{idkey=1858b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2820-minister-benny-sevinger-mehoracion-di-barionan-ta-continua-den-2016%3FItemid%3D101][title=Minister+Benny+Sevinger%3A+Mehoracion+di+barionan+ta+continua+den+2016][desc=ORANJESTAD+%E2%80%93+Minister+di+Infrastructura%2C+pero+tambe+encarga+cu+departamento+di+DTI+a+combersa+cu+famia+Lugo+di+Timonstraat%2C+entre+otro+e+siman+aki+contento+di+finalmente+por+a+cumpli+cu+nan+deseo+di+instala+luznan+LED+pa+ilumina+mas+e+cayanan+anochi.+DTI+ta+forma+parti+di+e+proyecto+di+instalacion+di+puntonan+nobo+di+luz+rond+di+Aruba%2C+ademas+di+cambia+esnan+existente+pa+sistema+LED.+E+departamento+ta+inspecciona+cu+e+conexion+ta+wordo+haci+manera+mester+ta.+Minister+Sevinger+ta+orguyoso+di+fo]}
ORANJESTAD – Minister di Infrastructura, pero tambe encarga cu departamento di DTI a combersa cu famia Lugo di Timonstraat, entre otro e siman aki contento di finalmente por a cumpli cu nan deseo di instala luznan LED pa ilumina mas e cayanan anochi. DTI ta forma parti di e proyecto di instalacion di puntonan nobo di luz rond di Aruba, ademas di cambia esnan existente pa sistema LED. E departamento ta inspecciona cu e conexion ta wordo haci manera mester ta. Minister Sevinger ta orguyoso di forma parti di un gobierno cu ta duna atencion no solamente na e mehoracion di entrada economico di e famia Arubiano, pero tambe ta tene cuenta pa e infrastructura den su bario, ta uno agradabel y cu ta brinda siguridad.

E proyecto ‘Luz den Bario’ a cuminsa na 2012 y despues di cambia y instala miles di puntonan nobo di luz, awo ta inicia su siguiente fase den 2016. “E ta un proyecto cu Gobierno ta mira den diferente aspecto: Un ta e aspecto di siguridad den e barionan caminda mas luz bo tin, mas siguridad bo tin; dos ta cu e ta baha nos consumo di coriente como gobierno; y tres e ta bay den tecnologianan berde cu ta miho pa nos medio ambiente. E metanan ey Gabinete Mike Eman II a pone su dilanti pa loke ta maneho di luz publico y nos ta implementand’e,” asina Minister Sevinger a splica.

Atrobe ta un muestra di con Gabinete Mike Eman I y II ta traha den ekipo caminda e Ministerio di Sevinger ta involucra pa medio di DTI, pero Minister de Meza cu ta representa compania estatal ELMAR N.V., hunto cu Minister di Finanzas ta aloca e fondonan necesario. Prome Minister Mike Eman ta sigui e avancenan di cerca y ta duna un empuhe ora cu ta necesario.

E titular di infrastructura, pero tambe Medio Ambiente a duna di conoce cu “Minister President tur siman ta cana den e barionan y tur siman ta traha lista, no solamente di infrastructura, pero tambe social. Tur esaki ta wordo papia den Conseho di Minister y cada Minister riba su turno ta cumpli cu loke e bario ta desea y loke nan a trece dilanti. Nos ta contento cu e bario di Madiki a haya su infrastructura y awo ta haya su cambio di luz. Esaki lo sigui den tur otro barionan di Aruba.” Como un ciudadano naci, lanta y biba den Madiki, naturalmente esaki ta representa un sentido extra di satisfaccion.

E bario di Madiki ta un di e prome barionan cu nos a cambia su infrastructura y cu tabatin hopi peticion y ta un bario cu tin hopi aña di existencia. Riba ordo di Ministernan Eman y Sevinger DIP, INFRA Team y Comision BoBario a logra pa bin cu un plan pa cambia henter e bario. A haci mayoria caya di un solo via pa crea espacio pa autonan por para y hancha e aceranan caminda hendenan por cana y muchanan por hunga cu tur trankilidad. Tambe a pone matanan tur caminda pa haci’e mas agradabel y ora cu e matanan ta grandi, duna sombra. Awo, por ultimo, a bin cu e iluminacion LED cu ta mas cla.

Pero Minister Sevinger no ta pensa riba of caba na Madiki. E ta e prome pa recorda cu Gabinete Mike Eman II ta bay haci mescos pa tur otro bario di Aruba tambe. “Nos a haci hopi pa bario den e ultimo añanan, y den aña cu ta bin esta 2016 y 2017, tin un lista largo di bario pa drecha.” Di e manera aki trabou ta continua.

Expresionnan haci den e articulo aki no necesariamente ta refleha opinion di ArenaPoliti.co