{idkey=7581b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F597-booshi-wever-upp-un-biaha-mas-ta-denuncia-falta-di-transparencia-cu-planificacion-di-un-sala-di-operacion-nobo%3FItemid%3D101][title=Booshi+Wever%3A+UPP+un+biaha+mas+ta+denuncia+falta+di+transparencia+cu+planificacion+di+un+sala+di+operacion+nobo][desc=Nos+a+wordo+informa+cu+recientemente+a+tuma+lugar+un+encuentro+entre+e+minister+encarga+cu+salubridad+publico%2C+Raad+van+Bestuur+di+hospital%2C+representantenan+di+SOGA+y+e+architecto+Bermello%2C+na+unda+e+architecto+a+haci+un+presentacion+di+un+dise%C3%B1o+nobo+pa+e+sala+di+operacion+di+hospital.+Nos+a+se%C3%B1ala+den+pasado+caba+cu+e+forma+con+e+architecto+aki+ta+maniobra+na+Aruba%2C+ta+sumamente+cuestionabel%2C+pero+pio+ta+e+forma+con+e+representantenan+di+SOGA+y+AIB+a+bin+ta+contribui+na+ehecucion+di+un+proy]}
Nos a wordo informa cu recientemente a tuma lugar un encuentro entre e minister encarga cu salubridad publico, Raad van Bestuur di hospital, representantenan di SOGA y e architecto Bermello, na unda e architecto a haci un presentacion di un diseño nobo pa e sala di operacion di hospital.

Nos a señala den pasado caba cu e forma con e architecto aki ta maniobra na Aruba, ta sumamente cuestionabel, pero pio ta e forma con e representantenan di SOGA y AIB a bin ta contribui na ehecucion di un proyecto unda desde su fase inicial tabata tin rumornan di corupcion y manipulacion di cifra.

Ta fresco den nos memoria con e contratista frances, cu a entrega un oferta mucho mas favorabel pa ehecucion di e proyecto, a wordo hala un banda, y un contratista spaño/mericano a bin gana e bid, apesar di a surpasa e exigencia financiero cu mas di 40 miyon florin.

UPP a bin compronde cu desde alrededor di dos aña pasa caba, despues di un investigacion ehecuta door di Inspectie Nederland na comienso di 2013 y sigui pa un otro investigacion haci door di TNO Nederland na 2014, un cambio structural di e sala di operacion a ser considera prudente, necesario y obligatorio.

Ya caba desde 2013 Raad van Bestuur di hospital a manda un invitacion na diferente expertonan den e area di construccion di salanan di operacion di Hulanda, pa bin tira un bista, y duna un presentacion di e forma con por a diseña un sala di operacion moderno cu ta cumpli cu tur e rekisitonan di calidad. Un di e companianan aki  tabata Bussman. E compania aki tabata tin amplio experiencia den construccion di sala di operacion na Hulanda. Durante nan presentacion a resalta e hecho cu nan ta ofrece un producto prefab cu ta brinda e posibilidad den futuro pa haci cambio den e diferenta salanan sin gran costo adicional.

E gobierno aki, siguiendo e modus operandi di custumber, a prefera di acerca atrobe e mes un architecto Bermello. Y dicho hecho, Bermello parce a presenta un diseño cu no a logra convence e personanan cu ta traha na hospital y cu tin experiencia di funcionamento di sala di operacion.

Y manera tambe por a spera, e prijs a resulta di ta mucho mas halto cu loke Bussman a premira den pasado. Bermello a entrega un proposicion di alrededor di 15 miyon florin, compara cu Bussman cu lo tabata menos di 10 miyon florin. Bussman por a entrega e proyecto den 6 luna, mientras e plan di Bermello lo nifica un plan temporario, y un plan a largo plazo cu lo termina na comienso di 2018. E sistema aki, esta di bin cu "meerwerk", UPP a denuncia caba den pasado. Y sin a pega un blokki ainda, ya caba e fiesta a cuminza y ta parce cu tur esnan den gobierno y rond di e ministernan, a cay pa e "sweet talks" di Bermello, of nan a ricibi compensacion pa nan aprobacion.

Pa completa e asunto, a bin resulta cu MediRisk, e compania di seguro hulandes na unda tur seguro di hospital ta situa, a duna hospital un ultimatum di no lo ta segura e sala di operacion mas si e cambionan structural no a tuma lugar na mita di 2015. Y si a duna e compania Bussman e trabow, esaki lo caba cu ne dentro di e termino cu MediRisk a duna na HOH pa trece e cambionan necesario den e salanan di operacion.

Semper UPP a cuestiona e forma con henter e proyecto di hospital a wordo planea y ehecuta, pero lamentabelmente no a haya oido for di ningun hende, ni instancia, ni sindicatonan, ni gremionan. Aki sinembargo nos por constata cu ta bay tuma atrobe un decision cu lo costa pueblo mas di 5 miyon florin extra, y cu posiblemente lo nifica tambe cu MediRisk no lo para responsabel si algo mester sosode na e sala di operacion. Y un biaha mas djis pa complace cu e compania cu un reputacion dudoso Bermello pa haci e cambionan den e projecto cu lo no ta na beneficio di nos pueblo y cu lo costa hopi miyones extra, cu Bermello lo hinca den su saco, mescos cu ela haci den hopi projecto caba den pasado.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 11, 2015

Expresionnan haci den e articulo aki no necesariamente ta refleha opinion di ArenaPoliti.co