54%. Claramente esaki ta un punto cu ta laga di desea di banda di e gobierno bou signatura berde. Cifranan ta papia un idioma cla indicando cu loke sea e "inversion" cu lider di fraccion di AVP ta papia di dje nunca  esaki por a trece un compensacion real cu un efecto positivo riba nos presupuestonan. Pa termina opcionnan pa stimula econonomia ta varia di entre otro diversificacion real, fortalece nos economia local y inyecta di placa den nos hendenan. Ta di lamenta cu gobierno a scoge pa un strategia hopi superficial den e sentido cu pafor nos ta mustra bunita pero paden mes no ta un bista. Algo cu sigur lo por a hasi un diferencia ta inversion den e conocimento di nos pueblo pasobra esaki su frutonan ta positivo nificando cu bo lo crea un comunidad educa cual lo hasi nos pais uno fuerte den tur sentido. Ta tristo cu Gabinete Eman a focus hopi riba e soño "berde" lubidando riba e ser humano ( y baha desempleo bou di 3%) y desaroyo di e pueblo di Aruba. Ironico ta pa tende parlamentarionan di avp papia di inverti den poder di compra y gaba cu a duna 100 florin na abo como cuidadano pero awor den luna di november bo lo nota cu den un man nan a dunabo 100 florin pero ta ranca for dibo otro man 500 florin. 

 

Finalisando tin un cantidad di opcionnan pa desaroya nos economia. Den nos programa di gobernacion mes nos ta describi esakinan. E realidad ta cu e gobierno na mando ta esun cu ta dicidi cual e ta scoge y obviamente esun di gastamento incontrolabel aki no tawatin balor agrega.