{idkey=1995b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2755-pdr-na-cuminzamento-di-maart-tin-encuentro-di-evaluacion-na-bonaire-tocante-fast-ferry%3FItemid%3D101][title=PDR%3A+Na+cuminzamento+di+Maart+tin+encuentro+di+evaluacion+na+Bonaire+tocante+fast+ferry][desc=Otro+tema+cu+Andin+Bikker+a+trata+den+rueda+semanal+di+prensa+ta+esun+di+fast+ferry+entre+e+Islanan+entre+Aruba%2C+Curacao+y+Bonaire%2C+y+e+otro+dimension+cu+ta+Sint+Maarten%2C+Saba+y+Sint+Eustatius.Bikker+a+splica+cu+e+proceso+di+fast+ferry+aki+ta+sigui+riba+e+%26amp%3Bnbsp%3Bbon+caminda+y+na+cuminzamento+di+Maart+ta+bay+tin+un+encuentro+na+Bonaire+tocante+esaki%2C+pa+evaluacionnan+por+wordo+presenta.Recientemente%2C+PDR+a+pasa+un+mocion+cu+tambe+a+wordo+aproba+unanimamente+durante+tratamento+di+presupuesto%2C+segun]}
Otro tema cu Andin Bikker a trata den rueda semanal di prensa ta esun di fast ferry entre e Islanan entre Aruba, Curacao y Bonaire, y e otro dimension cu ta Sint Maarten, Saba y Sint Eustatius.
Bikker a splica cu e proceso di fast ferry aki ta sigui riba e  bon caminda y na cuminzamento di Maart ta bay tin un encuentro na Bonaire tocante esaki, pa evaluacionnan por wordo presenta.
Recientemente, PDR a pasa un mocion cu tambe a wordo aproba unanimamente durante tratamento di presupuesto, segun Bikker a laga sa.
E mocion aki ta pa duna un biaha mas un empuhe pa yega na e servicio di fast ferry akinan, entre e tres Islanan.
Bikker a bisa cu algun tempo pasa ya nos a conoce caba un servicio di ferry , pero awor ta un fast ferry cu ta yega su destino hopi mas lihe.
Ta trata aki di un servicio di dos biaha pa dia entre Aruba y Curacao cu lo tuma na tempo 2 ora. Pero e dimension macroeconomico ta hopi importante segun Bikker.
Podise, hopi hende no ta realiza y hasta tin discusionnan andando, entre otro den Nacionnan Uni, incluso prome minister Eman a bay papia tocante e tema “Small Islands Development States”.
Bikker a splica cu hopi atencion ta wordo duna mundialmente awor, na e retonan cu netamente e paisnan cu mercadonan chikito tin y sigur Aruba cu tin un mercado chikito.
Mas grandi e mercado ta, mas e prijsnan ta baha segun Andin Bikker. Nos Islanan Aruba, curaçao y Bonaire y e dimension nobo Sint Maarten, Saba y St. Eustatius, tur ta enfrenta e reto di tin mercadonan chikito pesey e prijsnan ta proporcionalmente mas halto y door di esey e costo di bida tambe ta mas halto.
Si bin cu un ampliacion di mercado, por ehemplo door di un conexion di Fast Ferry tur dia, unda cada mainta ta bay y atardi ta bin back na un ora fiho e ta engrandece e mercado y bin cu dimensionnan cu nunca nos no a conoce, Bikker a bisa.
Esaki ta e filosofia macroeconomico tras di esaki, Andin Bikker a splica.
“E motibo pa cual Gobierno y Parlamento mester duna atencion na esaki, ta pasobra sector priva ta esun cu por inverti pa bin cu un ferry asina, pero e no por haci loke ta di gobierno”.
Gobierno ta esun cu por agiliza e procesonan por ehemplo di imigracion y control di costanan, pa e proceso di turn around por bay mas lihe.
Si ta asina cu e ferry ta bay tarda dos ora pa yega Curacao, pero mester warda 4 ora prome cu e start bay ta non sense.
Pesey FDA a contrata un grupo cu ta haciendo un analisis di tur e tecnologianan moderno cu tin na otro islanan caminda tin un servicio ferry funcionando caba. Nan ta bay wak con e ta trahando aya, con e por traha akinan, kico ta e proceso cu mester wordo agiliza, cual ta e leynan cu kizas mester wordo cambia of adapta y moderniza pa asina aki por tin un proceso di
turn around cu entre 20 minuut pa mey ora e por baha su carga di auto, containers y pasahero, y por subi lama back sigui su destino.
E gobiernonan di e islanan menciona y tambe Hulanda a firma un MOU caba y Parlamento a pasa un mocion unanime pa duna sosten un bez mas na e proceso aki segun Andin Bikker y su expectativa ta cu pronto e proyecto aki ta bira un realidad.
PDR ta haya hopi pregunta di parti di hende interesa, entre otro esnan di Hardy Davidson, cu tur aña ta participa den e dianan nacional di nos islanan y cu transporta nan bromer ta costa nan hopi placa. Pesey e lider di PDR ta spera cu gobiernonan agiliza e proceso aki mas pronto posible.

Expresionnan haci den e articulo aki no necesariamente ta refleha opinion di ArenaPoliti.co