{idkey=2382b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2662-booshi-wever-upp-canimi-pa-mi-canibo-den-maneho-financiero-di-hospital%3FItemid%3D101][title=Booshi+Wever+%28UPP%29%3A+%E2%80%9CCanimi+pa+mi+canibo%E2%80%9D+den+maneho+financiero+di+hospital%3F+%5B%2Baudio%5D][desc=UPP+a+bin+ta+denuncia+pa+algun+tempo+caba+e+falta+di+transparencia+den+gobernacion+na+Aruba%2C+pero+parce+cu+e+mal+custumber+cu+e+gobierno+a+sembra%2C+a+cay+den+tera+fertil+cerca+e+sector+priva%2C+na+unda+directa-+of+indirectamente+gobierno+ta+meti+aden.+Ya+caba+nos+a+publica+riba+e+forma+cu+e+director+di+WEB+a+wordo+nombra+sin+cu+un+solicitud+habri+a+tuma+lugar.+Tambe+a+haci+mencion+di+e+rol+cu+cierto+miembronan+den+e+hunta+di+comisario+di+WEB+ta+riba+payroll+di+ATCO%2FECOTEC%2C+y+a+aproba+un+deal+lucrat]}
UPP a bin ta denuncia pa algun tempo caba e falta di transparencia den gobernacion na Aruba, pero parce cu e mal custumber cu e gobierno a sembra, a cay den tera fertil cerca e sector priva, na unda directa- of indirectamente gobierno ta meti aden.
Ya caba nos a publica riba e forma cu e director di WEB a wordo nombra sin cu un solicitud habri a tuma lugar. Tambe a haci mencion di e rol cu cierto miembronan den e hunta di comisario di WEB ta riba payroll di ATCO/ECOTEC, y a aproba un deal lucrativo cu ATCO/ECOTEC a cera cu WEB.

Gobierno di Aruba ta hunga un papel importante den maneho di nos unico hospital pa medio di AZV y tambe pa medio di nombracion di representantenan di gobierno den e hunta di supervision di hospital.
Den e hunta di supervision anterior a nombra casa di un minister - cu ta gerente/doño di un compania di seguro - como representante di gobierno, y den e hunta actual a nombra un ex-director di un banco como representante di gobierno.

Coincidencia di bida ta cu e gerencia actual di hospital a haya ta necesario pa cera un contract nobo di seguro cu juist e compania di seguro di e miembro di e hunta di supervision anterior.

Tambe a cera un “spaarfonds” pa e trahadornan di hospital cu e banco di e miembro actual di e hunta.
Aki nos ta papia di Nagico cu su gerente sr. Hooyboer y Arubabank cu sr. Edwin Tromp.

Den mi concepto aki mester papia di conflicto di interes, pasobra mi ta supone cu e gerente di Nagico lo ta bon na altura di e situacion financiero di hospital, y tambe lo tin un bon contacto cu e director financiero di hospital.
No ban lubida cu sr. Jan de Ruijter ta meti den un proceso pa cuestiona introduccion di e seguro pa studiantenan na Hulanda, y na unda e nomber di sr. Hooyboer tambe a cay.
Mescos mester considera e rol di sr. Tromp, cu te asina leu cu mi sa, ta fungi ainda como consehero di Arubabank.
Pues no ta un miho deal ta importante, pero e amistad, lazonan familiar y/o bo disponibilidad pa haci loke gobierno kier, ta mas importante.

Lo tin hende cu lo puntra nan mes si mi no ta exagera cu mi criticanan y mi suposicionnan di posibel corupcion, pero comprondemi bon: mala maña ta dificil di kibra, y awendia na Aruba mala maña a hasta wordo halsa como algo normal, na unda ta legalisa actonan cu den pasado no lo a waak luz di dia.
Hospital a para bira un circuito cera pa tur esnan cu ta haña ta necesario pa probecha di placa cu lo mester a wordo dedica pa mehora e cuido medico.
Ya caba tin basta pregunta pa cu e forma cu a otorga e proyecto di renobacion/expansion di HOH. E minister a demostra di no sa maneha e cartera di salubridad, y parlamento ta cera wowo pa e decadencia den salubridad.
Y ta hopi straño cu ni e sindicato di WEB, ni esun di HOH, no ta bisa net net nada di e forma di proceder aki.

E mala maña di "canimi pa mi canibo" ta parce di ta hopi contagioso, y cu ta contagiando hopi hende y/o instancianan cu tin como consequencia cu al final ta nos pueblo atrobe lo mester bay paga pa esaki.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 28, 2016

Expresionnan haci den e articulo aki no necesariamente ta refleha opinion di ArenaPoliti.co