{idkey=84b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2759-parlamentario-mr-xiomara-maduro-mep-tur-instancia-ta-mustra-cu-e-presupuestonan-di-gabinete-eman-no-ta-realistico%3FItemid%3D101][title=Parlamentario+mr.+Xiomara+Maduro+%28MEP%29%3A+Tur+instancia+ta+mustra+cu+e+presupuestonan+di+Gabinete+Eman+no+ta+realistico][desc=Nos+a+tuma+nota+di+intentonan+di+e+lider+di+Fraccion+di+AVP+pa+manipula+Pueblo+cu+informacion+financiero+cu+no+ta+cuadra+cu+berdad.+Sr.+Baba+Herde+kier+pa+Pueblo+kere+cu+e+presupuestonan+di+Gabinete+Eman+ta+realistico.+E+ta+tristo+pa+bisa%2C+pero+ta+den+Emanlandia+so+te+ainda+nan+no+kier+realisa+cu+tur+instancia+ta+mustra+cu+e+presupuestonan+di+Gabinete+Eman+no+ta+realistico.Presupuesto+2014+cu+of+sin+APFA+no+ta+realistico%26amp%3Bnbsp%3BSegun+Baba+na+2014%2C+como+cu+Gobierno+bou+di+precion+di+CFT+mester+a+hi]}
Nos a tuma nota di intentonan di e lider di Fraccion di AVP pa manipula Pueblo cu informacion financiero cu no ta cuadra cu berdad. Sr. Baba Herde kier pa Pueblo kere cu e presupuestonan di Gabinete Eman ta realistico. E ta tristo pa bisa, pero ta den Emanlandia so te ainda nan no kier realisa cu tur instancia ta mustra cu e presupuestonan di Gabinete Eman no ta realistico.

Presupuesto 2014 cu of sin APFA no ta realistico 
Segun Baba na 2014, como cu Gobierno bou di precion di CFT mester a hinca 200 miyon den e fondo di APFA, pesey e deficit tabata asina halto y a yega 9.4%. Si kita e suma di APFA, e ora e deficit lo tabata na 5% y lo ta cumpli cu e deficit manera palabra pa 2014. Sinembargo ora nos lesa e rapport di CFT di 25 di november 2015 riba pagina 3, nos ta constata cu Baba no ta papia e berdad. Si kita APFA afor, e deficit ta yega na 5,8% cu ta mas hopi cu e 4,9% na deficit cu Gabinete Eman a presenta den presupuesto 2014 y hopi mas cu 4,6% na deficit cu Gabinete Eman a hinca den su plan Balanced Budget 2014-2018. Lesa e rapport di Algemene Rekenkamer Aruba riba presupuesto 2014 riba pagina 23, e instancia aki tambe ta mustra cu Gabinete Eman no a cumpli cu su mesun plan Balanced Budget pa 2014. Ta bon pa remarca si cu Gabinete Eman no a hinca placa den APFA. Ta como cu nan tabata DEBE APFA placa di prima y cu CFT tambe a mira e risico di e deal di 15 aña cu Gabinete Eman a sera e tempo ey cu APFA, CFT a pone precion pa Gabinete Eman atende cu e fondo di pensioen. Gabinete Eman a baha e gasto di prima cu gobierno ta paga na APFA (cortando den beneficio di e futuro pensionado) y a traha un fianza di 170 miyon florin serca e propio APFA pa asina yena e buraco cu nan a traha den e fondo pa di e manera ey drecha e cobertura di e fondo. Pues no ta APFA tabata e problema di e presupuesto 2014, pero ta e mal maneho financiero di Gabinete Eman ta locual a pone cu e deficit a keda halto y cu nan no a cumpli cu nan mesun plan pa drecha finanzas publico.

Den 2015 e deficit lo ta mas grandi
Instancianan manera CFT y Raad van Advies a adverti Gabinete Eman cu e presupuesto 2015 no ta realistico y cu e deficit lo ta mas grandi cu e 3,7% di deficit cu gobierno a premira pa 2015. For di cifranan di Banco Central saca for di e Statistical Tables, third quarter 2015 di 7 di januari 2016 riba pagina 39 nos por constata cu te cu e tercer kwartaal di 2015 ya caba e deficit tabata na 4,7%. Pues aki atrobe informacion di instancianan manera CFT, Raad van Advies y Banco Central ta domestra cu Baba Herde no ta papia e berdad.

Lesa y informa bo mes
E manipulacion di Gabinete Eman y e manera descabeya cu e lider d Fraccion di AVP ta malinforma Pueblo ta pone cu nos mester desbarata e ponencianan eroneo aki mustrando Pueblo unda e prueba di e manipulacion y engaño ta. Lo ta bon pa tur esnan interesa pasa den e informacion y comproba pa boso mes cu e informacion presenta pa Lider di Fraccion di AVP no ta cuadra cu realidad.

11 februari 2016

Expresionnan haci den e articulo aki no necesariamente ta refleha opinion di ArenaPoliti.co