{idkey=9538b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2754-chris-romero-mep-e-termino-sostenibilidad-ta-uno-basta-amplio-y-prome-minister-no-ta-dun-e-su-contenido-real%3FItemid%3D101][title=Chris+Romero+%28MEP%29%3A+E+termino+Sostenibilidad+ta+uno+basta+amplio+y+Prome+Minister+no+ta+dun%26%23039%3Be+su+contenido+real][desc=Siman+pasa+den+Parlamento%2C+durante+tratamento+di+Presupuesto+2016%2C+Promer+Minister+a+defende+enfaticamente+su+supuesto+Maneho+Sostenibel.Ironicamente%2C+ora+cu+nos+fraccion+a+cuestiona+e+supuesto+Maneho+Sostenibel+di+Gabinetenan+Mike+Eman+1+y+2%2C+e+Ministernan+di+e+Gabinete+aki+no+tabata+sa+kiko+pa+contesta+pasobra+nan+ta+consciente+cu+nan+no+ta+hibando+un+maneho+basa+riba+Sostenibilidad.+Un+Maneho+Sostenibel+ta+basa+riba+3+factor%3A+1.+Economia+-+2.+Sociedad+-+3.+Ecologia.Pa+por+papia+di+un+Maneho+S]}
Siman pasa den Parlamento, durante tratamento di Presupuesto 2016, Promer Minister a defende enfaticamente su supuesto Maneho Sostenibel.
Ironicamente, ora cu nos fraccion a cuestiona e supuesto Maneho Sostenibel di Gabinetenan Mike Eman 1 y 2, e Ministernan di e Gabinete aki no tabata sa kiko pa contesta pasobra nan ta consciente cu nan no ta hibando un maneho basa riba Sostenibilidad.

Un Maneho Sostenibel ta basa riba 3 factor: 1. Economia - 2. Sociedad - 3. Ecologia.
Pa por papia di un Maneho Sostenibel, e pais den cuestion mester por tin un economia stabil, mester por tin un maneho social satisfactorio den ambitonan cultural, educativo y mester por papia di un un porcentahe di criminalidad relativamente abou. E maneho ecologico di e pais mester ta consecuente cu e factornan economico y social di e comunidad.
Na momento cu ta duna prioridad, of exclusividad, na 1 di e 3 componentenan di Sostenibilidad, e ora no por papia di un Maneho Sostenibel mas.
Sociedad (Pueblo) mester keda central den un desaroyo sostenibel, garantisando un calidad di bida satisfactorio pa cada miembro di e comunidad.

Mayoria di nos ta familiarisa cu e frase "Mi pueblo ta muri pa falta di conocemento" y awe mas cu nunca, nos por comproba cu e maneho di sr. Mike Eman ta basa riba engaño pa asina purba mantene nos Pueblo ignorante.
Convenientemente, e maneho di Gabinete Mike Eman ta basa unicamente riba Energia Alternativo, ignorando asina e factornan unico y esencial di Sostenibilidad.
Ta di lamenta cu Gabinete Mike Eman ta purbando di manipula nos pueblo cu su supuesto Maneho Sostenibel, door di bende nos e idea cu un desaroyo sostenibel ta basa unicamente riba Energia Alternativo.

Si nos bay hasi un conteo di proyectonan (di e Gobierno actual) basa riba energia sostenibel, nos por mira cu unicamente e proyecto di Solar Panels na Aeropuerto a keda ehecuta pa e Gobierno di Mike Eman. Di cual nos ta hayando unicamente 2 Megawatt di e 130 megawatt cu Aruba mester y cu ta costando nos sociedad hopi placa, cual no ta hasi'e rendabel pa Aruba.
Gobierno di Mike Eman ta violando e principio di economia di un Maneho Sostenibel door di inverti un gran cantidad di placa den projectonan cu no ta facilita y/of drecha e calidad di bida di nos sociedad, y cu a contribui pa hinca nos Pais den un Mega Debe.

Mirando cu e Minister y Parlamentarionan di partido AVP a dicidi di trata e Presupuesto 2016 di Pais Aruba basa riba e Gobernacion anterior di partido MEP, mi ta hay'e necesario pa refresca nan memoria hasiendo enfasis riba e hecho cu tur otro proyecto cu a logra rebaha tarifanan di utilidad na Aruba, ta proyectonan di e ultimo dos Gabinetenan Oduber.
Realisticamente, y aunke e ta hasi partido AVP dolor, Mike Eman den su 6 aña di Gobierno no a logra desaroya proyectonan Sostenibel pa nos comunidad.
E termino Sostenibilidad ta uno basta amplio y sr. Eman no ta dun'e su contenido real.

Expresionnan haci den e articulo aki no necesariamente ta refleha opinion di ArenaPoliti.co