{idkey=7547b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2638-gabinete-me-ii-prome-minister-mike-eman-a-recorda-betico-croes-den-bunita-discurso%3FItemid%3D101][title=Gabinete+ME+II%3A+Prome+Minister+Mike+Eman+a+recorda+Betico+Croes+den+bunita+discurso][desc=ORANJESTAD+-+Prome+Minister+Mike+Eman+ta+un+orador+pa+excelencia.+Semper+cu+e+papia+e+ta+commove+otronan.+Tanto+aki+mes+como+den+exterior.+Recordando+e+persona+Betico+Croes%2C+riba+Plaza+Libertador+Betico+Croes%2C+manera+e+ta+cord%26%23039%3Be+desde+di+chikito%2C+el+a+duna+discurso+bunita+y+conmovedor.+Gobernador+Refunjol+y+se%C3%B1ora+tabata+presente%2C+mescos+Presidente+di+Parlamento+sra.+Lopez-Tromp%2C+Minister+Oduber+y+Croes+y+demas+miembronan+di+Parlamento%2C+cuerpo+consulario+y+famia+di+Betico+Croes.+Apesar+cu+e+Pla]}
ORANJESTAD - Prome Minister Mike Eman ta un orador pa excelencia. Semper cu e papia e ta commove otronan. Tanto aki mes como den exterior. Recordando e persona Betico Croes, riba Plaza Libertador Betico Croes, manera e ta cord'e desde di chikito, el a duna discurso bunita y conmovedor. Gobernador Refunjol y señora tabata presente, mescos Presidente di Parlamento sra. Lopez-Tromp, Minister Oduber y Croes y demas miembronan di Parlamento, cuerpo consulario y famia di Betico Croes. Apesar cu e Plaza ta bou construccion, asina mes a logra tene e parti protocolario eynan. E manifestacion cultural tabata dilanti Cas di Cultura den Stadionweg.

“Riba e dia aki mi ta comparti e sentimento di yiu di Betico Croes, miembro di Parlamento Glenbert Croes, pa nos tata por ta para banda di nos. Cu nos por sinti nan calor, amor y stimacion”, asina Eman a cuminsa su bunita discurso. El a papia di escogencianan cu hendenan ta haci haciendo e diferencia den historia y cambiando rumbo di paisnan. El a elogia e talentonan cu Betico Croes tabatin y su amor pa e pais aki. “El a dicidi cu tur e energia, talentonan y su devocion e ta entreg’e pa un causa pa su pueblo y su pais.” Eman a remarca cu pa historia esaki ta nifica un cambio di rumbo. Esaki ta notabel den transcurso di historia di otro paisnan. “Un lider su so no ta cambia destino di un pais. E dedicacion, devocion y stimacion di e pueblo ta necesario pa hunto cu e lider haci e diferencia.” Mester scoge pa kibra barera y murayanan pa asina por construi avenidanan di felicidad y libertad, tabata palabra bon escogi di Prome Minister Eman pa describi e lucha cu a wordo hiba. Eman a remarca cu Betico por a scoge algo mas comodo como e maestro hoben di scol cu e tabata, pa su mes y pa su famia, pero  a dicidi otro y a scoge pa sigui cu un lucha cu no tabata facil.

“Den curazon di lidernan manera Betico tin algo mas grandi, mas profundo cu ta brota y ta dispuesto pa haci sacrificionan personal, lagando un banda nan propio bienestar material, di nan salud y bienestar di nan famianan. Pero ora e lidernan aki a pone e lucha, e causa como meta principal, tur esaki ta bira parti di e sacrificio.” Eman cu ta bin di un famia envolvi pa añanan den politica sa kico e sacrificio aki nifica.

Eman a recorda cu e lucha no tabata facil, tabatin hopi discusion, corientenan di diferente pensamento y sigur den Reino esaki no tabata facil pa Aruba por a logra realisa e lucha, nos Status Aparte tan anhela. “Awe nos ta haya falta di Betico Croes, kende a dedica su bida pa un causa noble.” Eman a conta con den Parlamento di Aruba den un momento priva el a conta Glenbert Croes con su tata a yega di haci algo cu semper a keda graba den su memoria, apesar di e edad hoben cu e tabatin. “Un par di aña despues cu mi tata a fayece, mi a yega na La Fama pa cumpra un kipashi y eyden mi a topa cu Betico Croes. El a wak mi y a reconoce mi, el a milita cu mi tata y tabata semper solidario cu mi famia. El a pone man riba mi cabez y a puntra mi pa cada un di mi otro shete rumannan, cada un na nan nomber.” Esaki ta algo cu haci un impresion grandi riba e hoben Mike Eman cu te dia di awe ta recorda e sucedido aki. Eman a finalisa bisando “Mi kier a bisa famia Croes cu no solamente nan tabatin un tata cu visionnan grandi pa un lucha grandi, pero e atencion special aki pa cada individuo, cada ser humano ta haci e homber completo. Ta haci’e e personahe grandi cu ta lanta sentimentonan profundo cada aña cu nos ta recorda Betico Croes. Mi tambe ta recorde cu e pensamento y sentimentonan ey.”

Expresionnan haci den e articulo aki no necesariamente ta refleha opinion di ArenaPoliti.co