{idkey=7546b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F4035-benny-nisbet-ppa-instrumento-di-transporte-pa-venezuela-si-pa-districto-di-san-nicolas-aparentemente-no%3FItemid%3D101][title=Benny+Nisbet+%28PPA%29%3A+%E2%80%9CInstrumento+di+transporte++pa+Venezuela+si%E2%80%A6.Pa+districto+di+San+Nicolas+aparentemente+no+%21%21%E2%80%9D][desc=E+informacion+di+e+ferry+cu+lo+cuminsa+navega+for+di+Paraguana+pa+Aruba+despues+pa+Corsow+etc+a+hala+masha+atencion+di+pueblo.+Mester+bisa+cu+un+bon+parti+di+pueblo+a+expresa+palabranan+di+critico+mirando+e+periodo+dentro+di+cual+esaki+lo+inicia%E2%80%A6.esta+un+posibel+explocion+social+na+Venezuela+y+e+apertura+di+e+%E2%80%98upgrader%E2%80%99+na+unda+un+80%25+di+e+trahadornan+lo+ta+Venezolano+ta+conincidi+cu+otro+y+ta+crea+risico.Peor+a+resulta+ora+varios+Ministro+incluso+nos+Min+Pres+Mike+Eman+y+diferente+directo]}
E informacion di e ferry cu lo cuminsa navega for di Paraguana pa Aruba despues pa Corsow etc a hala masha atencion di pueblo. Mester bisa cu un bon parti di pueblo a expresa palabranan di critico mirando e periodo dentro di cual esaki lo inicia….esta un posibel explocion social na Venezuela y e apertura di e ‘upgrader’ na unda un 80% di e trahadornan lo ta Venezolano ta conincidi cu otro y ta crea risico.

Peor a resulta ora varios Ministro incluso nos Min Pres Mike Eman y diferente director di departamento a expresa cu nan NO ta na altura di un desaroyo asina corda acuerdo riba e tereno aki mustrando na mes momento na e necesidad di infrastructura y personal cu lo mester tin ‘in place’ cu actualmente no ta e caso.

Grandi tabata sorpresa di nos pueblo ora a resulta cu debidamente tin un acuerdo entre Venezuela y Aruba ora a worde referi na un delegacion di Reino cu a bishita Venezuela na 2013  na unda ‘secretaris’ Timmermans di Hulanda y Ministro Presidente Mike Eman y Ministro Presidente di Corsow lo a participa y a aproba e projecto di un Ferry. Cu otro palabra na regreso di nos Ministro Presidente Mike Eman no a informa e departamentonan conserni y no a hasi ningun preparacion pa e Ferry cuminsa cu su servicio despues cu esaki a keda aproba entre Venezuela y Reino Hulandes/ Aruba …un caso hopi tristo pa cu e ‘dejado’ di nos gobierno di Aruba.Un blunder di primer orden di parti di Ministro Presidente Mike Eman !!   Mientras tanto e compania envolvi na Venezuela debidamente a inverti hopi fondo den un Ferry cu aparentemente a worde construi na Grecia y ta cla pa cuminsa cu servicio  commercial/turistico.

E caso aki ta un ‘verguenza publico’ pa pueblo di Aruba unda nos gobernantenan a faya barbaramente ! Cu den pueblo tin preucupacion pa cu e inicio di e servicio aki nos por comprende mirando e situacion social na Venezuela y mirando e cantidad di crimen na Aruba y tur e ‘risico extra’ cu un servicio asina lo por trece cunele. Sinembargo e acuerdo ta hasi kaba entre paisnan y Aruba lo mester cumpli cu su palabra. Ta na nos gobernantenan y departamentonan por pone un  proceso ‘in place’ for di unda por controla henter e procedura aki y tur hende envolvi.

Venezuela SI….San Nicolas  NO !!

