{idkey=1055b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2770-karel-maduro-mep-mike-eman-e-ta-of-e-no-ta%3FItemid%3D101][title=Karel+Maduro+%28MEP%29%3A+Mike+Eman%2C+E+ta+of+e+no+ta%3F][desc=Pueblo+di+Aruba%2C+normalmente+un+asunto+cu+no+ta+interesa+bo%2C+bo+no+ta+pone+atencion+na+dje.+Pero+ora+un+Prome+Minister+ta+trece+informacionnan+padilanti%2C+di+cual+abo+sa+cu+no+ta+berdad%2C+esaki+mester+intriga+bo+persona+pa+cuestiona+dicho+informacionnan.+Awor+cu+e+Presupuesto+2016+a+wordo+aproba+pa+medio+di+un+resultado+masha+miserabel+mes%2C+Prome+Minister+ta+sali+manera+un+heroe+bin+bisa+cu+su+gobierno+ta+completando+sostenibilidad+di+finanzas+publico.+Esaki+ta+parcialmente+berdad.+E+parti+cu+ta+b]}
Pueblo di Aruba, normalmente un asunto cu no ta interesa bo, bo no ta pone atencion na dje. Pero ora un Prome Minister ta trece informacionnan padilanti, di cual abo sa cu no ta berdad, esaki mester intriga bo persona pa cuestiona dicho informacionnan. Awor cu e Presupuesto 2016 a wordo aproba pa medio di un resultado masha miserabel mes, Prome Minister ta sali manera un heroe bin bisa cu su gobierno ta completando sostenibilidad di finanzas publico. Esaki ta parcialmente berdad. E parti cu ta berdad ta, cu gobierno a sostene su mes riba instancianan financiero pa por a cubri e resultadonan negativo di tur e añanan di gobernacion di Gabinete Eman 1 y 2. Gobierno Eman a sostene (fia) su mes riba lomba di AIB, Centrale Bank , Obligatieleningen Afl. 821.3 miyon, CMB Afl. 285 miyon, USA Bonds & Loans: US$ 915.6 miyon @ ± 1.825. Awor bo ta mira y compronde con Eman a duplica e debe nacional cu Afl. 2.776.9 biyon extra. Esaki ta e placa cu Eman a fia pa fiesta y gaba cun’e. Un hende bon di cabes lo por bisa anto cu su gobierno a maneha finanzas publico di Aruba di un manera responsabel? Dicon si ta responsabel, Eman su gabinete na 2014 a haya un KB for di Hulanda pa para cos? Dicon si ta asina responsabel, Eman su gobierno y parlamentarionan a wordo forsa, “verkracht” pa a vota ‘voor’ pa asina conscientemente bay bao di supervision di CAFT/CFT? Perdiendo e autonomía financiero como pais? Eman por puntra Wyatt Ras si no ta berdad. Dicon si ta asina responsabel, Aruba bao di mando di Eman su gobiernonan a baha den rating compara cu 2009? Bayendo di un rating A pa BBB negativo? Ta duro pa kere cu un Prome Minister por mira su pueblo cu un expectativa asina abao! Pesey mes Eman lo por a bisa Presidente di Parlamento pa vota ‘voor’ pa e presupuesto 2015. Pasobra toch e pueblo di Aruba ta lubida lihe! Pa corona e test si e por ta bon di cabes ta cu su persona ta declara publicamente cu deliberadamente su gobierno a scoge pa crea e debe pa Aruba y cu NOS tur tin cu bay paga esaki den futuro! Aki Eman a kibra e barera di berguensa y ta desafia e inteligencia di e pueblo.

Tambe e 9.4% deficit di e GDP, cu Eman ta gaba di a baha, ta kende a crea esaki? Cua gobierno di cual signatura ta responsabel pa esaki? Ki consecuencianan tabata tin door di e 9.4%? Cual ta e fondonan di pueblo anto cu gobierno di Eman a inverti? Ta fia so su gobierno a fia pa inverti? E presupuesto 2016 tambe tin inclui cu gobierno lo bay bende propiedad na balor di 11 miyon florin atrobe! E maldito ABB tambe ta inclui den esaki. Con Eman por bisa anto cu su gobierno por ta uno sostenibel? Ta e pueblo ta bay paga pa e debe. No ta su gobierno ta bai cubri esaki cu crecemento economico.  Esaki ta haci bo corda riba e filosofianan di sr. Pachi Damon relaciona cu e argumento di ta bobo. E bobo inocente: tur hende sa y te so no sa cu e ta. Asina ta e caso cu Prome Minister? Tur hende sa con malo su gobierno a traha y ta e so no sa? Pregunta: E ta of e no ta?

Expresionnan haci den e articulo aki no necesariamente ta refleha opinion di ArenaPoliti.co