{idkey=1563b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1509-booshi-wever-upp-director-medico-ta-admiti-cu-no-ta-brindando-servicio-di-5-strea-na-hospital%3FItemid%3D101][title=Booshi+Wever+%28UPP%29%3A+Director+medico+ta+admiti+cu+no+ta+brindando+servicio+di+5+strea+na+hospital][desc=Mi+dedicacion+y+interes+den+e+mundo+di+salubridad+ta+wordo+goberna+pa+diferente+motibo.+Na+prome+lugar+pasobra%2C+como+ciudadano+di+Aruba+cu+a+yega+e+edad+bendiciona+di+61+a%C3%B1a%2C+lo+mi+ta+desea+di+por+sigui+disfruta+di+un+calidad+di+bida+rasonabel+na+unda+lo+mi+por+wak+mi+nietonan+crece+den+compania+di+mi+casa+y+mi+yiunan.+Un+calidad+di+bida+halto+ta+loke+obviamente+mi+ta+desea+tambe+na+tur+esnan+cu+ta+biba+riba+e+dushi+Baranca+cu+yama+Aruba.Otro+razon+importante+ta+pasobra+mi+famia+a+wordo+bendici]}
Mi dedicacion y interes den e mundo di salubridad ta wordo goberna pa diferente motibo.
Na prome lugar pasobra, como ciudadano di Aruba cu a yega e edad bendiciona di 61 aña, lo mi ta desea di por sigui disfruta di un calidad di bida rasonabel na unda lo mi por wak mi nietonan crece den compania di mi casa y mi yiunan. Un calidad di bida halto ta loke obviamente mi ta desea tambe na tur esnan cu ta biba riba e dushi Baranca cu yama Aruba.
Otro razon importante ta pasobra mi famia a wordo bendiciona cu yiunan cu a interesa nan mes den e area di medicina y ta trahando sea como dokter di cas, dentista, of ta cuminsando un specialisacion den medicina of ta studiando medicina. Medicina ta parti di nos bida diario.
Por ultimo Salubridad ta un parti di gobernacion cu ami tabata tin e honor y privilegio di por a maneha pa 8 aña largo y esey ta haci cu mi sa bastante di e materia concerni.

E motibonan aki a induci cu mi a purba di keda al tanto di tur e acontecimentonan cu a tuma lugar riba e area di salubridad, y cada bes cu mas y mas asombro mi mester a tuma nota di un maneho deficiente, anteriormente door di R. Visser, pero cu a culmina den un fracaso total bou di e minister actual A. Schwengle.
Ya caba e minister tin dos aña na mando, y te ainda nada di instalacion di un Inspector di Medicina.
No ban lubida cu prome cu su nombracion como minister, su mesun persona a declara cu su prome prioridad ta nombracion di un Inspector. Tampoco no ban lubida cu ya caba prome cu eleccion di 2013 minister de Meza a firma un contract cu e inspector saliente di Corsou, pero Schwengle a stop esaki despues.

Igualmente a bin sosode cu e minister mester a guli otro promesa, esta cu e lo bay dedica su tempo completo na salubridad y no sigui cu su trabou como specialista medico.
Kiko nos ta weita? E ta trahando atrobe como specialista parttime, y esaki tabata tin como consecuencia cu otro Arubiano mester a bandona su Isla pa bay traha como longarts na Corsow.
Te ainda e minister no a logra di cumpli cu otro promesa, esta di regresa parlamento cu e resultado di un investigacion cu lo mester a tuma lugar entorno e salanan di operacion na hospital y te ainda nada tampoco di e investigacion haci door di un instituto di Corsow pa loke ta trata posibel actonan fraudulento cometi door di un of mas cirugano na hospital.

Pero loke a yama mas mi atencion ta e declaracion di e director medico actual y e minister encuanto e problema cu a surgi entre e directiva di hospital y e sindicato ABV entorno e problema di CAO. A bin sali na cla cu hospital falta personal di enfermeria riba nivel di MBO. E minister ta admiti cu tambe tin falta di enfermeranan specialisa riba nivel di HBO pa cubri e cantidad di specialistanan medico cu lo a aumenta e ultimo añanan. E minister ta haci un declaracion à la Pontius Pilatus atrobe indicando cu en berdad a kita demasiado personal directamente involvi den cuido den pasado, pero cu esey a tuma lugar prome cu su tempo.
Kiko e minister a haci anto e ultimo dos aña, pasobra segun su mesun declaracion, e tabata tin un contacto estrecho cu e dirigentanan di hospital, y es mas: e mes ta trahando den hospital atrobe, pues lo por wak cu su propio wowo kiko ta sosode den cuido di pacient na hospital.

Pueblo no lo por spera un mehoracion di e cuido tampoco den futuro, pasobra e director medico ta duna di conoce cu probablemente hospital lo wordo obliga pa reduci su gastonan, pasobra su presupuesto ta depende di AZV y manera ta conoci cu AZV lo supuestamente bay ricibi placa di BAZV. Un consecuencia directo di e maneho aki ta cu e "landsbijdrage" lo wordo reduci substancialmente. E ultimo aki ta pasobra gobierno NO tin placa pa Salubridad, Enseñansa, nos Grandinan y nos Hendenan Special, pero si pa finansistanan di e partido na mando, y esaki por medio di otorgamento di contractonan pa proyectonan cu ta innecesario, of por lo menos no tin prioridad.
No ban lubida cu awor aki hospital ta paga 1 florin pa uso di e edificio, pero den futuro esaki lo bira casi 30 miyon florin pa aña.
Mi ta spera cu ABV tuma bon nota di esaki, pasobra no lo bay tin placa pa inverti ni den ekipo, ni den e cantidad di enfermeronan, ni pa "up-grading" di e enfermeronan, cu ta indispensabel den un pais cu kier propaganda su mes di ta uno di 5 strea.
Esey kiermeen tambe cu lo no ta bay tin placa tampoco ni pa mehora e salario di e enfermeronan y e otro empleadonan di HOH, y ni papia mes di e pension di e empleadonan di hospital cu nos tur sa cu ta den un situacion hopi precario. Ya caba e ta esun mas malo compara cu otronan riba nos pais.
Y UPP a mustra riba esaki caba na varios ocasion.
No tin cuido di 5 strea awor aki, y e futuro ta mustra di bira mas scur ainda, na unda e enfermero lo bay traha den un edificio nobo, pero sin e material pa por garantisa un bon cuido na e pacient.
Ban spera cu pueblo cuminsa actua contra tipo di maneho desastroso aki, prome cu mester bay sinti den carni propio e consecuencianan di esaki.


Den nomber di Union Patriotico Progresista – U.P.P.
Candelario A. S. D. Wever
Brazil, juli 30, 2015.

Expresionnan haci den e articulo aki no necesariamente ta refleha opinion di ArenaPoliti.co