{idkey=5680b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2753-gabinete-me-ii-conferencia-p3a-ta-un-evento-sin-precedente-y-transcendental-pa-futuro-di-aruba-y-37-otro-nacion%3FItemid%3D101][title=Gabinete+ME+II%3A+Conferencia+P3A+ta+un+evento+sin+precedente+y+transcendental+pa+futuro+di+Aruba+y+37+otro+nacion][desc=ORANJESTAD+%E2%80%93+Aruba+den+colaboracion+cu+Nacionnan+Uni+y+Reino+Hulandes+ta+organisando+un+Conferencia+Internacional+riba+e+tema+di+Public+Private+Partnership.+Nacionnan+Uni+ta+reconoce+tur+e+trabou+cu+Aruba+a+haci+como+un+ehempel+pa+principalmente+islanan+chikito+di+mundo%2C+esnan+mas+afecta+pa+cambio+climatico%2C+pa+crea+un+miho+futuro%2C+haciendo+miho+uzo+di+recursonan+natural+pa+produci+entre+otro+awa+y+coriente.Riba+dianan+22%2C+23+y+24+di+maart+awor%2C+37+isla+di+rond+mundo+lo+atende+e+conferencia+P3]}
ORANJESTAD – Aruba den colaboracion cu Nacionnan Uni y Reino Hulandes ta organisando un Conferencia Internacional riba e tema di Public Private Partnership. Nacionnan Uni ta reconoce tur e trabou cu Aruba a haci como un ehempel pa principalmente islanan chikito di mundo, esnan mas afecta pa cambio climatico, pa crea un miho futuro, haciendo miho uzo di recursonan natural pa produci entre otro awa y coriente.

Riba dianan 22, 23 y 24 di maart awor, 37 isla di rond mundo lo atende e conferencia P3A (www.p3a.org) na Aruba, caminda cu ta bay demostra con e formula aki a funciona pa Aruba y cual otro sistemanan por yuda e islanan nacion yega na e financiamento necesario pa proyectonan sostenibel.

Desaroyo sostenibel ta un concepto hopi amplio, pero su punto basico ta un balans di e necesidadnan di e pueblo teniendo cuenta cu e limitacionnan cu nos mundo riba tereno ambiental, social y economico. E principal ta e dependencia di combustibelnan fosil cu pa hopi tempo a causa un impacto riba e clima mundial y awendia ta trata di haci e cambionan necesario pa evita cu e clima ta sigui afecta naturalesa.

Aruba ta trahando riba e tereno aki, unda cu ta trata di uza menos recursonan tradicional y mas di nos recursonan natural, manera solo y biento pa produci awa y coriente. E trabou aki cu Aruba a haci den e area aki y den otronan, manera infrastructura, via e formula di Publica Private Partnership a hala atencion cerca Nacionnan Uni.

Desaroyo sostenibel ta un maneho cu ta busca e miho manera pa haci cosnan y lo sigura a lo largo un sociedad mas fuerte, saludabel y husto. Esaki pasobra ta busca un miho manera, por ehempel, pa produci productonan di alimentacion pero tambe e tin influencia riba e bienestar general di e ciudadanonan.

P'esey ta importante cu islanan rond mundo, cu no tin e recursonan financiero nan mes, cera conoci cu e miho practica y formulanan pa toch realisa proyectonan importante pa nan pueblo. Un di e practicanan aki ta e formula di Private Public Partnership.

Nacionnan Uni, pa medio di Chandra Acharya, a expresa cu e conferencia P3A mester haya un apoyo grandi di Gobierno di Aruba y di Hulanda, ya cu e ta uno cu ta wordo organisa na e momento husto y ta hopi importante pa e paisnan mas vulnerabel, manera islanan nacion chikito den desaroyo. Nan ta esnan cu ta wordo afecta pa e impacto di cambio climatico y ta buscando solucion pa e retonan cu mundo ta enfrentando.

“E conferencia aki lo duna un push fuerte pa Gobierno, companianan priva, institutonan financiero y di conocemento pa bini cu modelo y proyectonan pa PPP y promove interes di e pueblonan rond mundo. Nos ta contento cu nos lo ta compartiendo e miho practicanan cu e 37 islanan participantenan y otro invitadonan.”

Nacionnan Uni ta spera cu na final e conferencia por desemboca den un relacion mas estrecho entre e participantenan, e miho practicanan por wordo aplica den proyectonan grandi y por cambia con nos ta haci proyectonan.

E lo trece un impacto duradero riba bida di e hendenan cu ta biba riba islanan nacion den desaroyo. “E lo guia nos pa un futuro nobo unda sector priva y sector publico y otro institucionnan ta traha hunto pa contribui na desaroyo di SIDS,” Acharya a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co