{idkey=7833b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2305-gabinete-me-ii-a-tene-reunion-di-conseho-di-minister-den-mfa-noord%3FItemid%3D101][title=Gabinete+ME+II%3A+A+tene+reunion+di+Conseho+di+Minister+den+MFA+Noord][desc=Ministernan+a+haya+splicacion+di+e+edificio+y+servicionan+brinda+eyden%26amp%3Bnbsp%3BORANJESTAD+-+Ministernan+di+Gabinete+Mike+Eman+II+diamars+mainta+a+haya+un+recorido+den+MFA+Noord%2C+guia+pa+gerente+Richard+Tromp+compa%C3%B1a+pa+un+splicacion+extenso+di+arkitecto+di+e+edificio+Ir.+Orlando+Hoevertsz.+E+edificio+cu+a+wordo+traha+den+e+forma+mas+sostenibel+posibel%2C+ta+ofrece+varios+servicio+excelente+na+comunidad+di+Aruba+en+general+y+Noord+y+becindario+en+particular.+Despues+di+a+pasa+den+cada+un+espacio+di+e]}
Ministernan a haya splicacion di e edificio y servicionan brinda eyden 

ORANJESTAD - Ministernan di Gabinete Mike Eman II diamars mainta a haya un recorido den MFA Noord, guia pa gerente Richard Tromp compaña pa un splicacion extenso di arkitecto di e edificio Ir. Orlando Hoevertsz. E edificio cu a wordo traha den e forma mas sostenibel posibel, ta ofrece varios servicio excelente na comunidad di Aruba en general y Noord y becindario en particular. Despues di a pasa den cada un espacio di e edificio y a scucha e splicacion y a haci preguntanan, ministernan a bay den e sala grandi destina pa reuni, pa tene eyden e prome reunion di Conseho di Minister den MFA Noord. Ministernan a keda encanta cu e edificio bunita y multifacetico di MFA Noord y a expresa nan satisfaccion.

Minister Otmar Oduber a bisa den forma chistoso cu e ta un ‘poco jaloers’ di loke el a caba di mira y ta spera cu esun di Paradera ta bay ta mescos. “Sigur mi kier duna elogio na Prome Minister Mike Eman pa e vision cu tabatin pa construi un centro manera esaki y den varios otro districto mas. Si bo drenta aki den caba bo ta sinti un cambio grandi di e forma con sector publico ta wordo trata na Aruba. E cantidad di servicio cu ta wordo brinda y e forma comfortabel con MFA ta funciona ta e cambio cu tabata buscando den loke ta e hulpbestuurskantoornan cu tabata mas strak y formal. Mi ta ‘looking forward’ pa mira con esun di Paradera ta bay keda.”

Minister Benny Sevinger keda tabata desde inicio envolvi den e proyecto un bes mas a expresa su satisfaccion. “Durante e presentacion mi mester bisa cu tur e ideanan cu gobierno tabatin pa hinca den e MFA, awor ta wak nan concretisa. E ideanan aki a bin di e pueblo di Noord mes ya cu prome cu a cuminsa cu e construccion a tene un encuesta den comunidad di Noord pa haya sa kico tabata e deseonan. Awor cu e edificio ta cla y e MFA ta den funcion bo ta haya e feedback di loke a wordo palabra den pasado. Tur hende ta haya cu e MFA ta funcionando perfecto. E ta manera el a wordo visualisa. Hende ta haci hopi uzo di MFA loke ta e intencion tambe. Aki ta brindando un servicio di calidad, mas lihe y un servicio cu ta mas cerca di pueblo. MFA Noord ta e prome, ta bin cuatro mas.”

Minister Paul Croes a bisa di ta haya cu e edificio a haci hopi impresion riba dje. “Moderno cu tecnologianan nobo, bunita y agradabel.” Esaki ta parti di un vision grandi unda servicionan y atencion di gobierno ta mas cerca di e ciudadano. MFA Noord ta un bunita regalo pa pueblo di Noord y Aruba en general. E cantidad di hende cu ta bishita e facilidad aki ta muestra cu e tabata necesario. “Mi a papia cu algun bishitante awe y cada un ta satisfecho cu e servicio varia cu ta wordo duna den un ambiente particular. Nos a haya bon splicacion di henter e edificio.” Minister Croes a manda palabranan di pabien pa e team completo di MFA Noord.  “Esaki ta loke gobierno ta traha p’e. Inverti den e barionan y den pueblo di Aruba.”

Expresionnan haci den e articulo aki no necesariamente ta refleha opinion di ArenaPoliti.co