{idkey=9392b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F648-gerick-croes-mep-si-cos-ta-bon-pakiko-mester-bin-cu-medida%3FItemid%3D101][title=Gerick+Croes+%28MEP%29%3A+Si+cos+ta+bon%2C+pakiko+mester+bin+cu+medida%3F][desc=Hopi+biaha+bo+ta+tende+parlamentarionan+di+AVP+papia+di+un+situacion+caotico+cu+a+keda+atras+na+2009.+Aunke+na+2009+Aruba+a+conoce+un+caida+economico+door+di+crisis+financiero+mundial+y+door+di+Valero%2C+nunca+antes+Aruba+a+yega+di+confronta+su+mes+cu+un+dilema+financiero+manera+esun+actual.+Apesar+cu+partido+AVP+a+keda+nenga+esaki+te+na+ultimo%2C+cu+e+ponemento+di+un+KB+%28decreto+real%29+riba+henter+e+Gabinete+Eman+II%2C+tur+hende+a+ha%C3%B1a+e+confirmacion+e+ora+ey+caba+e+disputa+di+nos+situacion+financier]}
Hopi biaha bo ta tende parlamentarionan di AVP papia di un situacion caotico cu a keda atras na 2009. Aunke na 2009 Aruba a conoce un caida economico door di crisis financiero mundial y door di Valero, nunca antes Aruba a yega di confronta su mes cu un dilema financiero manera esun actual. Apesar cu partido AVP a keda nenga esaki te na ultimo, cu e ponemento di un KB (decreto real) riba henter e Gabinete Eman II, tur hende a haña e confirmacion e ora ey caba e disputa di nos situacion financiero. Realidad ta cu mal maneho financiero a tuma lugar den un tempo record y esaki mester yega na su fin. Tanto gremionan local (manera Camara di comercio), instancia di supervision CFT y awor MF ta conclui di verdad e dilema financiero ta uno grandi y cu lo tuma nos pais hopi anja pa recupera for di esaki pasobra gobierno di Mike Eman no tin credibilidad.

E ultimo rapport di CFT ta clarifica basta di e ponencianan manipula di AVP cual entre otro ta e supuesto danjo di BBO. AVP a critica e BBO y despues e mes a bolbe aumente y awor diripiente ta papia di cambio directo na indirecto. Banda  di componentenan di entrada di nos pais CFT a indica bon cla cu crecemento di gastonan (uno drastico) pero tambe e caida den entrada di belasting en general a pone cu e deficitnan financiero di nos pais a keda crece y automaticamente ta pone cu nos debe nacional ta aumenta. Desde Status Aparte nunca Aruba a yega di conoce un debe nacional di 80.7% . Remarcabel ta CFT y IMF a indica cu e percentahe aki lo no bai conoce mehoracion tampoco a corto plazo pasobra e plan di gobierno falta credibilidad y ta incompleto. Es mas, segun CFT su analisis te na aña 2034 nos lo yega na normanan aceptabel pa cu nos debe nacional si tuma mas medidad! Pueblo mester puntra su mes si ta husto cu den solamente 5 anja Gabinete Eman a “malogra” e futuro di Aruba.

Medidanan

Pa loke ta trata medidanan pueblo di Aruba a conoce un pakete di medida cu ya caba a drenta na vigor 2014 pero e magnitud di e problema financiero di nos pais ta uno asina grandi cu lamentablemente e cuidadanonan di Aruba lo bai conoce medidanan aun mas rigoroso di parti Gabinet Eman. Falta di prioridad y seriedad den gobernacion a causa cu por ehempel e cuidadano ta pagando gastonan extra di AZV (eerste hulp, huisartsenpost). Como sifuera ta poco a aumenta BBO december ultimo pa AZV por haya fondo y awor ta resulta cu e maneho di gobierno ta uno asina deficiente cu lo rekeri aun mas.

E hecho cu nos pais añanan tras di otro tin deficitnan structural a ocasiona cu no tin placa pa nada! Segun parlamentario y mandatarionan di AVP diferente di e medidanan na caminda lo ta pa cubri gastonan specifico (cual riba su mes ta un excusa pa tapa mal gobernacion). Pregunta cardinal cu ta surgi ta : pakiko e cuidadano mester bai paga mas siendo cu e ta pagando su fair share caba cu impuesto? Si cos ta bon , pakiko mester bin cu medida? E contesta ta uno facil ; ta pasobra AVP a malgasta fondonan publico na un manera iresponsabel y cu awor no tin placa pa hasi nada mas! AVP a crea un desaster pa nos pais perhudicando tur cuidadano! Y enbes di hasi ehercicionan pa reduci den diferente caminda entre otro ministernan, coordinadornan, gastonan lucrativo, ta opta pa pone ABO cuidadano paga pa nan erornan pa despues por bisa cu nan a traha algo bunita somewhere. Un cos ta sigur si cosnan di berdad ta bon, nunca niun cuidadano lo mester a confronta  medidanan sacrificando nan cartera pa un gobierno sin piedad keda engrandese e dilema financiero aki.

Expresionnan haci den e articulo aki no necesariamente ta refleha opinion di ArenaPoliti.co