{idkey=1469b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3670-minister-president-mike-eman-nos-ta-bay-ta-un-di-e-prome-paisnan-na-mundo-pa-cambia-tur-su-lusnan-di-caya-pa-led%3FItemid%3D101][title=Minister+President+Mike+Eman%3A+%E2%80%9CNos+ta+bay+ta+un+di+e+prome+paisnan+na+mundo+pa+cambia+tur+su+lusnan+di+caya+pa+LED%E2%80%9D][desc=ORANJESTAD+%E2%80%93+Smart+Grid+cual+ta+consisti+di+Smart+LED+pa+iluminacion+publico+y+Smart+Meters%2C+ta+un+proyecto+hopi+importante+cu+ELMAR+N.V.+a+bin+ta+traha+riba+dje+durante+ultimo+par+di+a%C3%B1a.+E+ta+cuadra+cu+e+vision+%E2%80%98berde%E2%80%99+di+Gobierno+pa+cambia+tur+e+puntonan+di+luz+convencional+pa+LED.+Despues+di+a+haya+un+presentacion+na+sede+di+e+compania+di+electricidad%2C+Premier+Eman+a+expresa+su+satisfaccion+di+por+alcansa+un+logro+mas+y+bolbe+resalta+na+nivel+mundial+pa+loke+ta+sostenibilidad.Ta+asina]}
ORANJESTAD – Smart Grid cual ta consisti di Smart LED pa iluminacion publico y Smart Meters, ta un proyecto hopi importante cu ELMAR N.V. a bin ta traha riba dje durante ultimo par di aña. E ta cuadra cu e vision ‘berde’ di Gobierno pa cambia tur e puntonan di luz convencional pa LED. Despues di a haya un presentacion na sede di e compania di electricidad, Premier Eman a expresa su satisfaccion di por alcansa un logro mas y bolbe resalta na nivel mundial pa loke ta sostenibilidad.

Ta asina cu e luznan a cuminsa yega for di e fabrica den cantidad di 800 cada cinco siman. Den planificacion, Gabinete Mike Eman II a stipula cu ademas di cambia pa luznan mas eficiente den consumo di energia, e reduccion cu e ta genera den gasto anual pa Gobierno, ta bay destina na instalacion di puntonan di luz adicional den barionan cu no tin ainda y tin mester hopi di iluminacion publico.

“Dialuna awo ta cuminsa instala esakinan bek. Nos ta bay den bario di Sero Pela,” Prome Minister Eman a duna di conoce. Di e 12 mil luz cu Elmar a laga busca, e proporcion ta 9 mil pa puntonan existente y 3 mil pa puntonan nobo. “Kier men cu, den cada tres luz cu cambia, ta pone uno nobo. Ta bay haci posibel cu den hopi bario ta bay pone luz; un luz eficiente cu ta cuadra cu e vision berde y ta cuadra cu e maneho di Gobierno pa mehora calidad di bida den nos barionan.”

E prome mandatario a splica cu dos punto cu hopi bes e ta tende durante su bishita semanal den bario, ta caminda y luz. Premier Eman: “Na e momentonan aki nos ta continua cu e programa cu a inicia na 2013 y awo ta bay reinicia na Sero Pela y nos lo ta presente pa celebra esaki hunto cu e bario, cu nos ciudadanonan.”

Minister President Eman a gradici tur esnan envolvi den e proyecto. “Nos tin un aprecio grandi pa e trabou cu ELMAR N.V. a haci pa a yega na e luznan aki. Mi ta kere cu nos ta bay ta un di e prome paisnan na mundo cu a comberti tur su luz di caya den luznan LED. Un pabien na Sr. Henriquez, su ekipo tecnico cu a duna un contribucion grandi na haci esaki posibel, na colega Minister de Meza cu ta titular di Energia encarga cu companianan di utilidad cu ta haci cu e tipo di deseonan aki cu Gobierno ta posibel.”

Expresionnan haci den e articulo aki no necesariamente ta refleha opinion di ArenaPoliti.co