{idkey=8557b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F627-mike-eman-aruba-contento-cu-elogio-y-recomendacionnan-di-imf%3FItemid%3D101][title=Mike+Eman%3A+Aruba+Contento+cu+Elogio+y+Recomendacionnan+di+IMF][desc=Den+un+forma+profesional+y+neutral+Aruba+a+wordo+analisa+dor+di+IMF.%26amp%3Bnbsp%3B+ORANJESTAD+-+Prome+Minister+Mike+Eman%2C+compa%C3%B1a+pa+Minister+di+Finanza+y+Organisacion+Gubernamental+Bermudez+y+Minister+di+Economia%2C+Energia%2C+Comunicacion+y+Medio+Ambiente+de+Meza%2C+a+duna+un+conferencia+di+prensa+relaciona+cu+e+rapport+di+IMF.+Eman+a+bisa+di+tin+sentimentonan+di+satisfaccion+y+orguyo+grandi+pa+loke+IMF+a+constata.+%E2%80%9CIMF+ta+bisa+cu+e+trabou+grandi+haci+ta+bon%2C+pero+cu+tin+mas+trabou+pa+haci+ainda.%E2%80%9D+Cu+e]}
Den un forma profesional y neutral Aruba a wordo analisa dor di IMF. 

ORANJESTAD - Prome Minister Mike Eman, compaña pa Minister di Finanza y Organisacion Gubernamental Bermudez y Minister di Economia, Energia, Comunicacion y Medio Ambiente de Meza, a duna un conferencia di prensa relaciona cu e rapport di IMF. Eman a bisa di tin sentimentonan di satisfaccion y orguyo grandi pa loke IMF a constata. “IMF ta bisa cu e trabou grandi haci ta bon, pero cu tin mas trabou pa haci ainda.” Cu e trabou grandi haci ta bon, a keda refleha den e rapport cu IMF a emiti diabierna ultimo. Un rapport cu no ta laga espacio pa duda pa loke ta e forma con Aruba a sa di sali di e dobel crisis cu el a haya su mes aden. E rapport ta indica cu economia a crece, desempleo a baha, reformanan haci tabata bon, e deficit financiero ta bahando, e maneho di sostenibilidad ta un pilar di diversificacion nobo pa Aruba y IMF a señala otro aspectonan constructivo mas.

Eman a subraya e neutralidad di IMF cu ta e instancia mas grandi den mundo financiero. “No tin un otro cu IMF pa duna un huicio, un veredicto riba e maneho di gobierno di Aruba den e ultimo añanan.”

“Finanzas publico, economia y desaroyo di nos pais tabata temanan di debate durante e ultimo lunanan na nivel di Reino, na nivel politico local, pero tambe internacional,” Eman a bisa. Aruba tabata en espera di un instancia imparcial pa meymey di tur e incertidumbre, tur debate y discusionnan por a trece un claridad kitando aspectonan politico, partidista, y tambe agendanan pa cambionan constitucional cu nos conoce den nos pais y pa nos pais, pa den un forma profesional for di un punto di perspectiva di cierto distancia duna su veredicto.” IMF a yega na su conclusionnan constructivo pa Aruba despues di a sinta dos siman largo cu casi tur instancia, cu a scrutina finanzas, economia y cifranan di pais Aruba e institucion di evaluacion a yega na e conclusion cu ta motibo di gran orguyo.

Eman a haci referencia na loke IMF a pone den su rapport cu despues di e crisis internacional cu mundo a pasa aden desde 2007/2008, ta masha poco pais por bisa cu na aña 2015 nan a recupera economicamente manera Aruba a recupera. Prome Minister a bisa cu si ta el a bisa esaki na varios ocasion durante e ultimo aña y lunanan of Mike de Meza of Angel Bermudez of Juan David Yrausquin, semper esaki lo a cay den un contexto politico. “P’esey cu pa nos ta un sentido grandi di confirmacion di un rumbo cu nos a scoge. Aruba, un pais chikito meymey di un incertidumbre grandi di mundo, a fiha un maneho aceptando e reto di 2009. E recesion di mas grandi cu Aruba a conoce desde ciere di LAGO, ta loke nos a hereda na 2009”. Manera IMF mes tambe a señala, Aruba a pasa den un recesion cu un dobel impacto. Recesion  mundial di e caida internacional di economia di 2007/2008 cu a sacudi mundo henter cu a causa cu paisnan a bay bancarota y institutonan financiero cu a cera. “Mundo a tembla pa motibo di e crisis aki y Aruba tambe a sinti e efectonan di e temblor aki”. Eman a splica cu na mes momento manera un ‘perfect storm’ Aruba a haya su mes confronta tambe cu ciere di e refineria. “Un impacto grandi. Awe na 2015 IMF ta regresa Aruba despues di dos aña y ta constata un crecemento economico impresionante di pais Aruba, un reduccion grandi di desempleo, un reduccion di e deficit di Aruba, reformanan cu a wordo efectua ta grandi y impresionante , IMF ta constata cu Aruba tin e vision pa loke ta trata diversificacion di economia y haci e pais menos dependiente di crudo loke pa IMF ta un vision cu potencialnan hopi grandi.”

Expresionnan haci den e articulo aki no necesariamente ta refleha opinion di ArenaPoliti.co