E critica cu PPA kier expresa acerca ta…e hecho cu aki un instrumento di transportacion  ta worde crea pa  sostene e economia di  e.o. Venezuela.  E presencia di un Ferry asina lo trece cunele cu turistanan cu normalmente ta bishita Aruba pa p.e. un siman ‘por dicidi’ mi ta ripiti ‘por dicidi’  di keda Aruba 4 dia y bai  Venezuela y/of otro destinacion pa e otro tres dia. Den practica e instrumento aki lo por kita entrada for di pais Aruba ora ta trata nos bishitantenan. Pa nos localnan e ta nifica un instrumento di transportacion acerca basa riba cual nos por bishita nos hermana islanan di Corsow y kizas Bonairo y Venezuela. PPA kier a para un rato na e prome parti unda ta trata bishitantenan/turistanan cu por scoge pa bai afor… PPA den pasado a presenta un mocion den parlamento unda nos tabata boga pa gobierno pone fondo disponibel pa mercadea  San Nicolas. E mocion aki a worde rechasa e tempo ey pa fraccion di MEP den parlamento nos ta referi na epoca 2001-2005 cu MEP tabata goberna. Te dia di awe no tin un maneho di mercadea San Nicolas como districto mas pariba di nos Isla…. No tin un of mas instrumento cu tin como meta ‘mercadea’ San Nicolas su potencialnan, PPA ta jama esaki ‘San Nicolas, Our Caribbean Town’. Y mientras nos no ta mercadea ‘the other side’ esta e parti ‘ pariba di Brug’ …awor ta resulta cu gab Mike Eman a bai di acuerdo pa un instrumento cu ta crea posibilidad pa e turistanan cu bini Aruba bai Venezuela y otro destinacionan  !! PPA no tin nada contra presencia di un Ferry al contrario nos ta kere cu e ta un instrumento necesario. Solamente PPA ta cuestiona e  prioridad di gabinete Mike Eman y e temporada cu esaki ta inicia ?

E hecho cu ta drechando algun caya den San Nicolas y ta pinta riba muraya simpelmente no ta suficiente……un maneho di mercadeo …..un of mas instrumento di esaki ta locual por hasi e fluho real di turista pa San Nicolas bira realidad.

Den PPA su programa pa eleccionan ultimo PPA  ta referi na dos instrumento importante necesario pa desaroyo di San Nicolas:

• Un sistema di bus (estilo trolley) destina pa ofrece tour solamente pariba di Brug cu accento den San Nicolas y vecindario !!
  
  
• ‘Sea Land Tour & Transport’ (SLTT) Un sistema di transporte via lama cu ta ofrece turista un tour riba lama ‘dilanti costa’ for di hotelnan pa sea Savaneta of Zeewijk/beach di Cura Cabay  y despues ta worde ofrece un ‘tour’ den bus rond di San Nicolas y vecindario  y cu segun protocol lo mester para y duna oportunidad pa turista hasi shopping sea na cierto sitio turistico cu por eleva …y dentro di comercio di San Nicolas. Turistanan lo por scoge si nan kier regresa nan Hotel via di Lama of cu nos sistema di bus (estilo trolley) of hasta cu Taxi.
  
  

Manera pueblo por sa …gab Mike Eman(AVP) a presta e idea di PPA pa un ‘streettrolley den centro di Oranjestad for di programa di PPA y a  presta e idea di  upgrade ‘watertoren’, Nicolaas Store y e pintamento riba muraya na San Nicolas. Pero visiblemente nan NO a presta e idea di PPA pa tanto ‘bustrolley’s y un Land  & Sea Tour Service(SLTT) manera menciona den tanto nos ‘AGENDA FOR SAN NICOLAS’ como den nos PLAN ECONOMICO pa desaroyo di Aruba y cu accento pa desaroyo na San Nicolas.  Aki net e instrumento pa desaroya San Nicolas a keda atras . Pasobra si bo no ta trece turista diariamente pa San Nicolas bo por desaroye realmente…

Cu otro palabra  gab. Mike Eman aparentemente ta contribui pa crea un instrumento pa desaroyo turistico/commercial  di Venezuela pero NO ta crea un instrumento pa desaroyo di  p’ariba di Brug, San Nicolas y vecindario…….San Nicolas, Our Caribbean Town…of simpelmente  ‘The other side’ di  Aruba.

Pa San Nicolas un UPGRADER cu tin su by/waste products di ‘Pet coke y sulphur/asufre’ ta bon cu su posibel CO2 y su posibel ‘cancer’ y su holor di ‘webo putri’ aparentemente ta bon… cu ta frena desaroyo commercial/turistico di San Nicolas   pero  un instrumento pa desaroyo real  di ‘San Nicolas, Our Caribbean Town’ NO  ta hanja e minimo atencion… Kada kende por huzga pa nan mes.

Aruba 8 di September 2016                                      Lider Politico di PPA

                                                                                      BENNY NISBET

Expresionnan haci den e articulo aki no necesariamente ta refleha opinion di ArenaPoliti.co