No ta promer biaha cu Otmar Oduber ta ganja muri y mira kende ta bai su entiero. Ta di 2 vez, den apenas 1 anja caba cu Otmar Oduber ta menaza di entrega su retiro.

Dia 2 di mei anja 2015 Otmar Oduber a considera retiro pasobra e NO ta di acuerdo cu CFT ya ta contra su principio. Ora a trata e reunion di CFT, e promer cu a lucha y defende CFT tawata e mesun Otmar Oduber aki. Credibilidad bo NO ta haye regala, bo mester demostra esey. Ora a trata e ley di CFT dia 27 augustus 2015 cu ta kita nos autonomia financiero esun cu mas a defende e ley di CFT tawata e propio Otmar Oduber. E la menaza cu e ta retirta pasobra e ta contra e ley y despues e mes ta defende e key aki cu tur fervor. Un hende cu 2 cara, un hende cu 2 caractery sigur un hende sin principio.

Algun luna despues ata e novela ta den su siguente capitulo. Un biaha mas minister of ex minister Oduber, ningun hende no sa di e ta ta minister of e no ta minister, en todo caso ata Otmar Oduber un biaha mas ta menza cu e ta retira y dia 6 januari 2016 e ta para dilanti oficina di gobernador cu un espectaculo a la welga di hamber. Por poco e tambe a yama prensa internacional pa ta presente pasobra e biaha aki si, contrario na e otro biahanan, e ta bai para pa su principio manera e mes a bisa y ta entrega su retiro:

Mi ta bai cita loke Otmar Oduber mes a declara dia 6 di januari na momento di e espectaculo:

‘’Cu conviccion grandi y cu interes general na pecho awe tardi ma entrega na nos Gobernador mi decision final pa loke ta trata mi futuro como Minister. E situacion ta uno den cual mi no ta identifica mi mes mas cu cierto puntonan clave di e maneho actual di Gabinete Mike Eman II. Tin diferente puntonan di atencion riba bienestar nacional cu mi no ta comparti y ta sinti cu no ta hayando e atencion necesario’’

Awe dia 27 januari nos tur sa kiko tawata e resultado di e show aki di Otmar Oduber. Despues cu e la cuestiona y critica su gobierno abiertamente e la cambia di opinion den 20 dia. Esaki ta loke e mes a declara algun dia despues cu e la anuncia su retiro.

‘’ Mi ta mas orguyoso cu nunca, di forma parti di e gabinete aki,” Oduber a bisa’’

Ta bon pa informa pueblo kende ta esnan cu ta goberna nos pais. Con un hende asina por bisa cu e tin principio, con un hende asina por bisa e tin caracter. Un hende asina no solamente mester a entrega su retiro sino henter su gabinete mester a bai cas. Un gobierno cu ta goberna a base di mentira, a base di manipulacion y a base di show mester entrega nan retiro. Nos pais tin suficiente problemanan serio pa atende cune pa sinta sigui un novella di partido AVP.

Dia cu a cuminsa trata e presupuesto ata Otmar Oduber sinta banda di otro manera nanda no a pasa. E mesun gobierno cu Otmar Oduber a critica y cuestiona su maneho publicamente pasobra e NO ta comparti e vision di su gobierno ate sinta den presupuesto defendiendo e maneho aki cu lama y cuerpo mescos cu e la haci tempo di e ley di CFT. Steve Harvey ta keda kens banda di Otmar Oduber. Den e carta cu a wordo entrega na gobernador mi ta kere cu Otmar su carta tawata robez. Loke e tawata kiermen ta cu e NO kier entrega su retiro y kier keda forma parti di e gobierno cu mes a critica pa su interes propio. E sed y hamber pa poder tawata mucho grandi pa laga bai, ni con grandi e diferencianan di opinion por tawata.

Paso Otmar a critica Dowers biertamente y nada no a cambia, Dowers no a haya mas placa pa husticia. Otmar a critica finanzas publico abiertamente y nad an a cambia. Otmar a critica finanzas publico abiertamente y den e presupuesto nada no a cambia. Loke mi kier pa Otmar spica pueblo awe kiko tawata e 9 puntonan cu a ser discuti den e ‘’famoso’’ cumbre di paz. Awe unda Otmar Oduber ta: den su comfort zone. Bai ta tuma hende haci kens, bai ta ganja hende. Dignidad un hende asina no por tin y cuero di cara mucho menos.  Normalemente un hende tin principio, y hende homber tin weso di lomba pero den e caso aki Otmar Oduber a demostra cu 1 e no tin ningun clase di principio y 2 e no tin weso di lomba.

Otmar Oduber  a entrega su retiro per 1 maart 2016  y manera e mes a bisa, esaki no ta cuestion di ganja muri. Lamentablemente un biaha mas Otmar a ganja muri, a tuma su mes haci, su votadronan haci y henter un pais haci.  Ora e la ripara cu ningun hende a bai entierro e la dicidi di keda como minister.

Dia un gobierno ta wordo poni bao precion cu menaza di un minister pa retira y nan no por resolve nan problemanan interno y mester bai te serca gobernador pa atende cu esaki ta pasobra no un sino henter e gobierno tin cu bai cas!

Si Otmar Oduber tin caracter y principio e ora e ta publica su carta hunto cu su 9 puntonan pa tur hende por lesa y compronde kende ta esnan cu ta goberna nos pais.!